Read Chimborazo Highland Quichua 2 PEDRO 2 Bible Online

2 PEDRO 2 - Chimborazo Highland Quichua bible

2 PEDRO 2

¹Judiocunapurapica, llulla profetacunami ñaupapish tiyaj cashca. Cunanpish chashnallatajmi cancunapurapica llulla yachachijcuna tiyanga. Paicunaca tucuchij ch'icanyachij yachaicunatami pacalla yachachingacuna. Paicunata randishpa cacharichij Mandaj Jesustapish paica mana quishpichi tucunchu ningacunami. Chashna rurashpaca, paicunallatajmi jatun llaquipi utca chingaringacuna.

²Achcacunami chaicuna shina cacharishcacuna tucushpa pinganayaj millaita catingacuna. Paicuna chashna rurajpimi, mana llullata huillashcata catinataca mana allichu nishpa c'amingacuna.

³Chaicunaca quiquinpajlla ashtahuan charij canata munashcamantami crinalla shimicunahuan cancunata umashpa yachachishcamanta charijyanata yuyangacuna. Chashnacunataca ñaupamanta llaquichisha nishca jatun llaquica ñami quimimugrin, paicuna chingarinapish chaparacunmi.

⁴Diosca juchallij angelcunataca mana perdonarcachu. Ashtahuanpish pai llaquichina punllacamami, paicunataca ucu pacha amsapi prezu churarca.

⁵Ñaupa punllacunapi causajcunatapish Diosca mana perdonashcachu. Chai millaicunataca yacu juilluhuanmi chingachishca. Ashtahuanpish cashcata rurashpa causanata huillaj Noellatami, caishuj canchiscunandij huaquichishpa quishpichishca.

⁶Sodoma, Gomorra pueblocunatapish Diosca jatun llaquita cachashpami, ushpayajta rupachishpa chingachishca. Q'uipa punllacunapi Diosta mana manchashpa causajcunatapish, ima shina llaquichina cashcata ricuchingapajmi chashna rurashca.

⁷Chashna ruracushpapish cashcata ruraj Lottaca Diosmi chai llaquimantaca quishpichishca. Lotca millaita rurajcunata ricushpaca achcatami llaquirij cashca.

⁸(Cashcata ruraj Lotca, paicunapaj chaupipi causacushpaca millaita rurajta ricushpa, uyashpaca punllantami paipaj shungupica achcata llaquirij cashca).

⁹Tucui chaicunata rurashpaca, Jatun Diosca pai yuyailla cajcunataca llaquimanta quishpichij cashcata, shinallataj millaita rurajcunataca jatun llaquiman cachanapaj chai punllacama ch'icanchishpa charicuj cashcatami ricuchin.

¹⁰Aicha munaillata rurashpa cushicujcunata, millananata rurajcunata, Dios mandacuntapish yanganchijcunatami llaquichinga. Paicunaca jatun tucushcacuna, c'ariyajcuna cashpami jahua pacha jatun mandajcunatapish mana manchashpa millaita rimancuna.

¹¹Angelcunaca paicunata yalli imatapish rurai tucuj poderyujcuna cashpapish, llullashpa yachachijcunataca c'ariyashpa llaqui tucushca cachun nishpa Jatun Diospaj ñaupajpica mana rimancunachu.

¹²Chaicunaca animalcuna shinami. Imata rimacushcatapish mana yachashpa rimajcunami. Paicunaca animalcunata shina japishpa huañuchishpa chingachinapajllami huacharishcacuna. Paicunaca chingarinallapitajmi chingaringacuna.

¹³Chashnami paicuna millaita rurashcamantaca japina cashcataca japingacuna. Punllanta paicuna munashcata mana pingashpa rurashpa cushicushcamantami chashna japingacuna. Cancunapaj fiestacunapi micuicunaman rishpami chashna millaita rurancuna.

¹⁴Ñahuicunapish huainayanahuan jundami. Juchallinataca mana amincunachu. Manaraj alli yachajcunatapish millaita rurana yuyaita cushpa, millaita rurachijcunami. Paicunapaj shungucunaca aicha munaipi amañarishcacunami. Paicunaca yallitaj millaicunami.

¹⁵Paicunaca Beorpaj churi Balaampaj rurashcata catishpami alli ñanmantaca anchurishcacuna. Balaamca millaita rurashcamanta cullquita japinata munaj cashcamantami,

¹⁶pai mana allita ruracushcamantaca sinchita rimashca tucurca. Chashna mana allita yuyashpa ricujpica, shuj upa burromi gente shina rimashpa jarcarca.

¹⁷Chai yachachijcunaca, manapish yacu llujshicuj pugyucuna shinami. P'uyuta acapana apashca shinami. Chaicunapajca tucuita yalli amsami huiñaipaj ch'icanchishca tiyacun.

¹⁸Paicunaca uyanajlla yanga shimicunata rimashpami, mana allita ruracushcamanta llujshishcacunataca aicha munaita rurana yuyailla canata cushpa pandachincuna.

¹⁹Paicunaca huatashca shinamantaca cacharichishcami canguichij nincunami. Shina nishpapish paicunallatajmi millai munaicunahuan huatashca shina. Maijanpish mishachijca, chai mishajpajta huatashca shina rurajmi tucun.

²⁰Quishpichij Mandaj Jesucristota rijsishcamantaca, cai pacha millai munaicunamanta anchurishcami. Chashna cashpapish chai millai munaicunallamantaj cutin tigrarishpaca, cutinmi huatashca tucun. Chaimantami ñaupa ima shina cashcata yalli millai tucun.

²¹Dios cushca mandashcata chasquishca q'uipa, tigrarinallataj cashpaca cashcata rurana ñanta mana rijsishca cashpachari alli canman carca.

²²Ashtahuanpish chashna tucujcunaca: “Allcuca, pai shungu tigrashcatami tigra micun. Armachishca c'uchipish, cutinllatajmi guzupi singurin” nishcami pajtan.