Read Chimborazo Highland Quichua 1 JUAN 4 Bible Online

1 JUAN 4 - Chimborazo Highland Quichua bible

1 JUAN 4

¹C'uyashcacuna, cai pachapica achca llulla profetacunami ricurishca. Chaimanta ama tucui huillajcunata crichijllachu, Diospaj Espirituhuanchu nishpa alli ricuichij.

²Diospaj Espirituhuan cajtaca caipi rijsichij: Jesucristoca runa aichayuj tucushpami shamushca nishpa huillajca, Diospaj Espirituhuanmi.

³Jesucristoca mana runa aichayuj tucushpachu shamushca nishpa maijanpish nijca, mana Diospaj espirituhuanchu. Chaica, Cristota p'iñajpaj espirituyujmi. Chai shamuna cashcatami, cancunaca uyarcanguichij. Chaica ñamari cai pachapi.

⁴Huahuacuna, cancunaca Diospajmi canguichij. Cancunapi causacujca, cai pachapi cajta yallimi. Chaimantami paitaca ña mishashcanguichij.

⁵Paicunaca cai pachapajmi. Chaimantami cai pachapajllata rimancuna. Cai pachapaj cajcunami paicunataca uyancuna.

⁶Ñucanchijca, Diospajmi canchij. Diosta rijsijmi, ñucanchijtaca uyan. Mana Diospaj cajca, ñucanchijtaca mana uyanchu. Chaipimi mana llulla Espirituhuan cashcata, mana cashpaca pandachij espirituhuan cashcatapish rijsinchij.

⁷C'uyashcacuna, Dios c'uyaita cushcamanta caishuj chaishuj c'uyanacushunchij. Maijanpish c'uyajca Diosmanta huacharishcami, Diostapish rijsinmi.

⁸Maijanpish mana c'uyajca, Diostaca manaraj rijsishcachu. Diosca c'uyajmari.

⁹Diosca paipaj shujlla Churimanta ñucanchij quishpirichunmi cai pachaman cacharca. Chashnami pai c'uyaj cashcataca ricuchirca.

¹⁰Mana ñucanchijchu Diostaca c'uyashcanchij, ashtahuanpish paimari ñucanchijta c'uyashpa ñucanchij juchacunamanta huañushpa juchacunata anchuchichun paipaj Churitaca cacharca. Chashnami pai c'uyashcataca ricuchishca.

¹¹C'uyashcacuna, Dios chashna c'uyashcamantaca ñucanchijpish caishuj chaishuj c'uyanacunamari canchij.

¹²Diostaca manataj pi ricushcachu. Caishuj chaishuj c'uyanacushpami, Dios ñucanchijpi causacushcataca yachachij. Chashnami Diospaj c'uyai ñucanchijpi cashcataca ricuchinchij.

¹³Paipaj Espirituta ñucanchijman cushcamantami, Diosca ñucanchijhuan, ñucanchijpish paihuan shujlla caticushcataca yachanchij.

¹⁴Cai pachapi causajcunata Quishpichij cachun, Yayaca paipaj Churita cachashcatami ricurcanchij. Chaitami ñucanchijca huillacunchij.

¹⁵Dios paipi causacujpi paipish Diospi causacushpallami, Jesustaca Diospaj Churimi nishpami huillai tucun.

¹⁶Chaimantami Dios ñucanchijta c'uyashcataca yachanchij, crinchij. Diosca c'uyajmi. Maijanpish c'uyajca Dioshuan shujllami, Diospish paihuanca shujllami.

¹⁷Jesucristo cai pachapi causacushpa ima shina c'uyaj cashca shinallataj ñucanchijpish c'uyashpa causashpaca, imalla rurashcata Dios ricuchicui punllapica imata mana manchashunchu.

¹⁸C'uyai tiyajpica, ima manchai mana tiyanchu. Ashtahuanpish c'uyaica manchaita anchuchijmi. Manchaica llaquipimi churan. Maijanpish manchajca, c'uyana cashca shinatajca manaraj c'uyanchu.

¹⁹Ñucanchijca pairaj c'uyashcamantami, paitaca c'uyanchij.

²⁰Maijanpish: “Ñucaca Diostami c'uyani” nishpapish, paipaj huauquita p'iñajca llullami. Chaimanta maijanpish ricushca huauquita mana c'uyajca ¿ima shinataj mana ricushca Diostacarin c'uyangari?

²¹Ñucanchijca cashna mandashcatami, Jesucristomantaca charinchij: “Maijanpish Diosta c'uyajca, paipaj huauquitapish c'uyachun” ninmi.