Read Chimborazo Highland Quichua 1 JUAN 5 Bible Online

1 JUAN 5 - Chimborazo Highland Quichua bible

1 JUAN 5

¹Jesustaca Cristo cashcata maijanpish crijca, Diosmanta huacharishcami. Diosta maijanpish c'uyajca, paipaj huahuacunatapish c'uyanmi.

²Pai mandashcacunata cazushpa, paipaj huahuacunata c'uyashpami Diosta c'uyacushcataca yachanchij.

³Diosta c'uyacushcataca pai mandashcacunata cazushpami ricuchina. Pai mandashcacunata cazunaca mana sinchichu.

⁴Diosmanta maijanpish huacharishca cajca, cai pachapi millaita ruranataca mishanmi. Cai pachapi millaita ruranataca, Jesusta crishcami mishachin.

⁵¿Pitaj cai pachapi millaita ruranataca mishan? Jesusca Diospaj Churi cashcatataj crijmi mishan.

⁶Jesucristo shamushcataca yacumi yahuarmi ricuchin. Mana yacullachu ricuchin, ashtahuanpish yacupish yahuarpishmi ricuchin. Diospaj Espiritupish chaitami ricuchin. Espirituca mana llullajmi.

⁷Jahua pachapica cai quimsami huillacun. Paicunaca: Yaya, Rimai Shuti, Jucha Illaj Espiritumi. Cai quimsaca shujllami.

⁸Cai pachapipish quimsami huillacuncuna. Chaicunaca: Espíritu, yacu, yahuarmi. Chai quimsandijmi chaillatataj huillancuna.

⁹Gentecuna huillashcata chasquishpaca, Dios paipaj Churimanta huillashcatacarin chaitapish yallimari chasquina canchij.

¹⁰Diospaj Churipi maijanpish crijca, pai quiquinllapitajmi huillajtaca charin. Diosta maijanpish mana crijca, paitaca llullatami ruran. Paipaj Churimanta Dios huillashcatami mana crishca.

¹¹Chai huillashcacunaca caimi: Diosca ñucanchijmanca, huiñai causaitami cushca. Chai causaica, paipaj Churipimi.

¹²Diospaj Churihuan maijanpish shujlla cajca, causaitami charin. Diospaj Churihuan maijanpish mana shujlla cajca, causaitaca mana charinchu.

¹³Caicunataca Diospaj Churipi crishpa pai yuyailla cajcunaca huiñai causaita ña charishcata yachachunmi quillcani.

¹⁴Pai munashca shina imatapish mañajpica, paica uyashpa cujlla cashcata yachashcamantami paipi shunguta churanchij.

¹⁵Paica ñucanchij ima mañashcatapish uyajlla cashcata yachashpami, imata mañashcatapish ña charina cashcatataj yachanchij.

¹⁶Maijan huauqui mana huañuiman apaj juchata ruracujta ricushpaca, paimanta Diosta mañachun. Pai mana huañuiman apaj juchata rurashca cajpica, Diosca causaita cungami. Huañuiman apaj juchapish tiyanmi. Chaimantaca mana mañachun ninichu.

¹⁷Tucui imapish millaita ruranaca juchami. Shina cajpipish huañuiman mana apaj juchapish tiyanmi.

¹⁸Diosmanta maijanpish huacharishca cajca, juchata mana rurashpa catij cashcataca yachanchijmi. Paitaca Diospaj huahua cajpimi huaquichin. Diabloca paipica mana tuparinchu.

¹⁹Ñucanchijca Diospaj huahuacuna cashcatami yachanchij. Cai pachapi millaita rurajcunaca diablopaj ucupimi.

²⁰Ashtahuanpish Diospaj Churi shamushcatami yachanchij. Paimari mana llullaj Diosta rijsi tucunata curca. Chaimantami paipaj mana llullaj Churi Jesucristohuan shujlla canchij. Paimi mana llullaj Dios, huiñai causaitapish cuj.

²¹Huahuacuna, rurashcalla dioscunataca amataj adoranguichijchu. Chashna cachun.