Read Chimborazo Highland Quichua JUECES 1 Bible Online

JUECES 1 - Chimborazo Highland Quichua bible

JUECES 1

¹Israelcunaca paicunata pushaj Josué huañushca q'uipami, Mandaj Diostaca: “Cananeocunahuanca ¿maijan aillutaj punta macanacugrina canchij?” nishpa tapurcacuna.

²Chaimi Mandaj Diosca: “Judá ailluraj macanacugrichun. Chai allpataca paicunapaj maquipimi churani” nirca.

³Judá ailluca paicunapaj huauqui Simeón aillutaca: “Ñucanchij japina cashca allpata quichungapajca ishqui tucushpa, cananeocunahuan macanacugrishun. Chai q'uipaca cancuna japina cashca allpata quichungapajpish, ishqui tucushpallataj macanacugrishunllami” nijpimi Simeonpaj ailluca Judapaj ailluhuan rirca.

⁴Judá aillu macanacunaman chashna huichiyajpica, Mandaj Diosca cananeocunata, ferezeocunataca paicunapaj maquipimi churarca. Chaimi paicunataca Bezec pueblopi, 10.000 runacunata huañuchircacuna.

⁵Adoni-bezectapish Bezec pueblopi japishpami paihuanpish macanacushpa cananeocunatapish, ferezeocunatapish misharcacuna.

⁶Adoni-bezectaca, miticushpa callpacujta catishpa japishpami maquicunamantapish, chaquicunamantapish mama dedocunata p'itircacuna.

⁷Adoni-bezecca cashnami nirca: “Ñaupaca ñucamari canchis chunga jatun mandajcunata paicunapaj maquicunamantapish, chaquicunamantapish mama dedocunata p'itichircani. Paicunaca ñuca micucushpa urmachishcallatami meza ucumanta japishpa micujcuna carca. Ñuca imashinami paicunata llaquichircani, chai shinallatajmari ñucatapish Diosca llaquichin” nircami. Chai q'uipaca paitaca Jerusalenman apajpimi chaipi huañurca.

⁸Judapaj ailluca, Jerusalenpi causajcunapajman rishpa mishashpaca tucuita japishpa, tucuicunata espadahuan huañuchishpami, chai pueblotapish tucuita rupachircacuna.

⁹Chai q'uipaca, Judapaj ailluca urcucunapi, Neguev pambacunapi, pambajlla llajtacunapi causaj cananeocunahuan macanamanmi uriyarcacuna.

¹⁰Judapaj ailluca, Hebronpi causaj cananeocunahuanpishmi macanacunaman rirca. Chai pueblopi causajcunata mandaj Sesai, Ahimán, Talmai runacunatapishmi huañuchircacuna. Chai puebloca ñaupaca, Quiriat-arba shutimi carca.

¹¹Chaimantaca Judapaj ailluca, Debirpi causajcunahuan macanacunamanmi rirca. Chai puebloca ñaupaca, Quiriat-sefer shutimi carca.

¹²Chaipimi Caleb runaca: “Maijanpish Quiriat-seferpi causajcunahuan macanacushpa mishajmanca, Acsa shuti ñuca ushushitami paipaj huarmi cachun cusha” nirca.

¹³Chai macanacuipica Calebpaj q'uipa huauqui Cenazpaj churi Otonielmi misharca. Chaimi Calebca, Acsa shuti paipaj ushushita Otonielmanca paipaj huarmi cachun curca.

¹⁴Otonielca paipaj huarmi paihuan ña rigrijpimi, tarpuna allpacunata cambaj yayata mañai nishpa yachachirca. Acsa huarmi burromanta uricujpimi, paipaj yaya Calebca: — ¿Imatataj ningui? — nishpa tapurca.

¹⁵Chaimi paica: — Ñucami cantaca shuj mañanata mañasha nini. Neguev pambapica allpacunataca ñami curcangui. Cunanca pugyu yacuyuj allpacunatapish cuhuayari — nijpimi, Calebca jahuamanpish ucumanpish pugyu yacuyuj allpacunata curca.

¹⁶Moisespaj suegro ceneopaj huahua huahuacunaca palmera yuracuna tiyan pueblomantami, Judapi tiyaj shitashca pambaman Judapaj ailluhuan huichi rircacuna. Chai pambaca, Arad shuti pueblo c'uchullapi caj Neguev shuti pambapimi carca. Paicunaca chaipi causajcunahuanmi causarcacuna.

¹⁷Judapaj ailluca paipaj huauqui Simeonpaj ailluhuan rishpami, Sefat pueblopi causaj cananeocunahuan macanacushpa mishashpaca, pueblotapish tucui chingachishpa, chai pueblotaca Horma shutita shutichircacuna.

¹⁸Judapaj ailluca Gaza, Ascalón, Ecrón pueblocunataca chai muyundij llajtacunandijmi japircacuna.

¹⁹Judapaj ailluca, Mandaj Dios paicunahuan cajpimi, urcucunapi causajcunataca llujshichishpa cacharcacuna. Ashtahuanpish pambacunapi causajcunaca, fierro carrocunata charijcuna cajpimi paicunataca mana llujshichishpa cachai tucurcacuna.

²⁰Calebmanca Moisés nishca shinallataj Hebrón pueblotami curcacuna. Paica Anacpaj quimsa churicunatami chai llajtamanta llujshichishpa cacharca.

²¹Benjaminpaj ailluca, Jerusalenpi causaj jebuseocunataca mana llujshichishpa cacharcacunachu. Jebuseocunaca Benjaminpaj ailluhuanmi Jerusalenpi cunancama causacuncuna.

²²Josepaj aillupish Bet-elpi causajcunahuan macanacungapajmi huichiyarcacuna. Mandaj Diosca paicunahuanmi carca.

²³Josepaj ailluca Bet-elpica purij shinalla ricujcunatami churarca. Chai puebloca ñaupamanca, Luz shutimi carca.

²⁴Purij shinalla ricujcunaca chai pueblomanta llujshicuj shuj runahuan tupashpaca: “Cai puebloman yaicunata ricuchihuai. Can ricuchijpica cantaca mana huañuchishunchu” nircacunami.

²⁵Chai runa chai puebloman maita yaicunata ricuchijpimi, paicunaca chai pueblopi causajcunataca tucuicunata espadacunahuan huañuchircacuna. Chai runallatami paipaj huasi ucupurandij llujshishpa richun saquircacuna.

²⁶Chai runaca heteocunapaj llajtaman rishpami, shujtaj pueblota shayachirca. Chai pueblotaca Luz shutitami shutichirca, cunancama chai shutillatajmi.

²⁷Manasespaj aillupish Bet-seán, Taanac, Dor, Ibleam, Meguido pueblocunapi causajcunata, chai muyundij llajtacunapi causajcunatapish mana llujshichishpa cacharcacunachu. Chaimantami chaipi causaj cananeocunaca chaillapitaj causashpa catircacuna.

²⁸Israelcunaca ashtahuan c'ari c'ari tucushpa ña tucuita paicuna mandashpami cananeocunataca yallitaj paicunapajta trabajachishpa causarcacuna. Ashtahuanpish paicunataca mana llujshichishpa cacharcacunachu.

²⁹Efrainpaj aillupish, Gezerpi causaj cananeocunataca, mana llujshichishpa cacharcacunachu. Ashtahuanpish cananeocunataca, paicunahuan causachun saquircallami.

³⁰Zabulonpaj aillupish Quitrón, Naalal pueblocunapi causaj cananeocunataca, mana llujshichishpa cacharcacunachu. Ashtahuanpish cananeocunaca Zabulón aillupajta yallitaj trabajashpa paicunapaj chaupillapitajmi causarcacuna.

³¹Aserpaj aillupish Aco, Sidón, Ahlab, Aczib, Helba, Afec, Rehobpi causaj cananeocunataca mana llujshichishpa cacharcacunachu.

³²Aserpaj ailluca cananeocunata mana llujshichishpa cachashpami, chaipi causaj cashca cananeocunallahuantaj causarcacuna.

³³Neftalipaj aillupish Bet-semespi causajcunata, Bet-anatpi causajcunatapish mana llujshichishpa cacharcacunachu. Paicunapish chai llajtapi causaj cashca cananeocunallahuantajmi causarcacuna. Bet-semespi causaj, Bet-anatpi causaj cashca cananeocunaca Neftalí aillupajta yallitaj trabajashpallami causarcacuna.

³⁴Amorreocunaca, Danpaj aillutaca pambajlla llajtacunaman uriyachun mana saquishpami, urcucunaman catircacuna.

³⁵Chashnami amorreocunaca Heres urcupi, Ajalón, Saalbim pueblocunapi causashpa catircallacuna. Josepaj ailluca ña c'ari c'ari tucushpami, amorreocunataca paicunapajta yallitaj trabajachishpa causarcacuna.

³⁶Amorreocunapaj lindeca Acrabim huichimantaca, Sela pueblomanta jahuacamami carca.