Read Chimborazo Highland Quichua JUECES 10 Bible Online

JUECES 10 - Chimborazo Highland Quichua bible

JUECES 10

¹Abimelecpaj q'uipaca, Isacar aillupuramanta caj Tola runami israelcunata llaquimanta llujshichingapajca jatarirca. Paica Fuapaj churi, Dodopaj nietomi carca. Tola runaca Efraín urcupi caj Samir pueblopimi causarca.

²Tola runaca ishqui chunga quimsa huatatami israelcunataca mandarca. Pai huañujpica, Samir pueblollapitajmi pambarcacuna.

³Tolapaj q'uipaca, Galaadpi causaj Jair runami israelcunata mandangapaj jatarirca. Paica ishqui chunga ishqui huatatami mandarca.

⁴Paica quimsa chunga churicunatami charirca. Tucuicunami tiyarishpa puringapajca shuj shuj burrota charircacuna. Galaad llajtapipish tucuicunami shuj shuj quiquin pueblota charircacuna. Chai quimsa chunga pueblocunaca cunancama: “Jairpaj pueblocuna” shutillahuantajmi.

⁵Chai q'uipami Jairca huañurca. Paitaca Camón pueblopimi pambarcacuna.

⁶Israelcunaca baal shuti, Astarot shuti dioscunata, Siria llajtapaj dioscunata, Sidón llajtapaj dioscunata, Moab llajtapaj dioscunata, amonitacunapaj dioscunata, filisteocunapaj dioscunata adorashpami, Mandaj Diospaj ñaupajpica cutinllataj millaita rurarcacuna. Mandaj Diosmanta anchurishpami, Mandaj Diospajtaca ña mana ashtahuan rurarcacuna.

⁷Mandaj Diosca nina sindirij shina israelcunahuan p'iñarishpami filisteocunapaj, amonitacunapaj maquipi churarca.

⁸Chaimi paicunaca israelcunataca chunga pusaj huatata yallitaj llaquichishpa causarcacuna. Jordán yacu ch'imbanijpi caj amorreocunapaj llajtapi caj Galaad llajtapi causaj israelcunatapishmi llaquichircacuna.

⁹Amonitacunaca Judá ailluhuan, Benjamín ailluhuan, Efraín ailluhuan macanacungapajpishmi Jordán yacuta ch'imbarcacuna. Israelcunaca yallitaj llaquitami apacurcacuna.

¹⁰Chaimi israelcunaca Mandaj Diostaca: “Ñucanchijmi, can ñucanchij Diosta saquishpa, baal dioscunapajllata rurashpa can Diosta p'iñachishpa juchallishcanchij” nishpami caparishpa mañarcacuna.

¹¹Mandaj Diosca israelcunataca: “Egipto runacuna, amorreocuna, amonitacuna, filisteocuna,

¹²Sidonpi causajcuna, amalecitacuna, Maonpi causajcuna llaquichicujpi ñucata mañajpica ¿manachu paicunapaj maquimanta llujshichircani?

¹³Chai jahuamari ñucamanta caruyashpa shujtajcunapaj dioscunapajta rurashcanguichij. Ñucapish cancunataca ña mana ashtahuan quishpichishachu.

¹⁴Cunanca cancunapaj llaquicunamanta llujshichichunca, cancuna agllashca dioscunallatataj caparishpa mañagrichijlla” nircami.

¹⁵Israelcunaca Mandaj Diostaca: “Ñucanchijca juchallishcanchijmi. Cunanca cambaj ima ashtahuan alli canata rurailla. Cunan cai cutinllahuan ñucanchijta quishpichihuai” nishpami mañarcacuna.

¹⁶Israelcunaca paicunapaj chaupimanta shujtajcunapaj dioscunata tucuita anchuchishpami, Mandaj Diospajllata rurarcacuna. Mandaj Diospish israelcuna ashtahuan llaquita apacuchunllaca ña mana ashtahuan saquircachu.

¹⁷Amonitacunaca tucuicuna tandanacushpami, Galaadpi carpa huasicunata shayachishpa tiyarircacuna. Israelcunapish tandanacushpami, Mizpa pueblopi carpa huasicunata shayachishpa tiyarircacuna.

¹⁸Chaipimi Galaadtapi causaj israelcunapish pushajcunapish: “Amonitacunahuan cai macanacuitaca ¿maijanshi pushanga? Maijanpish chai macanacuita pushajca chaimi Galaad llajtapi tucui causajcunata pushaj canga” nishpami caishuj chaishuj ninacurcacuna.