Read Chimborazo Highland Quichua JUECES 11 Bible Online

JUECES 11 - Chimborazo Highland Quichua bible

JUECES 11

¹Galaad llajtapi causaj Jefté runaca macanacunata alli yachaj, c'ari c'ari runami carca. Paica huainayashcahuan causaj huarmipaj churimi carca. Paipaj yayaca Galaadmi carca.

²Galaadca quiquin huarmihuanpish churicunata charircami. Paicuna huiñashpami Jeftetaca: “Canca shujtaj huarmipi llujshishca churillami cangui. Canca ñucanchij yayamanta ima japinata mana charinguichu” nishpa llujshichishpa cacharcacuna.

³Chaimi Jefteca paipaj huauquicunamanta miticushpa, Tob llajtapi causagrirca. Q'uilla runacuna paihuan tandanacujpimi, paica paicunahuan llujshij carca.

⁴Chaimanta asha punllacuna q'uipami amonitacunaca israelcunahuan macanacurcacuna.

⁵Amonitacuna israelcunahuan macanacugrijpimi, Galaadpi causaj cunaj yuyajcunaca, Tob llajtamanta Jefteta pushanaman rishpaca:

⁶— Ñucanchijhuan jacupai, ñucanchijmi amonitacunahuan macanacuipi pushachun ninchij — nircacuna.

⁷Chaimi Jefteca, Galaad llajtata cunaj yuyajcunataca: — Cancunaca ñucata p'iñashpamari ñuca yayapaj huasimantapish llujshichishpa cacharcanguichij. Cunanca llaquihuan cashpallamari ñucataca pushanaman shamushcanguichij — nirca.

⁸Galaad llajtata cunaj yuyajcunaca Jeftetaca: — Ari, llaquipi cashpatajmari cantaca pushaj shamunchij. Ñucanchijhuan tucushpa amonitacunahuan macanacungapajpish, Galaadpi causaj tucui ñucanchijta mandaj tucungapajpish jacupaillari — nircacuna.

⁹Chaimi Jefteca Galaad llajtata cunaj yuyajcunataca: — Amonitacunahuan macanacuchun ñucata tigrachishpa pushajpi, Mandaj Dios amonitacunata ñuca maquipi churashpa ñucata mishachijpica ¿ñucaca cancunata mandaj tucushatajchu? — nirca.

¹⁰Galaad llajtata cunaj yuyajcunaca Jeftaca: — Can nishca shina ñucanchij mana rurajpica, Mandaj Diosllataj ricuchun — nircacunami.

¹¹Jefteca Galaad llajtata cunaj yuyajcunahuanmi rirca. Galaadpi causajcunaca paicunata pushaj, mandaj cachunmi agllarcacuna. Mizpa pueblopimi, Jefteca ñaupaman imalla nishcacunataca Mandaj Diospaj ñaupajpi cutin chashnallataj nirca.

¹²Jefteca amonitacunata jatun mandajmanca: Ñuca llajtapi causajcunata p'iñashpa macanacunaman shamungapajca, canca ñucahuanca ¿imatataj charingui? nichunmi huillajcunata cacharca.

¹³Jefté cachashcacunamanca amonitacunata jatun mandajca: “Egiptomanta huichiyamucushpami israelcunaca ñuca allpataca Arnón jatun yacumanta Jaboc yacucama, Jordán yacucamapish quichurcacuna. Cunanca chai allpataca alli shungu ñucaman tigrachi” nircami.

¹⁴Jefteca cutinllatajmi amonitacunapaj jatun mandajpajman shujtaj huillajcunata,

¹⁵cashna nichun cacharca: “Jefteca cashnami nin: Israelcunaca moabitacunapaj allpatapish, amonitacunapaj allpatapish imata mana quichurcachu.

¹⁶Egiptomanta israelcuna huichiyamushpaca shitashca pambata shamushpami, Puca Cuchaman chayamurcacuna. Chaimantaca Cades pueblomanmi chayarcacuna.

¹⁷Chaiman chayashpami Edom llajtata jatun mandajtaca: Ñucanchij pasangacamalla cambaj ñanta mañachihuai nichun maijancunata cacharca. Ashtahuanpish Edomta jatun mandajca mana uyasha nircachu. Moabitacunata jatun mandajta ñanta mañanaman cachajpipish paipish mana uyasha nircachu. Chaimantami israelcunaca Cades pueblollapitaj saquirircacuna.

¹⁸Chashna mana pasachisha nijpimi, shitashca pambata rishpa Edom llajta, Moab llajta huashanijta muyushpa rirca. Chaimantaca inti llujshin ladoman caj Moab llajta ch'imbanijta shamushpami Arnón jatun yacu ch'imbanijllapi carpa huasicunata shayachishpa chaipi saquirircacuna. Arnón yacuca moabitacunapaj llajtapi cashcamantami chaimanca mana yaicurca.

¹⁹Israelcunaca amorreocunata jatun mandaj Sehonpajmanpish: Ñucanchij llajtaman pasangacamalla cambaj llajta ñanta mañachihuai nichunmi Hesbón puebloman maijancunata cacharca.

²⁰Jatun mandaj Sehonca pasangapajlla ñanta mañacushcataca israelcunataca mana crishpami ñantaca mana mañachisha nirca. Ashtahuanpish tucui paipaj soldadocunata tandachishpa Jahaza puebloman shamushpami carpa huasicunata shayachircacuna. Chaipimi israelcunahuan macanacurca.

²¹Sehontapish, tucui paipaj cajcunatapish israelcunata Mandaj Dios israelcunapaj maquipi churajpimi, chai llajtapi causaj amorreocunata mishashpa allpacunataca paicuna japircacuna.

²²Chai amorreocunapaj llajtataca, Arnón jatun yacumantaca Jaboc jatun yacucama, shitashca pambamantaca Jordán yacucamami tucuita japircacuna.

²³Shina cajpica, israelcunata Mandaj Dios, amorreocunata quichushpa paipaj israelcunaman cushcataca ¿canchu cunan quichusha ningui imamí?

²⁴Cambaj Quemos dios canman imata cushcaca ¿manachu ña cambaj? Chashnallataj Mandaj Dios ñucanchij ñaupajpi quichushpa ñucanchijman cushcaca ña ñucanchijpajmi.

²⁵¿Cunan canca Ziporpaj churi moabitacunata jatun mandaj Balacta yallimi cani yuyanguichu? ¿Paica israelcunata p'iñashpa imata rurai tucurcachu? mana cashpaca ¿paicunahuan macanacui tucurcachu?

²⁶Israelcunaca Hesbón pueblopipish chai muyundij llajtacunapipish, Aroer pueblopipish chai muyundij llajtacunapipish, Arnón jatun yacu uripi caj tucui pueblocunapipish ñamari, 300 huatacunata causancuna. Chai llajtacuna cancunapaj cajpica, chai tucui huatacunapica ¿ima nishpataj mana tigrachichircanguichigari?

²⁷Shina cajpica, ñucaca canta p'iñachishpa imata mana juchallishcanichu. Ashtahuanpish canmari ñucata p'iñashpa ñucahuan macanacusha nishpa mana allita rurangui. Mandaj Diosmi juez. Paimi israelcunatapish, amonitacunatapish imatapish ninga” nichunmi cacharca.

²⁸Ashtahuanpish amonitacunata jatun mandajca, Jefté huillanaman cachashcacunataca mana uyasha nircachu.

²⁹Jefteca Diospaj Espíritu paipaj jahuaman shamujpimi, Galaadpi causaj Gad aillutapish, Manasés aillutapish Galaad llajtallapitaj caj Mizpa pueblopi tandachishpa, chai pueblomantaca amonitacunahuan macanacunaman llujshirca.

³⁰Jefteca Mandaj Diostaca: “Amonitacunata can ñuca maquipi churajpi,

³¹mishashpa chaimanta tigrajpi ñucata tupanaman ñuca huasimanta punta llujshijca can Mandaj Diospajmi canga. Chaitaca canman cushpa tucuimi rupachisha” nircami.

³²Amonitacunahuan Jefté macanacugrijpica, Mandaj Diosca amonitacunataca Jeftepaj maquipimi churarca.

³³Amonitacunata Jefté mishashpaca Aroer pueblomantaca Minit pueblocamami ishqui chunga pueblocunata quichurca. Sumaj uva chagracunandijmi quichurca. Amonitacunaca israelcuna mandashcami causarcacuna.

³⁴Macanacuita mishashpa, Mizpa pueblopi caj paipaj huasiman Jefté tigramujpica, paipaj ushushimi panderocunapi tocaihuan tushushpa tupanaman llujshirca. Jefteca shuj ushushillatami charirca. Churitapish ushushitapish shujtajtaca mana charircachu.

³⁵Paipaj ushushi tupanaman llujshijta ricushpaca, Jefteca churanata lliquirishpami: — ¡Aij ñuca huahualla, llaquitatajmi rurangui! Canca ñucataca jatuntamari nanachingui. ¡Mandaj Diosman ñuca shimihuantaj nishcataca maitataj p'aquishari! — nirca.

³⁶Chaimi paipaj ushushica: — Ñuca yayitolla. Ñucanchijta p'iñaj amonitacunahuan macanacuipica Mandaj Diosmari canta mishachishca. Chaimanta cambaj shimihuan paiman imata cusha nishca cashpaca ñucata cushpa pajtachilla.

³⁷Shina nishpapish paipaj yayataca cashnami nirca: Mana cazarashpa huañuna cashcamanta, ñucahuan apanacuj caishuj solteracunahuan urcucunapi huacashpa purigringapaj ishqui quillata shuyai — nircami.

³⁸Chaimi Jefteca: — Rilla, nishpa ishqui quillacama purigrichun saquijpi, paipaj ushushica manaraj cazarashpa huañuna cashcamanta, huacashpa paihuan apanacuj caishuj solteracunahuan urcucunapi purigrirca.

³⁹Ishqui quilla pajtajpi huasiman tigramujpimi, paipaj yaya Jefteca Mandaj Diosman cushami nishcata pajtachirca. Jeftepaj ushushica, c'arihuan manataj chayarinacushcami carca.

⁴⁰Israelpi causaj solteracunaca Galaadpi causaj Jeftepaj ushushi huañushcata yuyarishpami huatanta chuscu punllata huacanaman rijcuna cashca.