Read Chimborazo Highland Quichua JUECES 12 Bible Online

JUECES 12 - Chimborazo Highland Quichua bible

JUECES 12

¹Efrainpaj ailluca tucuicuna tandanacushpami, janaj ladoman pasashpa Jeftetaca: — Amonitacunahuan macanacugricushpaca ñucanchijpish canhuan ringapaj ¿ima nishpataj mana cayarcangui? Chaimantami cunanca cantaca cambaj huasi ucullapitaj huasindij rupachigrinchij — nircacuna.

²Chaimi Jefteca: — Ñucapish, ñuca llajtapi causajcunapish amonitacunahuan jatunta p'iñanacushpaca cancunatapish cayaj cacharcanimi. Ashtahuanpish cancunamari paicunahuan macanacucujpica mana ayudaj shamurcanguichij.

³Cancuna ayudanaman mana shamujta ricushpami, huañushpapish huañushatajchari nishpa amonitacunahuanca macanacurcani. Mandaj Dios paicunata ñuca maquipi churajpimi misharcani. Cunanca ¿ima nishpataj ñucahuan macanacunaman huichiyamurcanguichij? — nircami.

⁴Jefteca, Galaadpi causajcunata tandachishpami, Efrainpaj ailluhuan macanacurca. Galaadpi causajcunami Efrainpaj aillutaca misharcacuna. Efrainpaj ailluca Galaadpi causajcunataca: “Efraín aillupaj, Manasés aillupaj chaupipi causacuj galaaditacunaca Efrainpaj aillumanta chaupirimushcacunallami canguichij” nishcamantami chashna macanacushcacuna.

⁵Galaadpi causajcunaca Jordán yacuta ch'imbanapimi, Efraín aillupura cajcuna miticushpa saquirishcacunata chapacurcacuna. Chai saquirishcapuramanta maijan shamushpa yacuta ch'imbachun saquihuaichij nijpica: “¿Efrainpaj aillupurachu cangui?” nishpami tapurcacuna. “Mana chaipurachu cani” nijpica:

⁶“Shinashpaca Shibolet ni” nircacuna. Chai shimita mana rimai tucushpa “Sibolet” nijpica, japishcahuan chai yacu c'uchullapitajmi cungata p'itishpa huañuchircacuna. Chai punllaca Efraín aillupura cajcunataca, 42.000 runacunatami huañuchircacuna.

⁷Jefteca israelcunataca sujta huatatami mandarca. Pai huañujpica Galaadpi caj shuj pueblopimi pambarcacuna.

⁸Jeftepaj q'uipaca israelcunataca Belenmanta caj Ibzán runami mandarca.

⁹Paica quimsa chunga churicunata, quimsa chunga ushushicunatami charirca. Paicunataca tucuicunatami caishuj llajtamanta cajcunahuan cazarachirca. Ibzanca, canchis huatatami israelcunataca mandarca.

¹⁰Pai huañujpica, Belenpimi pambarcacuna.

¹¹Ibzanpaj q'uipaca, Zabulón aillupaj Elón runami israelcunataca chunga huatacunata mandarca.

¹²Pai huañujpica Zabulonpaj llajtallapitaj caj Ajalón pueblopimi pambarcacuna.

¹³Elonpaj q'uipaca Piratón pueblomanta caj Hilel runapaj churi Abdonmi israelcunataca mandarca.

¹⁴Paica chuscu chunga churicunata, quimsa chunga nietocunatami charirca. Paicunaca tucuicunami tiyarishpa puringapajca shuj shuj burrota charircacuna. Abdonca israelcunataca pusaj huatatami mandarca.

¹⁵Piratón pueblomanta caj Hilelpaj churi Abdón huañujpica, Amalecpaj urcupi caj Efrainpaj allpa Piratón pueblopimi pambarcacuna.