Read Chimborazo Highland Quichua JUECES 14 Bible Online

JUECES 14 - Chimborazo Highland Quichua bible

JUECES 14

¹Sansonca, Timnat puebloman uriyashpami, chai pueblopica filisteocunapura shuj huarmita ricurca.

²Chaimanta tigrashpami, paipaj yaya mamamanca: — Timnatpica filisteocunapura shuj huarmitamari ricumuni. Chai huarmihuan ñucata cazarachihuaichij — nirca.

³Chaimi Sansonpaj yaya mamaca: — Circuncisionta mana rurashca filisteocunapuramanta huarmihuan cazaranapaj randica ¿manachu ñucanchijpurapipish tucui ñucanchij cai pueblopipish huarmica tiyan? — nijpipish Sansonca paipaj yayataca: — Paihuan cazarachihuaichijlla. Chai huarmimari ñuca munashca — nircami.

⁴Sansonpaj yaya mamaca, Mandaj Diospaj munaillataj chashna cajpi chashna tucucushcataca mana yacharcacunachu. Chai huatacunapica filisteocunami israelcunataca llaquichishpa charicurca. Chaimanta filisteocunahuan macanacuchingapajmi chashna rurarca.

⁵Sansonca, paipaj yaya mamandij Timnatman uriyashpami chai pueblo c'uchullapi caj uva chagraman chayarca. Chaipi cajpimi, shuj malta leonca huacarishpa paipajman c'uchuyarca.

⁶Sansonca Mandaj Diospaj Espíritu paipaj jahuaman shamujpimi, chai leontaca shuj chivitota huañuchij shinalla mirga mirgata rurashpa huañuchirca. Paipaj maquipica imata mana charircachu. Pai chashna rurashcataca yaya mamamanca mana huillarcachu.

⁷Chaimanta uriyashpaca pai munashca huarmihuanmi parlanacurca. Chai huarmica Sansón munashca shinami carca.

⁸Sansonca asha punllacuna q'uipa chai huarmihuan cazarangapaj tigracushpami, ñanmanta anchurishpa huañushca leonpaj cuerpota ricunaman rirca. Chai leonpaj cuerpopica achca sacha chuspicunatapish, paicuna huachashca mishquitapishmi ricurca.

⁹Chai mishquitaca paipaj maquihuan japishpami, micurihuan ñantaca rirca. Yaya mamata cati japishpaca, paicunapish micuchunmi chai mishquitaca curca. Chai mishquica huañuchishca leonpaj cuerpomanta cashcataca mana huillarcachu.

¹⁰Chai huarmipaj huasiman paipaj yayahuan chayashpami, Sansonca chai llajtapi causaj mosocuna ruraj cashca shinallataj jatun micuita rurarca.

¹¹Filisteocuna Sansonta ricushpaca, paihuan cachunca quimsa chunga runacunatami aparcacuna.

¹²Paicunatami Sansonca cashna nirca: — Ñucaca cancunataca yuyaricushpalla cutichinatami tapugrini. Cai jatun micui canchis punllacunacama cancuna mana yuyari tucuipaj cajpipish alli yuyarishpa callarishpa huillajpica, cancunamanca linomanta rurashca churanatami shuj shuj tucuicunaman cusha. Jatun micui punllacunapi churarina sumaj churanatapishmi shuj shuj cusha.

¹³Ashtahuanpish umanaricushpalla cutichinata cancuna ñucaman callarishpa mana huillashpaca, cancunamari linomanta rurashca quimsa chunga churanacunatapish, jatun micui punllapi churarina quimsa chunga sumaj churanacunatapish ñucaman cuna canguichij — nijpimi paicunaca: — Umanaricushpalla cutichinataca huillapailla. Tucuicunamari alli uyaracunchij — nircacuna.

¹⁴Shina nijpimi Sansonca: “Millpusha nicujmantaca micunami llujshirca. Fuerzasapamantaca mishquimi llujshirca” nirca. Paicunaca quimsa punllacamapish chai ima nisha nishcataca mana huillai tucurcacunachu.

¹⁵Ña canchis punlla tucujpimi, Sansonpaj huarmitaca: — Cambaj cusa ñucanchijman nishcaca imata nisha nishcata huillachun tapuiyari. Mana chashnajpica cantapish, cambaj yayatapish tucui huasi familiandijmi rupachishun. Cancunaca ñucanchijpaj cashcacunata quichunga raicullamari cayashca yuyachinguichij — nircacuna.

¹⁶Chashna nijpi chai huarmica Sansonpaj ñaupajpi huacashpami: — Ñucataca manamari c'uyashcanguichu. Umanaricushpalla yachaj chayana cashcata ñuca llajtapura cajcunaman huillashpapish, ima nisha nishcataca ñucamanca manamari huillanguichu — nijpimi Sansonca: — Ñuca yaya mamamanpish mana huillashcataca, canmancarin maitataj huillashari — nirca.

¹⁷Chaipipish chai huarmica imata nisha nishcata huillahuailla nishpami cutin cutin jatun micui canchis punllacunataca huacacurcalla. Sansonca paipaj huarmi huacashpa tapucujllapimi, ña canchis punlla tucujpica pai nishcaca imata nisha nishcata paiman huillarca. Chai huarmica paipaj llajtapura caj mosocunamanmi huillagrirca.

¹⁸Jatun micui tucuri canchis punlla ña tutayagrijpimi, chai quimsa chunga filisteocunaca Sansontaca: “Sacha chuspi huachashca mishquita yalli mishquica ima mana tiyanchu. Leonta yalli fuerzasapapish ima mana tiyanchu” nircacuna. Chaimi Sansonca: “Ñuca vaquillahuan mana yapushca cashpaca, ñuca nishca imata nisha nishcataca manataj yachanguichijmanchu carca” nirca.

¹⁹Sansonca Diospaj Espíritu paipaj jahuaman shamujpimi, Ascalón puebloman uriyashpa chaipi causaj filisteocunapuramanta quimsa chunga runacunata huañuchirca. Chai runacunapaj churanacunata apamushpami, pai nishca imata nisha nishcata huillajcunaman curca. Sansonca nina sindirij shina p'iñarishcami, paipaj yayapaj huasiman tigrarca.

²⁰Sansón rijpimi, paipaj huarmitaca, paihuan compaña rijhuan cazarachirca. Chai runaca Sansonhuan alli apanacujmi carca.