Read Chimborazo Highland Quichua JUECES 15 Bible Online

JUECES 15 - Chimborazo Highland Quichua bible

JUECES 15

¹Chai asha punllacuna q'uipami, trigota tandana punllacunapi Sansonca paipaj huarmita ricunaman shuj chivitota apashpa rishpa chayashpaca: — Ñuca huarmita ricungapajmi pai tiyacun ucuman yaicusha nini — nijpi, huarmipaj yayaca mana yaicuchisha nirca.

²Ashtahuanpish cashnami nirca: — Mana ninchu yuyashpami canhuan apanacujllahuantaj cazarachircani. Paipaj randica, paipaj q'uipa ñañahuan cazarai. ¿Manachu paicari paita yalli sumaj? — nirca.

³Chaimi Sansonca: — Cunanca filisteocunata ima llaquita rurashpapish, ima juchachina illajllami casha — nirca.

⁴Chaimanta rishpami Sansonca 300 zorracunata japishpa, ishqui ishquita chupacunapura tinguishpa nina sindina mechata tinguishca chupacunapi huatarca.

⁵Chai q'uipaca nina sindita japichishpa tinguishca zorracunapi huatashpami filisteocunapaj chagracunapi cacharishpa, paicunapaj trigotaca chagrapi shayacujtapish, ña tandashpa parbashcatapish tucui rupachirca. Uva chagracunatapish, olivos yuracunatapishmi tucui rupachirca.

⁶Filisteocunaca: — ¿Pishi chaitaca rurarca? — nishpa tapui callarijpimi, — Timnat pueblopi causaj runamari, Sansonpaj huarmi caj paipaj ushushitaca, Sansonhuan apanacuj runahuan cazarachirca. Chaimanta Sansón p'iñarishpamari chashna rurashca — nishpa huillajpimi, filisteocunaca chai huasiman rishpa chai runataca paipaj ushushindij rupachircacuna.

⁷Chaimi Sansonca: — Cancuna chashna rurashcamantaca, ñucapish cancunata llaquichingacama manataj samarishachu — nirca.

⁸Chashna yallitaj p'iñarishpami, Sansonca filisteocunataca tucui tullucuna p'aquirijta macashpa huañuchishpa, paica Etam jatun peña quinripi tiyaj jutcupi causagrirca.

⁹Filisteocunaca Judá aillupaj llajtaman huichiyashpami, Lehipi carpa huasicunata shayachishpa tucuipi jundarircacuna.

¹⁰Chaimi Judá ailluca: — ¿Ima nishpataj ñucanchijhuan macanacunaman huichiyamurcanguichij? — nijpi filisteocunaca: — Ñucanchijca Sansonta prezu japingapajmari huichiyamurcanchij. Pai ñucanchijta llaquichishca shinallataj llaquichingapaj — nircacuna.

¹¹Chaimi Judá aillupaj, 3.000 runacuna Etam jatun peña quinripi tiyaj jutcuman Sansonpajman rishpaca: — Filisteocuna ñucanchijta mishashpa, paicuna mandacushcataca ¿manachu yachangui? ¿Ima nishpataj chashna ruranguiyari? — nijpi Sansonca: — Ñucata llaquichijpimi, ñucapish paicunataca chai shinallataj rurarcani — nirca.

¹²Shina nijpi paicunaca: — Ñucanchijca canta japishpa, filisteocunapaj maquipi churangapajmi shamunchij — nijpi Sansonca: — Cancunallataj ñucata huañuchishun nicunguichijman, ama llullashpalla huillaichij — nirca.

¹³Chaimi paicunaca: — Mana huañuchishunchu. Canta japishpa filisteocunapaj maquipi churangapajllami shamunchij — nishpami ishqui mushuj huascacunahuan huatashpa, chai peñamantaca llujshichishpa pusharcacuna.

¹⁴Lehiman chayajpica, filisteocunaca caparirinacushpami paita tupanaman llujshircacuna. Mandaj Diospaj Espíritu Sansonpaj jahuaman shamujpimi, maquicunapi huatashca huascacunaca linota ninahuan rupachishca shinalla tucurca. Chaimantami paipaj maquicunata huatashca huascacunaca pambaman urmarca.

¹⁵Chaimantami manaraj alli chaquishca burro jashlin tulluta chai pambapi ricushpaca, chaita japishpa huaranga filisteocunata huañuchirca.

¹⁶Chaipimi Sansonca: “Burro jashlinllahuanmari shuj montonta, ishqui montonta huañuchini. Burro jashlinllahuanmari huaranga runacunata huañuchini” nirca.

¹⁷Chashna nishcahuan chai pamballapitaj chai tulluta shitashpami, chai pambataca, Ramat-lehita shutichirca.

¹⁸Sansonca yallitaj yacunaihuan cashpami, Mandaj Diostaca: “Canca cambajta ruraj runata mishachishpamari jatun quishpirinata cushcangui. Chashna cashca jahua yacunaihuan huañucushpa circuncisionta mana rurashcacunapaj maquipi japitucuchun ama saquihuaichu” nishpami mañarca.

¹⁹Chaimi Jatun Diosca, Lehipi caj jutcuta pascajpi yacu llujshijpi, Sansonca chai yacuta ubyashpa, cutinllataj fuerzata japirca. Chaimantami Lehipi cunancama caj pugyutaca, En-hacoreta shutichirca.

²⁰Sansonca filisteocuna mandacui punllacunapica, ishqui chunga huatacunatami israelcunata mandarca.