Read Chimborazo Highland Quichua JUECES 17 Bible Online

JUECES 17 - Chimborazo Highland Quichua bible

JUECES 17

¹Efraín urcupimi, Micaía runaca causarca.

²Paimi paipaj mamataca. — Cambaj 1.100 siclo cullquita shuhuajtaca ima llaquipish tucushca alli canman nircanimi nishpami ñucamanca huillarcangui. Chai cullquitaca ñucamari charicuni. Ñucami japircani — nijpimi paipaj mamaca: — ¡Ñuca huahualla, Mandaj Dios cantaca alli nishca cachun! — nirca.

³1.100 siclo cullquita tigrachijpimi chai mamaca: — Ñuca huahualla, cai cullquitaca cambajllataj shuj caspi diosta rurachishpa, chai cullquita yacuyachishpa chai jahuata llihuingapajmi Mandaj Diospajlla ch'icanchircani. Cunanca cai cullquitaca canllamantajmi tigrachini — nirca.

⁴Chashna nijpipish, paica paipaj mamallamantaj tigrachijpimi, chai cullquimanta 200 siclo cullquita japishpa paipaj mamaca cullquita yacuyachishpa imatapish rurajman curca. Paimi caspita labrashpa chai jahuataca cullquita yacuyachishcahuan llihuishpa imamanpish rijchaj diosta rurarca. Chai diostaca, paipaj churi Micaiapaj huasipimi churarca.

⁵Micaía runaca paipaj huasipimi, dioscunapaj huasita charirca. Shuj efodta, terafín nishca dioscunatapishmi rurachirca. Chashna rurashpaca paipaj shuj churitami cura cachun churarca.

⁶Chai punllacunapica, israelpica jatun mandajca manaraj tiyarcachu. Chaimantami tucuicuna paicunapi ima shina alli cashca shina rurashpa causarcacuna.

⁷Judá llajtapi caj Belenpica, shuj mosomi tiyarca. Paica levitapurami carca. Shujtaj llajtamanta shinallami causarca.

⁸Chai runaca Judá llajtapi caj Belenmanta llujshishpami, maipi causanata japishapishchari nishpa rishpaca, Efraín urcuman chayashpa Micaiapaj huasiman chayarca.

⁹Chaipimi Micaiaca: — ¿Maimantataj shamungui? — nijpi, chai levita runaca: — Ñucaca Judá llajtapi caj Belenmantami cani, maipimi causanata japini chaipi causangapajmi mashcashpa puricuni — nirca.

¹⁰Chaimi Micaiaca: — Ñuca huasipi causai. Canca ñuca yayami tucungui. Curapishmi tucungui. Ñucaca huatantami chunga siclo cullquitapish, churanatapish, micunatapish cusha — nijpimi chai levita runaca, chaipi saquirirca.

¹¹Chashna nishcaca levitapajca allimi carca. Paica Micaiahuanmi causarca. Paica paipaj quiquin churi shinami causarca.

¹²Micaiaca levita runataca, cura cachunmi churarca. Chaimi chai mosoca curapaj ruranata rurashpa Micaiapaj huasipi causarca.

¹³Micaiaca: “Levitapuramanta shuj curatamari ñucaca charini. Mandaj Diosca tucui imapipish ñucataca allimi llujshichinga” yuyacurcami.