Read Chimborazo Highland Quichua JUECES 19 Bible Online

JUECES 19 - Chimborazo Highland Quichua bible

JUECES 19

¹Chai punllacunallatajmi israelcuna jatun mandajta manaraj charijpi shuj levita runaca shujtaj llajtamanta shamushca shinalla Efraín urcumanta carupi causarca. Chai runami, Judá llajtapi caj Belenmanta shujtaj huarmihuanpish cazararca.

²Levitapaj caishuj huarmica mana alli huarmi tucushpami paita shitashpa rirca. Chaimantaca Judá llajtapi caj Belenpi causacuj paipaj yayapaj huasiman tigrashpami chaipi chuscu quillata carca.

³Chaimantami paipaj cusaca c'uyaj shimicunata rimashpa tigrachimugringapaj catishpa rirca. Paica paipajta ruraj shuj runatapish, ishqui burrocunatapish pushashcami rirca. Paitaca chai huarmica paipaj yayapaj huasipi allimi chasquirca.

⁴Chai huarmipaj yaya ricushpaca, cushicushpa tupanaman llujshishpa chasquishpami levitapaj suegroca paitaca chaipi saquirichun nijpi, quimsa punllacunata micushpa, ubyashpa paipaj huasipi saquirirca.

⁵Chuscu punlla tucunapaj ña pacarigrijpica levita runaca utcata jatarishpa ña ri callarijpimi, chai huarmipaj yayaca paipaj yernotaca: — Ñanpi ama shaicungapaj asha tandata micushpa riyari — nijpica,

⁶ishquindijtaj tiyarishpa micurcacuna, ubyarcacuna. Chaipipish chai huarmipaj yayaca: “Cunan tutallahuan caipi cushicungapaj saquiriyari” nircami.

⁷Shina nijpipish chai levita runa ña jatarishpa rigrijpimi paipaj suegroca saquiripai nicujllapi, chai tutahuanpish chaipi saquirirca.

⁸Chuscu punllapaj cayandij tutamanta levita runa jatarishpa ña rigrijpica, chai huarmipaj yayaca: — Ñanpi ama shaicungapaj imallatapish micushpa chishillata ringui shuyayari — nijpimi, ishquindij tiyarishpa micurcacuna.

⁹Chai q'uipaca levita runaca jatarishpa paipaj caishuj huarmindij, paipajta ruraj runandij, ña rigrijpimi, chai huarmipaj yaya levitapaj suegroca: — Cunanca ñamari chishiyan, ñallamari tutayagrin. Cunan tutahuan caipi saquirishpa cushicushpa pacariyari. Caya tutamanta utcata jatarishpa, huasiman ringuillami — nirca.

¹⁰Ashtahuanpish levita runaca, chai tutaca mana chaipi pacarisha nishpami jatarishpa rircalla. Ña rishpaca paipaj caishuj huarmindij, parejashca ishqui burrocunandijmi Jebús nishca Jerusalén ch'imbapuraman chayarca.

¹¹Chashna rishpaca, Jebús pueblo c'uchullapi ña cajpi, ña punlla tutayamugrijpimi paipajta ruraj runaca: — Cai jebuseocunapaj pueblollapi cunan tutaca pacarishun — nirca.

¹²Chaimi levitaca: — “Maijan pueblomanpish mana israelcunapaj cajpica, manataj rishunchu. Gabaa puebloman jacuchijlla nishpaca cashnapishmi” nirca:

¹³Cunan tutaca Gabaa pueblopi, mana cashpaca Ramá pueblopi pacaringapaj shamuichij utca ringapaj — nirca.

¹⁴Chashna nishpa rishpaca inti huashicucuitami, Benjamín aillupaj Gabaa puebloman chayarca.

¹⁵Chai tutaca chaipi pacaringapajmi, Gabaa puebloman yaicurcacuna. Chai tuta pacarichunca pi mana paicunapaj huasiman cayajpimi, chai pueblo plazallapi tiyacurcacuna.

¹⁶Ña tucui tutayacujtami, shuj yuyaj runaca chagrapi trabajashpa tigracurca. Paica Efraín urcumanta shamushpami, Gabaa pueblopica shujtaj llajtamanta shinalla causarca. Chai llajtapi causajcunaca, Benjaminpaj aillumi carca.

¹⁷Chai yuyaj runa huichilla ricushpaca, plaza pambapi shujtaj llajtamanta shamushca runa tiyacujta ricushpami: — ¿Maimantaj ricunguichij, maimantataj shamucunguichij? — nirca.

¹⁸Chaimi chai runaca: — Judá llajtapi caj Belenmantami shamunchij. Ñucaca Efraín urcuta pasashpa ashtahuan caru urcumanmi ricuni, chaipimi causani. Judá llajtapi caj Belenpimi carcani. Cunanca Mandaj Diospaj huasimanmi ricuni. Cai pueblopi causajcuna pi mana cayajpimi caillapi tiyacuni.

¹⁹Ñucanchijca ujshatapish charinchijmi. Burrocuna micunatapish charinchijmi. Ñucapajpish cambajta ruraj ñuca huarmipajpish, cambajta ruraj ñucahuan caj ñuca huiñachishcapajpish tandata, vinota charicunchijmi. Ima mana illanchu — nirca.

²⁰Chaimi chai yuyaj runaca: — Sumaj causai canhuan cachun. Cambaj ima illajpipish ñuca ricushallami. Ashtahuanca cai plaza pamballapi ama pacaringui — nirca.

²¹Paipaj huasiman pushashpami, yuyaj runaca chai runapaj burrocunaman cararca. Paicunapaj chaquicunatapish maillarcami. Micurcacunami ubyarcacunami.

²²Paicuna cushicushpa tiyacujpimi, chai pueblopi causaj millai tauca runacuna shamushpa chai yuyaj runapaj huasi muyundijta shayarircacuna. Chaipica pungupi huajtashpami, huasiyuj yuyaj runataca: — Cambaj huasiman yaicuj runata llujshichi ñucanchij paihuan siriringapaj — nijpimi,

²³chai huasiyuj runa llujshishpaca: — Ñuca huauquicuna chai shina millaitaca amataj rurachunmi rogani. Paica ñuca huasipi pozacujllamari, chai shina millaitaca amataj ruraichijchu.

²⁴Riquichij, pi c'arihuan manaraj chayarinacushca ñuca ushushipish, cai runapaj caishuj huarmipish caipimi. Paicunata ñuca canllaman llujshichisha, paicunata japishpa cancuna munashcata ruraichijlla. Ashtahuanpish cai runataca ama chai jatun millaita ruranata yuyaichijchu — nirca.

²⁵Ashtahuanpish manataj uyashun nijpimi, chai levita runaca paipaj caishuj huarmita canllaman llujshichirca. Chai huarmita llujshichijpimi, chai runacunaca tucui tuta millaita rurashpa, ña pacarigrijpi saquircacuna.

²⁶Ña pacarigrijpimi chai huarmica paipaj cusata puzachij yuyaj runapaj huasi punguman rishpa chaipi urmashpa punllacama siricurca.

²⁷Levita runaca utca jatarishpa pai ricushcaman ringapajmi punguta pascarca. Ashtahuanpish paipaj caishuj huarmica, chai huasi pungupimi maquicunaca pungu quisyu ucuman chutashca siricushca carca.

²⁸Chaita ricushpami levitaca: — Jatari, jacu — nirca. Ashtahuanpish chai huarmica, mana rimarcachu. Chaimi chai runaca burroman apachishpa paipaj huasiman rirca.

²⁹Huasiman ña chayashpaca shuj cuchillota japishpami, chai huarmitaca, tullu mucucunapi p'itishpa chunga ishqui mirgata rurashpaca, tucui chunga ishqui aillucunapajman cacharca.

³⁰Chaita tucui ricujcunaca: — Israelcuna Egiptomanta huichiyamushca pachamanta cunancama, chai shina millaitaca manataj rurashcacunachu manataj ricushcanchijchu. Caitaca imata ruranata alli yuyarinacunami canchij — ninacurca.