Read Chimborazo Highland Quichua JUECES 2 Bible Online

JUECES 2 - Chimborazo Highland Quichua bible

JUECES 2

¹Mandaj Diospaj angelca, Gilgal pueblomanta Boquim puebloman huichi rishpami israelcunataca: “Ñucami cancunataca Egiptomanta llujshichishpa, cancunapaj ñaupa yayacunaman ñuca cushami nishca llajtaman pushamurcani. Chai punllallatajmi paicunamanca: Ñuca cancunahuan ari ninacushcataca, manataj p'aquishachu.

²Ashtahuanca cancunaca cai llajtapi causajcunahuan, imata mana ari ninacushpa, paicunapaj altarcunatapish tucui urmachinallami canguichij nircani. Ashtahuanpish cancunaca ñuca mandashcataca manamari uyashcanguichijchu. Riqui manamari chashna rurashcanguichijchu.

³Chaimanta cunanca ñucapish cai llajtapi causajcunataca cancunapaj ñaupajmanta mana anchuchishachu. Paicunaca cancunapajca huashapi macana angu shinami canga. Paicunapaj dioscunapish cancuna ñitcana rumi shinami canga” nircami.

⁴Mandaj Diospaj ángel chashna rimajpica, tucui israelcunami sinchita caparishpa huacarcacuna.

⁵Chaimantami chai pambataca, Boquim shutita shutichircacuna. Chaillapitajmi Mandaj Diosmanpish sacrificiota curcacuna.

⁶Israelcunata Josué caya minchacama nijpica, tucui aillucunami paicuna maillapi japishca allpapi causanaman tigrarcacuna.

⁷Josué causacui punllacunapica, israelcunaca Mandaj Diospajllatami rurashpa causarcacuna. Josué huañushca q'uipaca Mandaj Dios israelcunapaj imallata rurashcata ricuj Josuehuan huiñaillataj caj caishuj yuyajcuna causai punllacunacamallami Mandaj Diospajta rurashpa causarcacuna.

⁸Mandaj Diospajta ruraj Nunpaj churi Josueca, 110 huatayuj cashpami huañurca.

⁹Josuetaca, Efrainpaj urcupi caj Timnat-sera shuti pai japishca allpallapitajmi pambarcacuna. Chai allpaca Gaas urcumantaca janaj ladomanmi carca.

¹⁰Josuehuan huiñai israelcunapish huañushpami paicunapaj ñaupa yayacunahuan tandanacugrirca. Q'uipa huiñai israelcunaca Mandaj Diostaca mana rijsircacunachu. Israelcunapaj pai imalla rurashcatapish mana yacharcacunachu.

¹¹Chai q'uipaca israelcunaca Mandaj Diospaj ñaupajpica millaita rurashpami Baal dioscunapajta rurashpa causarcacuna.

¹²Chashnami paicunapaj ñaupa yayacunata Egiptomanta llujshichimuj Mandaj Diostaca saquircacuna. Paicunaca paicunapaj muyundij llajtacunapi causajcunapaj dioscunapajmanmi rircacuna. Chaicunata adorashpami Mandaj Diostaca yallitaj p'iñachircacuna.

¹³Mandaj Diosta saquishpami Baal, Astarot shuti manapish dioscunata adorarcacuna.

¹⁴Chaimantami Mandaj Diosca israelcunahuanca nina sindirij shina p'iñarishpa, shuhuacuna shamushpa tucui imalla charishcacunata quichuchun shuhuacunapaj maquipi churarca. Chai muyundij llajtacunapi causaj paicunata p'iñajcunapaj maquipipish churajpimi, paicunata p'iñajcunahuanca mana ch'imbapura shayari tucurcacuna.

¹⁵Maipi macanacungapaj llujshishpapish Mandaj Dios paicunata nishca shinallataj paipaj maqui paicunata llaquichicujpimi, paicunata p'iñajcunataca manataj mishai tucurcacuna. Mandaj Diosca pai nishca shinallataj manataj mishachijpimi, israelcunaca jatun llaquita apacurcalla.

¹⁶Mandaj Diosca paicunata llaquichijcunapaj maquimanta quishpichichunca juezcunatami churarca.

¹⁷Israelcunaca Mandaj Dios churashca juezcunatapish mana cazushpami, manapish dioscunata catinata mana saquishpa chaicunata adorarcacuna. Chashnami paicunapaj yayacuna Mandaj Diospaj mandashcacunata cazucushca ñanmantaca utca anchurircacuna. Paicunapaj yayacuna rurashca shinaca mana rurarcacunachu.

¹⁸Mandaj Diosca juezcunata churashpaca maijan jueztami pai churan chaihuanmi carca. Chaimantami chai juez pushacui punllacunapica, israelcunata p'iñajcunapaj maquimantaca quishpichij carca. Paicunata llaquichijcuna llaquichicujpi llaquihuan cashpa aij nishcacunata uyashpami, paicunata llaquina yuyai tucushpa juezta churashpa Mandaj Diosca quishpichirca.

¹⁹Mandaj Dios churashca juez huañujpica, millaita ruranaman tigrarcallacunami. Manapish dios cajcunata catishpa, chaicunapajta rurashpa paicunapaj ñaupajpi cungurishpami, paicunapaj yayacunatapish yalli millaita rurarcacuna. Chai dioscunapajta ruranamanta, chai mana alli ñanmantaca manataj anchusha nircacunachu.

²⁰Chaimantami Mandaj Diosca tucui israelcunahuanca nina sindirij shina yallitaj p'iñarishpa cashna nirca: “Cai gentecunaca ñucahuan, paicunapaj yayacunahuan ari ninacushpa pajtachichuntaj nishcatami mana cazuncuna. Ñuca rimashcacunatami mana uyancuna.

²¹Chaimanta ñucapish Josué causacushpa manaraj llujshichishpa cachashca llajtacunamantaca paicunapaj ñaupajmanta mana llujshichishpa cachashachu” nircami.

²²Paicunata chai llajtacunamanta mana llujshichishpa cachashpaca, Mandaj Diosca israelcunataca paicunapaj ñaupa yayacuna shina paita alli cazujta, mana cazujta ricungapajmi manaraj llujshichishpa cacharca.

²³Chaipajmi Mandaj Diosca, chai llajtapi causajcunataca Josuellataj tucuita llujshichishpa cachachunca mana paipaj maquipi churarca.