Read Chimborazo Highland Quichua JUECES 3 Bible Online

JUECES 3 - Chimborazo Highland Quichua bible

JUECES 3

¹Canaanta japingapaj israelcuna macanacucujpi manaraj huacharishca israelcunata cazujta mana cazujta ricungapajmi Mandaj Diosllataj paicunataca saquirca.

²Macanacuipi nunca mana caj q'uipa huiñai israelcuna ima shina macanacunata yachachunpishmi saquircaraj. Chai llajtacunaca caicunami:

³Filisteocunata pichca jatun mandajcuna, tucui cananeocuna, sidoniocuna, Lívano urcupi causaj heveocunapishmi carca. Paicunaca Baal-hermón urcumantaca, Hamatman rinacamami causarcacuna.

⁴Israelcunataca paicunapaj yayacunaman Moisesta huillachishca pai mandashcacunata cazujta, mana cazujta ricungapajmi chai gentecunataca chaillapitaj saquirca.

⁵Chashnami israelcunaca cananeocunahuan, heteocunahuan, amorreocunahuan, ferezeocunahuan, heveocunahuan, jebuseocunahuan chagru causarcacuna.

⁶Israelcunaca mana israelcunapaj ushushicunatapishmi paicunapaj huarmi cachun japircacuna. Paicunapaj ushushicunatapish mana israelcunapaj churicunamanmi curcacuna. Chashna rurashpaca mana israelcunapaj dioscunapajtapishmi rurarcacuna.

⁷Israelcunaca Mandaj Diospaj ñaupajpica millaita rurashpami, paicunata Mandaj Diostaca cungarircacuna. Baal dioscunatapish, Asera huarmi diosman rijchajta rurashca dioscunapajtapish rurashpami causarcacuna.

⁸Chaimantami Mandaj Diosca israelcunahuanca nina sindirij shina yallitaj p'iñarishpa, Mesopotamia llajtata jatun mandaj Cusan-risataimpaj maquipi churarca. Israelcunaca pusaj huatatami chai mandajpajta rurashpa causarcacuna.

⁹Chaipi llaquita apacushpami, israelcunaca Mandaj Diosta caparishpa mañarcacuna. Chaimi Mandaj Diosca paicunata llujshichichunca shuj pushajta churashpa chai llaquimanta llujshichirca. Chai runaca Calebpaj q'uipa huauqui Cenazpaj churi Otonielmi carca.

¹⁰Otonielca Mandaj Diospaj Espíritu paipaj jahuaman shamujpimi, israelcunapaj juez tucurca. Pai macanacunaman llujshijpica Siria llajtata jatun mandaj Cusan-risataimtaca Otonielpaj maquipimi Mandaj Diosca churarca. Chaimi Otonielca Cusan-risataimtaca misharca.

¹¹Otoniel mandacui chuscu chunga huatacunataca israelcunaca sumajtami causarcacuna. Chai q'uipami Cenazpaj churi Otonielca huañurca.

¹²Israelcunaca cutinllatajmi Mandaj Diospaj ñaupajpi millaita rurarcacuna. Paicuna Mandaj Diospaj ñaupajpi millaita rurashcamantaca, Moab llajtata jatun mandaj Eglontami israelcunata llaquichichun paicunata yalli c'ari c'arita Mandaj Diosca rurarca.

¹³Chaimi Moab llajtata jatun mandajca Amón llajtahuan, Amalec llajtahuan tandanacushpa shamushpaca, israelcunata huañuchishpa Palmera yuracuna tiyan pueblota quichurcacuna.

¹⁴Chaimi israelcunaca chunga pusaj huatacunata, Moab llajtata jatun mandaj Eglonpajta rurashpa causarcacuna.

¹⁵Chaipi llaquita apacushpami, israelcunaca Mandaj Diosta caparishpa mañarcacuna. Mandaj Diosca paicunata llujshichichunca Benjamín aillumanta Gerapaj churi Aodtami agllarca. Aodca lluquimi carca. Israelcunaca Moab llajtata jatun mandaj Eglonman convidanata cugrichunmi Aodta cacharcacuna.

¹⁶Aodca, ishqui filoyuj chaupi metro shina suni espadatami rurashca carca. Paica churana ucupi chumbillirishpami alli lado changa uripi aparca.

¹⁷Chashna rishpami Aodca, Moab llajtata jatun mandaj Eglonman convidanata curca. Eglonca gordoyashca runami carca.

¹⁸Convidanata cushca q'uipaca, Eglonca Aodtaca paihuan shamujcunandij caya minchacama nishpami cacharca.

¹⁹Chaimanta tigracushpaca rurashcalla dioscuna tiyan Gilgalman ñalla chayagricushpami, Aodca Eglonpajman tigrarca. Ña chayashpaca: — Jatun mandaj, quiquinlla yachana shuj huillanatami charini — nijpimi Eglonca, paipajta rurajcunataca upajlla canllaman llujshichij nirca.

²⁰Ña tucui llujshijpica, usia punllacunapi tiyana ucupi paicunalla saquirishpami Aodca: — Can jatun mandajmanca, Dios ima nishcatamari huillaj shamuni — nijpimi Eglonca, pai tiyanamanta jatarirca.

²¹Pai jatarijpica Aodca, alli lado changamanta lluqui maquihuan espadata surcushcahuanmi Eglonpaj huijsapi satirca.

²²Eglonca yallitaj gordoyashca cajpimi, espadata satijpica maqui lutsanandij tucui yaicurca. Chaimi Aodca espadata mana surcui tucushpa chaillapitaj saquijpi mapa llujshirca.

²³Aodca, corredorman llujshishpami, pungucunata jatun fierro aldabahuan alli churashpa llujshishpa rirca.

²⁴Ña llujshishpa rishca q'uipa jatun mandajpajta rurajcuna shamushpaca, usia punllacunapi tiyana ucupaj pungucuna huichcashca cashcata ricushpaca: “Jatun mandajca usia punllacunapi tiyana ucupi mapangapajmari huichcarishca canga” ninacurcacuna.

²⁵Ña unita shuyashca q'uipa punguta mana pascajpi caita chaita yuyacushpallami, llaveta japishpa punguta pascashpaca, jatun mandajtaca pambapi huañushca siricujta japircacuna.

²⁶Paicuna chashna uniyangacamaca Aodca utca rishpami, rurashcalla dioscuna tiyan Gilgalta pasashpa Seiratpi miticushpa quishpirirca.

²⁷Israel llajtaman chayashpaca, Aodca tucuicunata tandachingapajmi Efraín urcupi gachupi tocarca. Tucuicuna tandanacushpami chai urcumanta paihuan uriyamurca. Aodca paicunata ñaupashcami uriyamurca.

²⁸Chaipimi Aodca: “Cancunata p'iñaj moabitacunataca Mandaj Diosca cancunapaj maquipimari churashca. Ñucata catishpa jacuchijlla” nirca. Paicunaca Aodta catishpa rishpami, Jordán yacuta ch'imbanallapi junda shayarishpa, moabitacunataca shujllatapish ch'imbachun mana saquircacuna.

²⁹Chaipimi moabitacunataca 10.000 runacunata huañuchircacuna. Paicunaca c'ari c'aricuna, alli macanacunata yachajcuna cashpapish shujllapish mana quishpirircacunachu.

³⁰Chashnami moabitacunaca israelcunapaj maquipi ñapish urmarcacuna. Chaimantaca israelcunapaj llajtapica pusaj chunga huatacunatami sumaj causai tiyarca.

³¹Aodpaj q'uipaca, Anatpaj churi Samgarmi israelcunapaj juez tucurca. Paimi filisteocunataca huagracunata tujsina garrochahuan, 600 runacunata huañuchirca. Chashnami paipish israelcuna llaquita apacushcamantaca quishpichirca.