Read Chimborazo Highland Quichua JUECES 5 Bible Online

JUECES 5 - Chimborazo Highland Quichua bible

JUECES 5

¹Chai macanacuita mishashca punllami Débora huarmihuan, Abinoampaj churi Barac runahuanca cashna cantarcacuna:

²“Israelcunata pushajcunata macanacuiman puntapi richun Mandaj Dios churashcamanta, tucui israelcunapish paicunapaj munaimanta macanacuiman llujshishcamanta, Mandaj Diostaca tucuicuna alabaichij.

³¡Uyaichij jatun mandajcuna! ¡Uyaichij, llajtata mandajcuna! Ñucami Mandaj Diosta cantagrini. Israelcunapaj Mandaj Diostaca cuerdayuj tocanacunapi tocashpami cantagrini. Paica israelcunapaj Diosmi.

⁴Mandaj Dioslla, Seir urcumanta can llujshijpica, Edom pambamanta can rijpica, allpaca chujchurcami. Jahua pachamantaca yacumi shuturca. Jahua pacha p'uyumantaca tamyarcami.

⁵Mandaj Diospaj ñaupajpica urcucunapish chujchurcamari. Israelcunata Mandaj Diospaj ñaupajpica, Sinaí urcupish chujchurcamari.

⁶Anat runapaj churi Samgar causai punllacunapish, Jael huarmi causai punllacunapish ñancunaca shitashcami saquirirca. Chai ñanta purijcunaca, chaqui ñancunatami rijcuna carca.

⁷Israelca urmarcamari. Tarpuna allpacunaca shitashcamari saquirirca. Débora huarmi shayaringacamami chashna carca. Israelcunapajca mama shinami shayarircani.

⁸Tucuicuna shujtaj dioscunata catishcamantaca. Macanacuica pungullapi shina mana illarcachu. 40.000 israelcunapica ¿shuj escudollatapish, shuj lanzallatapish ricushcanguichijchu?

⁹Israelcunata mandajcuna, ñuca shunguca cancunahuanmi. Quiquin munaimanta macanacuiman llujshijcuna ñuca shunguca cancunahuanmi. Mandaj Diostaca alabaichij.

¹⁰Yuraj burrocunapi tiyarishca purijcunapish, llaquicunata allichijcunapish, maimanpish chaquillahuan purijcunapish Mandaj Diosta alabaichij.

¹¹Arcoyujcuna bullacushca chingarishcataca, animalcunaman yacuta ubyachina pugyucunapi huillaichij. Chaitaca Mandaj Dios mishachijpi mishashcata cutin cutin huillaichij. Israelcuna mishashcataca tucui uchilla pueblocunapipish huillaichij. Chaimi Mandaj Diospaj israelcunaca paipaj huasi punguman shamungacuna.

¹²Rijchariyari, jatariyari, Débora. Rijchariyari, jatariyari, cantota cantayari. Abinoampaj churi Barac, jatariyari. Prezucunata pushayari.

¹³Tucui alli nishcacunapish rircacunami. Mandaj Diospaj israelcunaca Mandaj Diosmanta jatun tucushcacunahuan macanacungapajmi rirca.

¹⁴Amalecpi causaj Efrainpaj aillupish shamurcacunami. Benjaminpaj ailluta mandajpish tucui paipajcunandijmi canta catishpa shamurcacuna. Maquirpaj ailluta mandajcunapish uriyamurcacunami. Zabulonpaj aillupish mandana varata charijcunami shamurcacuna.

¹⁵Isacarpaj ailluta pushajcunapish Deborahuanmi rircacuna. Isacarpaj aillupish Barac shinallatajmi rirca. Chaquillahuan rishpami pugru pambaman chayarca. Rubenpaj aillupurapica jatun yuyarinacuimi tiyarca.

¹⁶Rubenpaj aillu, ¿ima nishpataj oveja corralpi saquirircanguichij? ¿Oveja canlla huacashcata uyangapajchu saquirircangui? Rubenpaj ailluca, achca jatun runacuna cashpapish manchacujcunamari.

¹⁷Galaadpi causajcunapish Jordán yacu ch'imbanijpimi saquirircacuna. Danpaj ailluca ¿ima nishpataj barcocuna c'uchullapi carca? Aserpaj aillupish mama cucha c'uchullapimi saquirirca. Barcocuna shayarinallapimi carca.

¹⁸Zabulonpaj ailluca huañungapajpish rircallami. Neftalipaj aillupish jatun urcucunaman rircallami.

¹⁹Jatun mandajcuna shamushpami macanacurcacuna. Canaanta jatun mandajcuna shamushpami macanacurcacuna. Meguido yacu c'uchullapi caj Taanacpimi macanacurcacuna. Chai macanacuipica, ima cullquita mana japishpami tigrarcacuna.

²⁰Jahua pachamanta luzerocunapish macanacurcami. Luzerocunapish paicuna tiyanamantami Sisarahuan macanacurca.

²¹Cisón jatun yacu, ñaupamanta tiyaj yacu. P'iñajcunataca p'ichajtami aparcangui. Ñuca almalla ama manchashpa rishun.

²²Caballocunapish sillucuna t'alaj t'alajmi callparcacuna. C'ari c'ari soldadocuna tiyarishpa rijpimi, chashna uyarirca.

²³Mandaj Diospaj angelca: “Meroz llajtataca llaqui tucushca canman nichij. Chaipi causajcunataca jatunta llaquichishcataj cachun nichij. Paicunallatajmi Mandaj Diospaj soldadocunataca mana ayudarca. C'ari c'ari tucushcacunahuan Mandaj Diospaj soldadocuna macanacucujpi mana ayudarcachu” nircami.

²⁴Tucui huarmicunapurapica Jael huarmica alli nishca cachun. Paica Ceneocunapura Heberpaj huarmimi. Carpa huasipi caj tucui huarmicunapurapipish Jael huarmica alli nishca cachun.

²⁵Sísara runaca yacutami mañarca, Jael huarmica lechetami curca. Alli nishcacunaman carana tasapimi lecheta curca.

²⁶Maquita chutashpaca ishtacatami japirca. Alli maquihuanca, trabajajcunapaj tacana mazotami japirca. Chaihuanca Sisarapaj umapimi tacarca. Rinrin quinripi tacashpami, caishuj ladoman pasachirca.

²⁷Sísara runaca Jaelpaj ñaupajpimi nanaihuan curpayaricurca. Chashna curpayarishpaca Jaelpaj ñaupajpimi urmarca. Pai urmashca pamballapitajmi huañurca.

²⁸Sisarapaj mamaca, ventanaman asomarishpami, ventanata tapangapaj churashca caspicuna huashaman shayarishpaca: ¿Ima nishpashi paipaj carroca mana utca chayamun? Macanacungapaj pai charishca alli carroca ¿ima nishpashi yalli uniyan? nishpami caparirca.

²⁹Chaimi chaipi caj yachaisapa huarmicunapish, paipaj mamallatajpish:

³⁰¿Manachu macanacuipi imalla japishcacunata chaupinacucunga? Macanacuita mishajcunaca shuj shuj solteracunatachari mana cashpaca ishqui ishquitachari chaupinacucuncuna. Tucui laya coloryuj sumaj churanacunatachari Sisaramanca cucuncuna. Macanacuita mishashpa imallata japijcunata mandajcunamanca coloryuj churanata, ishquindij ladoman bordashca cungallinatachari cucuncuna ninacucurcacunami.

³¹Mandaj Dioslla, canta p'iñajcunaca tucuicuna chingarishca cachun. Canta c'uyajcunaca achijlla inti llujshicuj shina ashtahuan achijyachicuj cachun” nishpami cantarcacuna. Israelcunapajca, chuscu chunga huatacunatami sumaj causai tiyarca.