Read Chimborazo Highland Quichua 2 JUAN 1 Bible Online

2 JUAN 1 - Chimborazo Highland Quichua bible

2 JUAN 1

¹Cunaj yuyaj ñucami Dios agllashca huarmiman, paipaj huahuacunamanpish quillcani. Ñucaca cancunataca tucui shunguhuantajmi c'uyani. Mana ñucallachu c'uyani, ashtahuanpish mana llullata tucui rijsijcunapishmi c'uyancuna.

²Mana llullata ñucanchij shungupi charishcamantami c'uyanchij. Chai c'uyaica huiñaipajmi ñucanchijhuan canga.

³Yaya Diospaj, paipaj Churi Mandaj Jesucristopaj mana c'uyaipajta c'uyaj canapish, llaquij canapish, sumaj causaipish cancunahuan cashca cachun. Yaya Diospaj Churipish, mana llullapish, c'uyaipish cancunahuan cachun.

⁴Cambaj huahuacunamanta maijancunaca mana llullata Diosmanta ñucanchij chasquishca mandashcapi nishca shina puricujta japishpaca, achcatami ñucaca cushicurcani.

⁵Cunanca huarmi caitami rogani. Mana mushuj mandashcata mandashpa shinachu quillcani. Ashtahuanpish callarimanta ña charishca mandashcallatatajmi caishuj chaishuj c'uyanacunguichij nishpa quillcani.

⁶C'uyajtajca Dios mandashcacunata cazunami. Callarimanta cancuna uyashca shinallataj Dios mandashca shina caishuj chaishuj c'uyanacushpa causanami.

⁷Cai pachapica, achca umajcunami ricurishca. Paicunaca Jesucristoca aichayuj tucushpami shamurca nishpaca, mana huillancunachu. Chashna nijcunaca umajcunami, Cristota p'iñajcunami.

⁸Cancuna trabajashcamanta japina cashcata ñataj mana japinguichijman. Ashtahuanpish tucuitataj japingapajca alli yuyaihuan caichij.

⁹Cristomanta yachachishcapi mana catirashpa maijanpish chingachijca, Diostaca mana charinchu. Cristomanta yachachishcapi maijanpish catirajmi Yayatapish, Churitapish charin.

¹⁰Maijanpish cancunapajman shamushpa, cai yachachina shinallatataj mana apamujpica, ama huasipi chasquinguichij: “¡Allimi shamushcangui!” nishpallapish ama ninguichij.

¹¹Maijanpish: “¡Allimi shamushcangui!” nijca, chai mana alli yachachijpurami tucun.

¹²Achca quillcanacunatami cancunapajca charini. Papelpi, tintallahuanca mana quillcasha ninichu. Ashtahuanpish cushicuna shinataj cancunapish ñucanchijpish ñahui ñahui parlanacushpa cushicungapajmi, cancunapajman rinata shuyacuni.

¹³Dios agllashca cambaj ñañapaj huahuacunapish, cantaca alli cashca cachun nincunami. Chashna cachun.