Read Chimborazo Highland Quichua JUDAS 1 Bible Online

JUDAS 1 - Chimborazo Highland Quichua bible

JUDAS 1

¹Jesucristopajta ruraj Judas, Jacobopaj huauquimi cani. Dios Yaya cayashpa, jucha illajta rurashpa agllashcacunamanmi quillcani: Cancunataca Jesucristomi huaquichicun.

²Cancunamanca llaquij canata, sumajta causanata, c'uyaj canatapish mirachishca cachun ninimi.

³C'uyashcacuna, cancunapish ñucapish quishpichishca cashcamantami chai quishpichishcamanta quillcana yuyai shamujpi cancunamanca quillcasha nicurcani. Crijpimi jucha illajta rurashpa shuj cutin huiñaipaj quishpichirca. Chaitaca alli macanacuj shina shungumantataj alli catichun nishpami, yuyachishpa quillcanataj cajpi quillcani.

⁴Maijancunaca ñamari ñucanchijpurapi crichingapaj pacalla yaicushcacuna. Chaicunataca Diosca ñaupamanmi jatun llaquiman rinapaj cajcunami nishca. Paicunaca Diosta mana manchajcunami. Paicunaca cacharishcacuna shina millaita rurangapajllami, Diosca mana c'uyaipajtapish c'uyajmi nij tucuncuna. Mandaj shujlla Diostapish, ñucanchijta Mandaj Jesucristotapish mana tiyanchu nincunami.

⁵Cancuna yachashca cajpipish, caitami yuyachisha nini. Jatun Diosca, Egiptomanta israelcunata llujshichishca cashpapish, paicunapurapi paita mana crijcunataca huañuchircami.

⁶Angelcunapish mandaj cachun churashcallapi mana cashun nishpa, ashtahuanpish paicuna causacunmanta anchushpa rishcamantaca Diosca jatunta llaquichina punllacamami huiñaita mana llujshipaj amsapi prezu huaquichishca.

⁷Sodoma, Gomorra pueblocunapish chai c'uchullapi caj pueblocunapish chai angelcuna shinallatajmi tucushcacuna. Paicunaca huainayana yuyaillahuan cashpami, c'aricunapurallataj, huarmicunapurallataj mana rurana cashca pinganayaj millaita rurashcacuna. Chaimantami shujtajcunapish ama paicuna shina cachun yuyachingapaj, huiñaipaj ninahuan chaicunataca llaquichishca.

⁸Llullashpa yachachijcunaca muscunchij nishpami, chaicuna shinallataj paicunapaj aichata mapayachincuna. Mandaj Jesustapish yangatami rurancuna. Jahua pacha mandajcunatapish c'amincunami.

⁹Angelcunata jatun mandaj Miguelpish, Moisespaj aichata quichunacushpa rimanacucushpapish, diablotaca llaquichishpa ima millaita mana rimashcachu. Ashtahuanpish: “Jatun Diosmi cantaca llaquichinga” nishcallami.

¹⁰Chai pandata yachachijcunaca manapish yachashcatami c'amishpa rimancuna. Shinallataj ima shina cashpa alli canata yachashca jahuami animalcuna shina yuyai illaj tucushpa quiquin munashca shina millaita rurashpa chingarinaman ricuncuna.

¹¹¡Aij, chashna rurajcunalla! Caín shinallatajmari mana allita rurashcacuna. Cullquita munashcamantaca Balaam shinallatajmari pandarishcacuna. Mana cazushcamantaca Coré shinallatajmari chingarishcacuna.

¹²Chaicunaca c'uyaimanta cancuna rurashca fiestacunapi jatun pinganayajta rurashpa cushicushpa micushpa ubyashpa mapayachijcunami. Michijcunapish paicunapaj allipajlla michijcunami. Yacu illaj p'uyuta caiman chaiman huaira apashca shinami. Cozichana punllacuna cajpipish grano illaj yuracuna shinami. Ishqui cutin huañushcacunami, sapimanta llujshichishcacunami.

¹³Paicunapaj rurashcacunaca mama cucha t'imburishpa puscuricuj shinami. Luzerocuna quiquin ñanta chingachishca shinami. Chashnacunapajca tucuita yalli huiñaipaj amsami ch'icanchishca shuyacun.

¹⁴Ñaupa yaya Adanmanta yaya Enoccamaca canchis yayacunami cashca. Enocmi Dios huillachijpi chai shina gentecunamantaca cashna nishca: “Jatun Diosca jucha illaj huaranga huaranga paipaj angelcunandij shamushpami,

¹⁵tucui paicuna imalla rurashcataca ricuchirca. Paicunamanca Diosta mana manchaj cashcamanta tucui imalla millaita rurashcacunata ima shina cashcatatajmi ricuchirca. Paita mana manchaj juchasapacuna, millai shimicunahuan paita c'amishcamantami llaquichirca” ninmi.

¹⁶Chaicunaca huashalla parlajcuna, juchachijcuna, quiquin munaita rurashpa cushicujcunami. Jatun tucushpa rimarijcuna, paicunaman imata cuchun nishpalla shujtajcunata canca allimari cangui nij tucujcunami.

¹⁷Chaimanta c'uyashcacuna, apostolcuna ñucanchijta Mandaj Jesucristomanta ñaupaman imalla nishcacunata cancunaca yuyaipi canguichij.

¹⁸Paicunaca cancunamanca: “Q'uipa punllacunapica imapish Diospajlla cajcunataca chanzata rurajcunami tiyanga. Paicunaca millai yuyaicunallahuanmi causangacuna” nishcami.

¹⁹Chaicunaca crijcunata chaupijcunami. Aicha munaillahuan jundacunami, Diospaj Espiritutaca mana charincunachu.

²⁰C'uyashcacuna, Jucha Illaj Espíritu yuyaita cushca shina Diosta mañashpa, cancuna Jesusta crishcapi sinchita catichij.

²¹Ñucanchijta Mandaj Jesucristo c'uyashpa cushca huiñai causaita shuyacushcataca pai cungacama Taita Diospaj c'uyaipi catiraichij.

²²Maijancuna caita chaita yuyacujpica, alli cringacama yachachichij.

²³Shujcunataca ninaman ricujta llujshichishpa quishpichichij. Caishujcunataca llaquijcuna caichij. Paicuna millaita rurashcacunapi mapayanataca manchaihuan caichij.

²⁴Tucuita rurai tucujca paipaj achij nicuj ñaupajpi jatunta cushicushpa ricuchingapajmi, mana urmashca ima mapa illajllata huaquichicun.

²⁵Ñucanchijta Quishpichij, pailla tucuita yachaj Diostaca Jesucristomanta cunanpish huiñai huiñaitapish jatunmari cangui, mandajmari cangui, tucuita rurai tucujmari cangui nishca cachun. Chashna cachun.