Read Chimborazo Highland Quichua APOCALIPSIS 11 Bible Online

APOCALIPSIS 11 - Chimborazo Highland Quichua bible

APOCALIPSIS 11

¹Chai q'uipaca, carrizomanta rurashca midina varata ñucaman cushpami: “Jatari, Diospaj huasitapish, altartapish midi. Chaipi mashna adoracujcunatapish yupai” nircami.

²Diospaj huasi canllataca saquilla, ama midingui. Chaitaca, mana judiocunaman cushcami. Paicunami jucha illaj pueblotaca, chuscu chunga ishqui quillacunata llaquichishpa sarungacuna.

³Chaipimi ñucamanta imallata ricushcata huillachun ishqui huillajcunata cachasha. Paicunaca llaquilla cashcata ricuchingapajmi, cañamazuta churarishca 1.260 punllacunacama ñucamanta huillangacuna.

⁴Chai huillajcunaca, cai pachata mandaj Diospaj ñaupajpi shayacuj ishqui olivocuna, ishqui candelerocunapishmi.

⁵Paicunata maijan llaquichisha nijpica, paicunapaj shimimanta nina llujshishpami, paicunata p'iñajcunataca rupachishpa chingachinga. Maijanpish llaquichisha nijca, chai shinallatajmi huañunga.

⁶Dios huillachishcata paicuna huillacui punllacunapi ama tamyachun, jahua pachata huichcai tucujcunami. Yacutapish yahuarta rurai tucujcunami. Cai pachatapish paicuna mashna cutin munashcata shujtaj shujtaj llaquicunahuan llaquichi tucujcunami.

⁷Paicuna huillanata tucuchijpica, manchanana jatun animalmi ucujta jutcumanta llujshishpa paicunahuan jatunta macanacushpa, mishashpa huañuchinga.

⁸Chai huillajcunata huañuchijpica, jatun pueblo plazapimi paicunapaj huañushca aichacunaca siricunga. Ñucanchijta Mandajtapish chai pueblollapitajmi chacatarcacuna. Chai jatun pueblopimi nishpaca Sodoma shina, Egipto shina cashcatami ricuchin.

⁹Tucui pueblopi causaj gentecuna, tucuimanta aillucuna, ch'ican ch'ican rimaita rimajcuna, tucui llajtacunapi causajcunapishmi, paicuna huañushca aichataca quimsa punlla chaupicama ricungacuna. Pambachunpish manataj saquingacunachu.

¹⁰Paicunata huañuchishcata cai pachapi causajcuna ricushpaca achcatami cushicungacuna. Chai ishqui profetacunaca, cai pachapi causajcunapajca jatunta llaquichijcunami carca. Chaimanta cushicushpami caishuj chaishujman convidanacunata cachanacungacuna.

¹¹Chashna cajpipish quimsa punlla chaupi q'uipaca, causaita cuj espirituta Dios cachajpi paicunapi yaicujpimi jatarishpa shayarircacuna. Chaita ricujcunataca, tucuicunatami jatun manchai japirca.

¹²Chai huillajcunaca: “¡Caiman huichiyaichij!” nishpa, cielomanta sinchita caparishcata uyashpami cieloman p'uyupi huichiyarcacuna. Paicuna huichiyajtaca paicunata p'iñajcunapish ricurcacunami.

¹³Chai horasllatajmi allpa chujchushpa, pamba t'imburijpi chungapi chaupishca shuj parte puebloca tucui taparirca. Chaipica 7.000 gentecunami huañurcacuna. Chaipi mana huañujcunaca, jatunta mancharishpami jahua pacha Diostaca jatunyachircacuna.

¹⁴Puntapaj q'uipa aij nicushca llaquica ñami tucurin. Chashna cajpipish, ishquipaj q'uipa aij nina llaquica ñami shamugrin.

¹⁵Sujtapaj q'uipa ángel trompetapi tocajpica, cielopica sinchita cashna caparishcami uyarirca: “Allpa pachapi mandanacunaca ñucanchij Jatun Diospaj, paipaj Churi Cristopajpishmi tucushca. Paimi huiñai huiñaita mandanga” nircami.

¹⁶Shina nijpica, Diospaj ñaupajpi caj paicunapaj tiyarinapi tiyacuj ishqui chunga chuscu ancianocunaca cungurishpa cumurishpa Diosta adorashpaca,

¹⁷cashnami nircacuna: “Tucuita Rurai Tucuj Mandaj Taita Dios, cantami pagui ninchij. Canllatajmi cunanpish, sarunpish, shamuna cajpish cangui. Cambaj tucuita rurai tucuj cashcahuanmi ña mandai callarishcangui.

¹⁸Tucui llajtapi causajcunaca p'iñarishcami, can p'iñarishpa llaquichinapish ñamari chayamushca. Huañushcacuna imallata rurashcata ricuchinapish ñamari chayamushca. Chaipimi canca, cambajta ruraj profetacunamanpish, jucha illajcunamanpish, cambaj Shutita manchajcunamanpish, uchillacunamanpish, jatuncunamanpish paicuna japina cashcataca cungui. Cai pachata chingachijcunata chingachinapish ñamari chayamushca” nircacunami.

¹⁹Chai q'uipaca, cielopica Diospaj huasimi pascarirca. Diospaj huasipica, ari ninacushca quillcata huaquichina cajonmi ricurirca. Shinallataj relampacuna, rimashcacuna, c'ulun nichijcuna, allpata chujchuchijcuna, jatun rundupishmi ricurirca.