Read Chimborazo Highland Quichua APOCALIPSIS 15 Bible Online

APOCALIPSIS 15 - Chimborazo Highland Quichua bible

APOCALIPSIS 15

¹Cielopica mana ricushca shujtaj jatun mancharinatami ricurcani: Chaipica, tucuri canchis llaquicunatami canchis angelcuna charicurcacuna. Chaicunahuanmi, Dios jatunta p'iñarishpa llaquichinaca tucurirca.

²Shinallataj ninahuan chagrushca vidrio shina mama cucha yacutapishmi ricurcani. Jatun animaltapish, chai animalman rijchajta rurashcatapish, paipaj shutita ricuchij sellota, paipaj shutipaj numerotapish mana churachishpa mishajcunatapishmi ricurcani. Paicunaca vidrio shina mama cucha c'uchupimi, Dios cushca arpacunata apashca shayacurcacuna.

³Paicunaca, Diospajta ruraj Moisespaj cantota, Ovejapaj cantotapishmi, cashna nishpa cantacurcacuna: “Tucuita Rurai Tucuj Mandaj Taita Dios, cambaj rurashcacunaca jatun sumajmari. Jucha illajcunapaj jatun mandaj. Canca imatapish cashcata ruraj, mana llullami cangui.

⁴Jatun Dioslla ¿pitaj cantaca mana manchangari? ¿Pitaj Cambaj shutitaca mana jatunyachingari? Canllamari jucha illaj cangui. Cantaca ima shina rurashca shinataj ricuchij cajtami ricushcacuna. Chaimantami tucui llajtacunamanta shamushpa adorangacuna” nircami.

⁵Chai tucuicunapaj q'uipaca, cielopica Diosta adorana huasi pascarijtami ricurcani. Chai ucupica, Dios mandashcata huaquichina Diospajlla ch'icanchishca ucumi carca.

⁶Diospaj huasimantaca, canchis angelcunami, canchis llaquicunata apashca llujshircacuna. Paicunaca chuya, achij nicuj, lino churanata churashca, curi tajalitapish tajalishcami carcacuna.

⁷Chai causacuj chuscucunamanta shujmi, canchis angelcunamanca huiñai huiñaita causacuj Dios p'iñarishpa jatunta llaquichinahuan junda canchis curi copacunata curca.

⁸Diosca tucuita rurai tucuj sumaj cashcamantaca, Diospaj huasipica cushnimi jundarca. Canchis angelcuna, canchis llaquicunata tucuchingacamami, Diospaj huasimanca pi mana yaicui tucurcacuna.