Read Chimborazo Highland Quichua APOCALIPSIS 16 Bible Online

APOCALIPSIS 16 - Chimborazo Highland Quichua bible

APOCALIPSIS 16

¹Chaipica, Diospaj huasimanta chai canchis angelcunataca: “Richij, Dios p'iñarishpa llaquichinahuan junda caj canchij copacunamanta llaquicunata allpa pachapi talligrichij” nishpa, sinchita caparijtami uyarcani.

²Shina nijpi punta ángel rishpaca allpa pachamanmi copapi tiyacuj llaquitaca tallirca. Chashna tallijpica animalpaj sellota charijcunapaj, chai animalman rijchajta rurashca animalta adorajcunapajca jatunta nanachij ashnacuj chupucunami llujshirca.

³Puntapaj q'uipa ángel jatun cucha yacucunapi, pai charicun copapi tiyacuj llaquita ña tallijpica, huañuchijpi yahuar llujshicuj shinami mama cucha yacuca yahuar tucurca. Chashna tucujpica mama cucha yacupi imalla causajcunapish tucuimi huañurcacuna.

⁴Ishquipaj q'uipa angelca jatun yacucunapi pugyu yacucunapimi pai charicun copapi tiyacuj llaquitaca tallirca. Chashna tallijpica, chai yacucunapish yahuarmi tucurca.

⁵Chai q'uipaca yacucunata mandaj ángel, cashna nicujtami uyarcani: “Jatun Dios, canca imatapish cashcata ruraj cashpami cashcata rurashpa cashna llaquichishcangui. Canca jucha illaj Diosmi cangui, cunanpish, sarunpish canllatajmi cangui.

⁶Chai llaquita apajcunaca jucha illajcunatapish, cambaj profetacunatapish yahuarta jichashpami huañuchircacuna. Chaimantami canpish paicuna chasquina cashca shinallataj yahuarta ubyachishcangui” nircami.

⁷Altar chaimantaca shujtajpish: “¡Tucuita Rurai Tucuj Mandaj Taita Dios, canca cashcatataj rurashpami llaquichingui!” nijtami uyarcani.

⁸Quimsapaj q'uipa angelca, copapi tiyacuj llaquitaca intipimi tallirca. Inti ashtahuan rupashpa gentecunata rupachichunmi chashna tallirca.

⁹Chaimi intica ashtahuan rupashpa gentecunataca rupachirca. Chashna rupachijpipish, chai tucuita llaquichi tucuj Diosta jatunyachingapajca paipajmanca mana cutirircacunachu. Ashtahuanpish paipaj shutitaca c'amircacunami.

¹⁰Chuscupaj q'uipa ángel, copapi tiyacuj llaquita jatun animalpaj jatun tiyarina jahuapimi tallijpica, jatun animal maipi mandacunmi tucui amsayarca. Chaipica tucuicunami nanaihuan, c'alluta canirircacuna.

¹¹Chashna jatun nanaihuan cashpapish, chupu ungüihuan cashpapish cielopi caj Diostaca c'amircacunami. Paicunapaj millaita ruracushcamantapish Diospajmanca mana cutirircacunachu.

¹²Pichcapaj q'uipa ángel, copapi tiyacuj llaquita, Éufrates jatun yacupimi tallijpimi, chai yacuca tucui chaquirirca. Inti llujshin ladomanta jatun mandajcuna shamunapaj, ñan allichishca cachunmi chashna tucurca.

¹³Chai q'uipaca, dragonpaj shimimanta, jatun animalpaj shimimanta, llullashpa huillajpaj shimimantapish, sapocunaman rijchaj quimsa millai espiritucuna llujshijtami ricurcani.

¹⁴Chaicunaca pi mana ruraipajta rurashpa ricuchij supaicunapaj millai espiritucunami. Paicunaca Tucuita Rurai Tucuj Diospaj jatun punllapaj tucui allpa pachapi mandajcuna macanacunaman richun tandachingapajmi chashnaca llujshircacuna.

¹⁵“Riquichij, ñucaca cancuna mana yuyashcapimi shuhua shina shamusha. Maijanpish paipaj churanata cuidarashpa ñuca shamunata chaparacujca cushijllami canga. Churanata churashca, mana lluchulla cashcamanta paipajca mana pingaichu canga”.

¹⁶Chai millai espiritucunaca, tucui jatun mandajcunatami Hebreo rimaipi Armagedón nishcaman tandachircacuna.

¹⁷Sujtapaj q'uipa ángel, copapi tiyacuj llaquita huairapimi tallijpica, cielopi caj Diospaj huasi ucupi tiyaj jatun tiyarinamantami: “¡Ñami tucuchishca!” nishpa, sinchita rimashca uyarirca.

¹⁸Chai q'uipaca, relampacunapish, huajiashcacunapish, c'ulun nishcacunapish, yallitaj allpa chujchushpa t'imburipishmi tiyarca. Chashna yallitaj allpa t'imburica gentecuna allpa pachapi causai callarimantapacha manataj tiyarcachu.

¹⁹Chashna t'imburijpica, jatun puebloca quimsapimi chaupirirca. Tucui llajtacunapi tiyaj pueblocunapish urmarcami. Chashna tucujpica jatun Babiloniamanca pai p'iñarishcahuan caj copamanta vinota ubyachinatami Diosca yuyarirca.

²⁰Chaimantami yacu chaupipi tiyaj tucui llajtacunapish, jatun urcucunapish tucui chingarirca.

²¹Chashnallatajmi cielomantaca jatun rundupish, gentecunapaj jahuapi urmarca. Chai runduca, quimsa arroba shina llashajmi carca. Runduhuan achcata llaquichijpica, gentecunaca Diosta p'iñashpami c'amircacuna. Chaipica yallitaj jatun llaquimi carca.