Read Chimborazo Highland Quichua APOCALIPSIS 17 Bible Online

APOCALIPSIS 17 - Chimborazo Highland Quichua bible

APOCALIPSIS 17

¹Chai q'uipaca canchis copacunata charicuj, canchis angelcunamanta shuj shamushpami, ñucahuan rimashpaca cashna nirca: “Achca yacucuna jahuapi tiyacuj huainayashpalla causaj huarmita ima shina jatunta llaquichina cashcata shamui ricuchisha nircami.

²Allpa pachapi jatun mandajcunaca chai huarmihuanmi huainayarcacuna. Tucui llajtapi causajcunapish chai huarmita catishpami vinota ubyashpa machaj shina huainayashpa causarcacuna” nircami.

³Chai q'uipaca ñucaca tucuipimi Diospaj Espiritulla pushashca carcani. Paimi shitashca pambaman pusharca. Chaipica canchis umayuj, chunga gachuyuj, pucanicuj jatun animalpi tiyarishca shuj huarmitami ricurcani. Chai animalca Diosta c'amishpa rimashca shuticunahuan jundami carca.

⁴Chai huarmica moradota, pucanicuj churanata churashcami carca. Shinallataj sumaj rumicunahuan, perlacunahuan curihuanpish sumajta allichirishcami carca. Maquipica, millananahuan, huainayashca mapahuan junda curi caliztami charicurca.

⁵Chai huarmica paipaj frentepica pi mana entendi tucuipaj shutita quillcashcami carca. Chaipica: “Babilonia, jatun pueblo, canca huainayashpa causajcunapaj, allpa pachapi tucui imalla millanayajta rurajcunapajpish mamami cangui” nishpa, quillcashcami carca.

⁶Chai huarmitaca, Diospajlla cajcunata huañuchishca yahuarhuan, Jesusmanta huillacushcamanta huañuchishcacunapaj yahuarhuanpish machashcatami ricurcani. Chaita ricushpaca, ñucaca achcatami mancharircani.

⁷Chaipimi ñucataca angelca: “¿Ima nishpataj mancharingui? Can ricushca huarmimantapish paita aparishca canchis umayuj, chunga gachuyuj jatun animalmantapish pi mana entendi tucushcataca cunanmi huillasha.

⁸Can ricushca jatun animalca ñaupamanca tiyarcami, cunanca ña illanmi. Chai jatun animalca jatun llaquipi chingarinaman ringapajllami ucujta jutcumanta ñalla llujshimugrin. Ñaupaman tiyaj, cunanca illaj, shamunapaj caj jatun animal cutin shamujpica, allpa pachapi causajcuna ricushpaca achcatami mancharingacuna. Chaicunaca causanaman rinapaj libropi paicunapaj shuticunata allpa pachata rurashca pachamanta mana quillcashcacunami chashna mancharingacuna” nircami.

⁹“Caica alli entendij yachaisapallami entendi tucunapajmi: Chai canchis umacunaca, canchis urcucunami. Chai urcu jahuapimi, huarmica tiyacun.

¹⁰Shinallataj chai canchis umacunaca canchis jatun mandajcunami. Chai canchis mandajcunamanta pichcaca, ñami urmarca. Shujca cunanmi mandacun, caishujca manaraj shamushcachu. Pai shamushpaca, mana unicamachu mandanga.

¹¹Ñaupaman tiyaj, cunanca ña illaj jatun animalhuanmi mandajcunaca pusaj tucunga. Canchis mandajcunahuan tandanacushca cashpapish jatun llaquipi chingarinamanmi ringa.

¹²Can ricushca chunga gachucunaca, mandanata manaraj chasquij chunga jatun mandajcunami. Chashna cashpapish paicunaca jatun animaldijmi jatun mandajcuna shina mandaj canataca shuj horaspajlla chasquinga.

¹³Chai jatun mandajcunaca tucuicuna shuj yuyailla cashcamantami paicuna imata rurai tucushcatapish mandacushcatapish jatun animalman cungacuna.

¹⁴Paicunaca Ovejahuanmi macanacunga. Ovejaca Mandajcunapajpish Mandaj, Jatun Mandajcunapajpish Jatun Mandaj cashcamantaca paimi mishanga. Paihuan cajcunapish Dios agllashpa cayashcacunami, paillapi shunguta churajcunami” nircami.

¹⁵Cha angelca caitapish nircarajmi: “Chai huainayashpa causaj huarmi tiyacuj achca yacucunaca pueblocunami, achca gentecunami, tucui llajtacunami, ch'ican ch'ican rimaita rimajcunami.

¹⁶Can ricushca jatun animalpish, chunga gachucunapish, huainayashpa causaj huarmitaca shitashca lluchullatami saquingacuna. Paipaj aichataca micungacunami, ninapi rupachingacunapishmi.

¹⁷Diosca pai rurasha nicushcata pajtachingapajmi paicunataca: Tucuicuna shuj yuyailla tucushpa, jatun animalman mandanata cuna yuyai tucuchunpish saquirca. Diospaj shimipi huillashca shina pajtangacamallami chai animalca mandanga.

¹⁸Can ricushca huarmica, allpa pachapi jatun mandajcunata, mandacuj jatun pueblomi” nircami.