Read Chimborazo Highland Quichua APOCALIPSIS 3 Bible Online

APOCALIPSIS 3 - Chimborazo Highland Quichua bible

APOCALIPSIS 3

¹Sardis pueblopi caj tandanacushca crijcunapaj angelmanpish quillcai: “Diospaj canchis Espiritutapish, canchis luzerocunatapish charijca cashnami nin: Ñucaca can imalla rurashcataca yachanimi. Causacujmi nishca cashpapish huañushcami cangui.

²Yuyaita japiyari can ima shina allita ruracushcaca manaraj tucui chiriyajpi allichiyari. Diospaj ñaupajpica can imallata rurashcacunataca manaraj allitaj tucuchishcatami ñucaca ricurcani.

³Can imalla yachashcata, uyashcataca yuyari. Cai nishcata cazushpa mana alli ruracushcata saquishpa cutiri. Mana chashna rurajpica, can mana yuyashcapimi shuhua shina cambajmanca shamusha.

⁴Shina cajpipish Sardispica, paicunapaj churanacunata mana mapayachijcunaca ashacuna tiyanmi. Yurajllata churashcacunaca paicunapaj churanata mana mapayachishcamanta ñucahuanmi puringacuna.

⁵Tucuita mishajca, yuraj churanata churachishcami canga. Paipaj shutitapish huiñaita causanapaj libromantaca mana p'ichashachu. Ñuca Yayapaj ñaupajpi, paipaj angelcunapaj ñaupajpimi paicunaca ñucapajmi nishpa huillasha.

⁶Rinrinta charijca, tandanacushca crijcunaman Diospaj Espíritu huillashcata uyachun nishpa quillcai” nircami.

⁷Filadelfia pueblopi caj tandanacushca crijcunapaj angelmanpish quillcai: “Jucha Illaj, Mana Llullajca, Davidpaj llavetami charicun. Pai pascajpica pi mana huichcai tucunchu. Pai huichcajpica pi mana pascai tucunchu. Paica caitami nin:

⁸Ñucaca, can imalla rurashcataca yachanimi. Riqui, can huillachunca pungu pascashcatami ricuchini. Chaitaca pi mana huichcai tucunchu. Canca ashalla fuerzata charishpapish ñuca yachachishca shimicunatapish allitami pajtachicungui. Ñuca shutitapish mana rijsinichu mana nishcanguichu.

⁹Maijancunaca manapish judiocuna cashpa, judiocunami canchij nishpa llullashpami Satanaspaj sinagoga tucuncuna. Paicunataca ñuca canta c'uyashcata yachachunmi cambaj ñaupajpi cungurichisha.

¹⁰Mana p'iñarij alli shungu cai nishpa ñuca mandashcatami huaquichishcangui. Chaimantami ñucapish cai pacha tucui llajtacunapi causajcuna, ima shina cashcata ricungapaj jatunta llaquichicui punllacunamantaca cantapish huaquichisha.

¹¹Ñami shamusha. Can japina coronata pi ama quichuchun, can imata charicushcataca alli charirai.

¹²Mishajtaca, ñuca Diospaj huasipaj pilartami rurasha. Chaimantaca, manataj llujshingachu. Paipica, ñuca Diospaj shutita, ñuca Diospaj pueblopaj shutitapish quillcashami. Chai puebloca jahua pacha ñuca Diospajmanta uriyamucuj mushuj Jerusalén shutimi canga. Mishajcunapica ñuca mushuj shutitapish quillcashami.

¹³Rinrinta charijca, tandanacushca crijcunaman Diospaj Espíritu huillashcata uyachun nishpa quillcai” nircami.

¹⁴Laodicea pueblopi caj tandanacushca crijcunapaj angelmanpish quillcai: “Chashna Cachun shutiyuj, cashcata huillaj, mana llullaj, Dios tucuita ruranapaj ña tiyajca, caitami nin:

¹⁵Ñucaca can imalla rurashcacunata yachanimi. Canca chiripish, rupajpish mana canguichu. ¡Chiri cashpapish chiri, rupaj cashpapish rupaj cachunmi munani!

¹⁶Chashna canapaj randica, mana yalli chiri, mana yalli rupaj, cunujlla cashcamantami cantaca shungu tigrasha.

¹⁷Canca: Achcatami charini, achcatami charijyashcani ima illaj mana canichu niricunguimi. Ashtahuanpish canca llaqui tucujlla, llaquinayaj, huajcha, mana ricuj, lluchulla cashcataca mana yachanguichu.

¹⁸Chaimantami cantaca cashna cunani. Charij casha nishpaca, ninapi rupachishca ima mapa illaj curita ñucaman randiyari. Cambaj lluchulla pinganayaj aichata taparingapajpish yurajlla churanata ñucaman randishpa churariyari. Ñahuicuna alli ricuchunpish ñahui jambita ñucaman randishpa churariyari.

¹⁹Ñucaca, ñuca c'uyashcacunatami tucuicunata sinchita rimani, llaquichini. Chaimanta mana alli ruracushcamanta cutirishpa, ñucapajlla cana yuyailla cai.

²⁰Riqui ñucaca pungupimi huasiyuj nishpa shayacuni. Maijanpish ñuca rimashcata uyashpa, punguta pascajpica, paipajman yaicushami, paihuan micushami, paipish ñucahuan micungami.

²¹Llaquicunata mishajtaca ñuca jatun tiyarinapimi, ñucahuan tiyachisha. Ñucapish mishashcamantami, ñuca Yayahuan paipaj jatun tiyarinapi tiyarircani.

²²Rinrinta charijca, tandanacushca crijcunaman Diospaj Espíritu huillashcata uyachun nishpa quillcai” nircami.