Read Chimborazo Highland Quichua APOCALIPSIS 4 Bible Online

APOCALIPSIS 4 - Chimborazo Highland Quichua bible

APOCALIPSIS 4

¹Chai q'uipaca jahua pachapica shuj pungu pascashcatami ricurcani. Trompetapi tocashca shina uyarij rimaihuan ñaupaman rimajllatajmi ñucataca: “¡Caiman huichiyamui, cunan can ricushcacuna ña pajtashca q'uipaca, imalla tucuna cashcata canman ricuchisha!” nirca.

²Chashna nincami ñucaca tucuipi Diospaj Espiritulla pushashca cashpa, jahua pachapica shuj jatun tiyarinata churashcata, chai jatun tiyarinapica shuj tiyacujtapish ricurcani.

³Chaipica jaspe, cornalina rumicunaman rijchajmi paica tiyacurca. Chai tiyacunpaj jahuataca esmeralda rumiman rijchaj cuichimi carca.

⁴Jatun tiyarina muyundijtaca, ishqui chunga chuscu tiyarinacunami tiyarca. Chaicunapica, ishqui chunga chuscu ancianocunami tiyacurca. Chai tiyacujcunaca yurajlla churanacunata churashca, umapipish curi coronacunata churashcatami ricurcani.

⁵Chai Jatun tiyarinamantaca, relampa achij nishcami llujshirca. Shinallataj c'ulun nishcacuna, huajiashcacunapishmi uyarirca. Jatun tiyarina ñaupajpica, canchis lamparacunami japichishca carca. Chaicunaca, Diospaj canchis espiritucunami.

⁶Chai jatun tiyarina ñaupajpica, mama cuchapish vidrio shina, cristalman rijchajmi carca. Chai jatun tiyarina ladopi, jatun tiyarina muyundijpipish, chuscu animalcunami ñaupajmanpish, huashamanpish ñahui luluncunalla junda carca.

⁷Puntapi caj causaiyujca leonman rijchajmi carca. Q'uipapi caj causaiyujca malta huagraman rijchajmi carca. Chaipaj q'uipa caj causaiyujca gente ñahui shinami carca. Quimsapaj q'uipa caj causaiyujca jatarishpa rij águila shinami carca.

⁸Chai causaiyuj chuscucunaca, tucuicunami sujta alascunata charircacuna. Chai alas jahuapipish, ucupipish ñahui luluncunahuan jundami carca. Paicunaca punllapish, tutapish mana samashpami: “¡Jucha illaj, jucha illaj, jucha illajca Jatun Diosmi. Tucuita Rurai Tucuj Taita Diosmi. Paica sarunpish, cunanpish paillatajmi. Paillatajmi shamunga!” nicurcallacuna.

⁹Jatun tiyarinapi tiyacuj huiñaita causacujta chai causaiyujcuna jatunmari cangui, allimari cangui nishpa, pagui nijpica, cada chashna nishcatami,

¹⁰ishqui chunga chuscu ancianocunapish, jatun tiyarinapi tiyacujpaj ñaupajpi cungurishpa, huiñai huiñaita causacujta adorarcacuna. Paicunapaj coronacunatapish jatun tiyarina ñaupajpi churashpami:

¹¹“Jatun Dios, canca jatunmari cangui, allimari cangui, Tucuita rurai tucujmari cangui nishcataca chasquipaj allimari cangui. Canmari tucui ima tiyajtapish rurashcangui. Can munashpa rurashcamantami tucui imapish tiyan” nicurcacunami.