Read Chimborazo Highland Quichua RUT 2 Bible Online

RUT 2 - Chimborazo Highland Quichua bible

RUT 2

¹Noemipajca paipaj huañuj cusa Elimelecpaj familiapuramanta achcata charij Booz shuti runami Belenpica causarca.

²Ña chaipi cashpami shuj punllaca Rutca, paipaj suegra Noemitaca: — Maijancuna cozichacunpi ch'alagrisha. Paicuna llaquishpa ch'alachun saquingapishchari, cachahuai — nijpi, paipaj suegraca: — Rilla huahua — nirca.

³Cozichacunman ña chayashpaca cozichajcunapaj huashata catishpami cebadata ch'alai callarirca. Chai chagrayujca, Elimelecpaj familiapura Booz shuti runami cashca carca.

⁴Belenmanta Booz paipaj chagraman rishpaca, cozichajcunataca: — Mandaj Dios cancunahuan cachun — nijpi cozichajcunapish: — Mandaj Diosca canhuanpish cachun — nircacuna.

⁵Chai q'uipami Boozca, paipajta ruraj cozichajcunata mandajtaca: — Chai ch'alacuj solteraca ¿pipaj ushushitaj? — nishpa tapujpi,

⁶cozichajcunata mandajca: — Chai huarmica moabitami. Paica Noemí Moabmanta tigramucujpimi paihuan shamushca.

⁷Paica “Ñucataca cozichajcunata catishpa gavillacuna chaupita purishpa cebadata ch'alangapaj saquihuai” nishpami, paica chayamushca pachamanta ashallatapish mana samashpa tutamantamanta cunancama ch'alacunlla — nirca.

⁸Chaimi Boozca, Ruttaca: — Huahua ñuca nishcata uyai. Shujtajcunapajmanca ama ringui. Chaicunapi ch'alanamanpish ama ringui. Ñucapajta ruraj huarmicunahuan caipi canguilla.

⁹Cozichajcuna maipimi cozichacun, chaiman rishpa paicunata catishpa ch'alagri. Ñucapajta rurajcunataca canta ama imata nichunmi ña mandarcani. Can yacunachishpaca, ñucapajta rurajcuna llujshichimushca yacuhuan tiyacuj puñucunamanta japishpa ubyagringuilla — nirca.

¹⁰Chaimi Rutca Boozpaj ñaupajpi cungurishpa pambacama cumurishpaca: — Ñucaca shujtaj llajtamantami cani. ¿Ima shinachari cambaj ñahuipica alli ricurishcani? — nijpimi,

¹¹Boozca: — Cambaj cusa huañujpipish, cambaj suegrata llaquishpa paipaj imallata rurashcataca yachanimi. Cambaj yaya mamatapish, can huacharishca llajtatapish saquishpa, can mana rijsishca llajtapi causanamanmi shamushcangui.

¹²Can chashna allicunata rurashcamantaca, Mandaj Diosmi canmanca allicunata cunga. Israelcunata Mandaj Dios paipaj alas ucupi canta huaquichichunmi mashcaj shamushcangui. Paimi tucui imalla cuna cashcataca cunga — nirca.

¹³Chaimi Rutca: — Ñuca amito, ñucaca cambajta ruraj maijan shuj huarmi shinallapish mana canichu. Chashna cajpipish can alli cashcata ricuchishpami, cambajta ruraj ñucataca sumaj shimicunahuan rimashpa ñuca shungutaca cushichingui — nirca.

¹⁴Boozca, micuna horaspish Ruttaca: — Caiman shamui, tandata vinagrepi satishpa micui — nijpica micungapajpish cozichajcunahuanmi tiyarirca. Chaipica llullu grano camchata carajpi, mana nijtami micurca. Puchushcatapish huanllarcami.

¹⁵Micushca q'uipa Rut ch'alanaman rijpica, Boozca paipajta rurajcunataca: — Gavillacunamanta japijpipish mitsashpa ama pingachinguichij.

¹⁶Pai ch'alachunca cancuna c'uchucushpapish asha ashata urmachinguichij. Ñataj mitsashpa llaquichinguichijman — nishpami mandarca.

¹⁷Rutca chai cozichapica, tutayangacamami ch'alacurcalla. Pai ch'alashca cebadata huajtajpica, shuj efami llujshirca.

¹⁸Chai ch'ala cebadata aparishpami, paicuna causacun puebloman rishpa, paipaj suegraman curca. Chai q'uipaca chaupi punllapi carashcata mana nijta micushpa huanllashcatapish llujshichishpami curca.

¹⁹Chaita japishpami Noemica: — ¿Maipitaj cai tucuita ch'alashpa trabajamunguiyari? Cashna ch'alachij runataca Dios alli nishca cachun — nijpimi Rutca, paipaj suegramanca maipi ch'alamushcata parlashpaca: — Ñucaca Boozpaj cozichapimi ch'alamuni — nirca.

²⁰Chaimi Noemica, paipaj nuerataca: — Paica, Mandaj Dios alli nishcami. Ñucanchij huañujcunapurapajpish allita rurajmi carca. Chashnallatajmi ñucanchij causajcunapajpish allita rurashpa ricuchishca. Noemica cashnapish nircami: — Chai runaca ñucanchij familiamari. Paica ñucanchijpajca allita ruranallatatajmi charin — nirca.

²¹Moabmanta Rutpish: — Chai runaca ñuca cozicha tucuringacama, ñucapajta ruraj huarmicunahuan caipi canguilla nircapishmari — nircami.

²²Chaimi Noemica paipaj nuerataca: — Ñuca huahualla, shujtajcunapajpi ch'alagrinapaj randica, Booz runapajllapi paipajta ruraj huarmicunahuan ch'alagrinami alli canga — nijpimi,

²³Rutca, Boozpajta ruraj huarmicunallahuan cozicha tucuringacama cebadatapish, trigotapish ch'alashpa purirca. Paipaj suegrahuan causacui punllacunapimi chashna purirca.