Read Chimborazo Highland Quichua RUT 3 Bible Online

RUT 3 - Chimborazo Highland Quichua bible

RUT 3

¹Shuj punllami Rutpaj suegra Noemica: — Ñuca huahualla, can shuj huasi ucu familiayuj tucushpa cushicushpa causachun cambaj cusa cachun mashcanami cani.

²Riqui, Boozca ñucanchij familiamari. Canca paipajta rurajcunahuanmi ch'alashpa puricurcangui. Paica cunan tutami era patiopi cebadata huairachinga.

³Canca armashpa, mishquijllata ashnacujta churarishpa, cambaj sumaj churanacunatapish churarishpa pai huairachicunman ri. Chaiman chayashpaca Booz tucui micungacama, tucui ubyangacamaca ama paipi ricurishpa shuyanguilla.

⁴Pai maipi dormij siririjta alli chaparashpa, pai siricunman rishpa, paipaj chaquillapi c'atata alzashpa allijlla siriringui. Chaipimi can imata rurana cashcataca paillataj huillanga — nirca.

⁵Chaimi Rutca: — Can imalla mandashcata rurashallami — nishpaca,

⁶Booz runapaj era patioman rishpa paipaj suegra ima shinalla mandashcata chashnataj rurarca.

⁷Boozca ña tucui micushpa ubyashpa paipaj shungupi cushicuihuan cashpa cebada montón huashapi dormingapaj siririjpimi, Rutca allijlla rishpa Boozpaj chaqui c'atata allijlla alzashpa siririrca.

⁸Boozca chaupi tutata rijcharishpami, caishuj ladoman muyuricushpaca paipaj chaquipi shuj huarmi siricujta ricushpaca,

⁹— ¿Pitaj canguiyari? — nishpa tapujpi, chai huarmica: — Ñucaca cambajta ruraj Rutmi cani. Canca c'uchulla familia cashcamanta cambajta ruraj ñucataca cambaj c'atahuan c'atahuayari — nirca.

¹⁰Boozca chashna nijta uyashpaca: — Canca cambaj suegrahuantaj shamushpaca achca allitami rurarcangui. Cunancarin charij cachun, huajcha cachun shujtaj q'uipa huiñaicunata mana mashcashpa ñucahuantaj cazarasha nishpaca, ashtahuan allitamari rurangui. Ñuca huahualla Mandaj Dios can yuyashca shinata rurachun.

¹¹Cunanca ñuca huahualla, ama manchaichu. Ñuca pueblopi causajcunaca tucuicunami canca yuyaisapa alli huarmi cashcata yachancuna. Chaimanta ñucaca tucui can ima nishcatami rurasha.

¹²Ñuca cambaj c'uchulla familia cashcamanta cambaj allita rurana cajpipish, cambajca shujtaj ashtahuan c'uchulla familia tiyanrajmi.

¹³Cunan tutaca caipi pacarilla. Caya punllami cambaj c'uchulla familia cambaj allita rurasha nishcata, mana rurasha nishcata tapusha. Cambaj allita pai mana rurasha nijpica, Mandaj Diospish ricucunpimi, cambaj allita rurangapaj ari nisha. Cunanca pacaringacama caipi samarilla — nirca.

¹⁴Rutca Boozpaj chaquipimi dormishpa pacarirca. Boozca, paipajman shuj huarmi shamushcata ama pi yachachun nishpami paitaca: — Utca jatarishpa ringui — nishcamanta Rutca pi ama ricuchun manaraj pacarijpi jatarishpa rirca.

¹⁵Pai ña rigrijpimi, Boozca Ruttaca: — Asha cebadata aparishpa ringui, cambaj p'achallishcata surcushpa tindishpa ricuchi — nishpaca sujta taza cebadata churashpa apachishpa cachajpica, pai causacushca pueblollamantaj tigrarcallami.

¹⁶Paipaj suegrapajman chayajpica: — ¿Ima nintaj, huahua? — nijpi Rutca, Booz runapajman ima shina chayashcata, chai runa paipaj imallata rurashcata tucuita parlarca.

¹⁷Cashnapishmi nirca: — “Cambaj suegrapajmanca, imataj chushajllaca tigranguiyari” nishpami, sujta taza cebadata apachishpa cachan — nirca.

¹⁸Chaimi Noemica: — Shinashpaca huahua, imalla rurana cashcata tucuchingacama shuyailla. Chai runaca pai imallata rurasha nishcataca cunanllatajmi mana samarishpa tucuita allichinga — nirca.