Read Chimborazo Highland Quichua RUT 4 Bible Online

RUT 4 - Chimborazo Highland Quichua bible

RUT 4

¹Chai punllallatajmi Boozca, Belenman rishpa, chai puebloman yaicuna pungupi tiyarirca. Booz runa chaipi tiyacujpimi, pai tapusha nicushca familia runa chaita pasacujpi Boozca chai runataca: — Jala tiyito uyai, caillapi tiyaripai — nijpi, chai runaca chaiman rishpa tiyarirca.

²Boozca chai pueblopi causajcunapaj chunga cunaj yuyajcunata cayamushpami, caipi tiyaripaichij nirca. Paicuna chaipi tiyarijpica,

³pai tapusha nicushca familia runataca: — Moabmanta tigramuj Noemica, ñucanchij familia Elimelecpaj asha allpatami c'atucun.

⁴Chaitami caipi tucui tiyacujcunapaj ñaupajpi, ñuca pueblopaj cunaj yuyajcunapaj ñaupajpi can randichun yachaj chayachini. Can randisha nishpaca randi. Mana randisha nishpapish mana randinichu nishpa ñucaman huillapai. Shujtaj randinapajca pi mana tiyanchu. Canllami randi tucungui. Can mana randijpica ñucami randi tucuni — nijpi chai runaca: — Ari randishami — nirca.

⁵Chaimi Boozca: — Noemipaj allpata randishpaca, Moabmanta caj viuda Ruthuanpishmi chai punllallataj cazarana cangui. Chai huarmihuan cazarashpa huahuacunata charijpimi, Rutpaj ñaupa cusa japina cashca allpataca chai huahuacuna japinga — nirca.

⁶Chaimi chai familia runaca: — Chai allpa mana ñucapajtaj cana cajpica, mana randisha ninichu. Ñuca huahuacuna japina cashcata ama chingachingapaj ñuca randina cashcataca, can randilla — nirca.

⁷Israelcunapurapica, ñaupa punllamantami shuj ricuchinata charircacuna. Maijanpish paipaj japina cashcata, mana cashpaca randina cashcata mana nishcata ricuchingapajca, paipaj pargateta llujshichishpami caishuj randisha nicujman cuna carca. Pai mana nishcata ricuchingapajmi Israelpica chashna ruraj carca.

⁸Chaimi c'uchulla familia runaca ñucaca mana randinichu, can randilla nishpa paipaj pargateta surcushpa Boozman curca.

⁹Chaipimi Boozca cunaj yuyajcunatapish, chaipi caj tucuicunatapish cashna nirca: — Tucui cancunami ricucunguichij. Elimelecpaj, Mahlonpaj, Quelionpaj tucui imalla tiyashcataca Noemiman randishpami ñucaca japigrini.

¹⁰Mahlonpaj huarmi cashca Moabmanta caj Ruttapish ñuca huarmi cachunmi japini. Chai huarmipi huahuacunata charijpimi, Mahlón imallata japina cashcataca paicuna japijpi, paipaj familiapurapipish cai pueblo pungupi cajcunapajpipish paipaj shutica mana anchuchishca canga. Cunanca tucui caicunataca cancunami uyajcuna ricujcuna canguichij — nircami.

¹¹Chai pueblo pungupi caj cunaj yuyajcunahuan cajcunapish cashnami nircacuna: — Ari, uyajcuna ricujcunami canchij. Diosca Raquelman Leaman achca huahuacunata cujpimi, israelcunaca achcata mirarishcanchij. Chai shinallataj cambaj huarmi Rutmanpish achca huahuacunata cushca alli canman. Efrata nishca Belenpica cantaca tucuicuna alli nishca, achcata charij runami nishca cachun.

¹²Judapaj huarmi Tamarpaj churi Faresta achca huahuacunayujta rurashca shinallataj canmanpish Mandaj Dios cujpica, Ruthuanca achca huahuacunayuj tucushca alli canguiman — nircacunami.

¹³Chashnami Boozca Ruttaca paipaj huarmi cachun japishpa cazararca. Booz paipi chayarijpica, Mandaj Dios cujpimi, chichushpa shuj c'ari huahuata huacharca.

¹⁴Chai llajta huarmicunapish Noemitaca: — Canta cuidangapaj huacharishca nietota cuj Mandaj Diostaca allimari cangui nicunchijmi. Cai huahuaca israelcunapurapica tucuicuna rijsishca, alli nishca cachun ninchijmi.

¹⁵Cai huahuami cambaj alma llaquihuan huañucujtaca cushichinga. Can yuyaj cajpipish, paimi cuidanga. Cambaj nueraca canta c'uyashcamantami cai huahuataca huachashca. Paica can canchis churicunata charishcatapish ashtahuan yalli allimari — nircacunami.

¹⁶Noemica chai huahuata japishpaca, paipaj rigrapimi huiñachirca. Paimi huiñachij mama tucurca.

¹⁷Chaimi c'uchullapi causajcunaca: — Noemica shuj c'ari huahuatami huachashca — nishpa chai huahuataca Obed shutita shutichircacuna. Paica Isaipaj yaya, Davidpaj abuelomi carca.

¹⁸Farespaj huahua huahuacunaca caicunami: Farespaj huahuaca Hezronmi.

¹⁹Hezronpaj huahuaca Rammi carca. Rampaj huahuaca Aminadabmi carca.

²⁰Aminadabpaj huahuaca Naasonmi carca. Naasonpaj huahuaca Salmonmi carca.

²¹Salmonpaj huahuaca Boozmi carca. Boozpaj huahuaca Obedmi carca.

²²Obedpaj huahuaca Isaimi carca, Isaipaj huahuaca Davidmi carca.