Read Chimborazo Highland Quichua 1 SAMUEL 10 Bible Online

1 SAMUEL 10 - Chimborazo Highland Quichua bible

1 SAMUEL 10

¹Chaipimi Samuelca, shuj botella aceiteta Saulpaj umapi tallishpa muchashpaca: — Mandaj Diosmi paipaj israelcunata mandaj cachun, aceitehuan churan.

²Can ñucamanta ch'icanyashpa ricujpica, ishqui runacunami canhuan tupangacuna. Paicunaca Benjaminpaj llajtapi caj Selsa pueblo c'uchupi Raquel huarmita pambashca c'uchupi tupashpaca cashnami ningacuna: “Cancuna mashcanaman rishca burrocunataca ñami japircanchij. Cunanca cambaj yayaca burrocunamantaca ña mana llaquillachu. Ashtahuanpish cancunamanta llaquirishpamari: Cunanca ñuca huahuamantaca imatataj rurashari nicun” ningacunami.

³Chaimanta rishpa, Tabor pambapi tiyaj encina yuraman ña chayagricujpica, Bet-el pueblopi Diosman cungapaj huichiyangapaj llujshicuj quimsa runacunami canhuan tupangacuna. Paicunaca shujca quimsa chivota, caishujca quimsa tandata, caishujca shuj puñu vinota apashpami ricungacuna.

⁴Allillachu cangui nishca q'uipaca, canmanca ishqui tandatami cungacuna. Chaitaca japinguilla.

⁵Chaimanta rishpaca, filisteocunapaj soldadocuna cuidacuj Diospaj lomamanmi chayangui. Chai puebloman yaicushpaca, achca profetacuna chai lomamanta uriyamucujhuanmi tupangui. Paicunataca salteriopi, panderopi, flautapi, arpapi tocashcacunahuanmi ñaupashpa shamucungacuna. Chai profetacunaca Dios huillachijpi huillaihuanmi shamucungacuna.

⁶Chaipica Mandaj Diospaj Espíritu tucuita rurai tucushcahuan cambaj jahuaman shamujpimi, paicunahuan Dios huillachishcata huillangui. Chaipica canca mushuj runami tucungui.

⁷Ñuca imalla nishcacuna pajtajpica, Diosca canhuan cashcamanta imami cambaj alli, chaitaca ruranguilla.

⁸Chai q'uipaca, Gilgalman ñucapaj ñaupa ringuilla. Ñucaca Diosman cushpa tucuita rupachingapaj, sumaj causaimanta cuna cashcata cungapajpishmi cambajman chai puebloman shamusha. Ñuca chai puebloman shamushpa can imalla rurana cashcata huillangacama canchis punllata chaipi shuyangui — nircami.

⁹Minchacama nishpa Samuelpajmanta Saúl rigrijpica, tucui paipaj shungutami Diosca shujtajyachirca. Tucui imalla nishcacunaca ima punllapimi chashna tucunga nishpa huillashcaca, chai punllapitajmi pajtarca.

¹⁰Paicuna chai lomaman chayajpica, achca profetacuna tandanacushcami tupanaman llujshircacuna. Chaipimi Diospaj Espíritu tucuita rurai tucuj cashcahuan paipaj jahuaman shamujpi, paicunahuan paicuna shinallataj Dios huillachishcata huillarca.

¹¹Profetacunahuan Saúl tandanacushpaca, paicuna shina tucujta ricushpami, ñaupaman paita rijsijcunaca caishuj chaishuj: “Cis runapaj churi Saulca ¿imataj tucushcachu imamí? ¿Saulpish profetacunapurachu tucushca imamí?” ninacurcacuna.

¹²Chaipi cajcunapuramanta shujmi: “Paicunapaj yayaca ¿pitagari?” nirca. Chaimantami: “¿Saulpish profetacunapurachu?” nishca tiyan.

¹³Dios huillachishcata tucui huillashca q'uipami, Saulca chai lomaman chayarca.

¹⁴Saulpaj shuj tiomi, Saultapish, paipajta rurajtapish: — ¿Maimantaj rircanguichij? — nijpi Saulca: — Burrocunata mashcanamanmi rircanchij. Mana ricurijpimi, Samuelpajman rircanchij — nirca.

¹⁵Chaimi Saulpaj tioca: — Canman Samuel imallata nishcata ñucaman huillachunmi rogani — nijpi,

¹⁶Saulca paipaj tiomanca: — Chingarishca burrocunataca ñami japin nishpami Samuelca huillan — nirca. Pai mandaj tucuna cashcata Samuel huillashcataca mana huillarcachu.

¹⁷Chai q'uipami Samuelca, Mizpa pueblopi israelcunata Mandaj Diospaj ñaupajpi tandachishpa,

¹⁸cashna nirca: — Israelcunata Mandaj Diosca cashnami nin: Ñucami israelcunataca Egipto llajtamanta llujshichishpa paicunapaj maquimanta quishpichircani. Shujtaj llajtacuna llaquichicuncunamantapishmi llujshichircani ninmi.

¹⁹Ashtahuanpish cancunaca, jatun llaquicunahuan huacashpa causacushcamanta llujshichimuj cancunapaj quiquin Diosta yanganchishpamari shuj jatun mandajta churayari nircanguichij. Chaimanta cunanca tucui aillucuna, tucui familiacuna Mandaj Diospaj ñaupajpi shayarichij — nircami.

²⁰Samuel tucui Israel aillucunata c'uchuyachishpa sorteashpa agllajpica, Benjamín aillupajmi urmarca.

²¹Benjamín aillupaj tucui familiacunata c'uchuyachishpa sorteashpa agllajpica, Matri runapaj familiapajmi urmarca. Matri runapaj familiacunata c'uchuyachishpa sorteashpa agllajpica Cispaj churi Saulpajmi urmarca. Paita mashcashpaca, mana japircacunachu.

²²Chaimi Saúl chayamushcata, manaraj chayamushcata yachangapaj Mandaj Diosta cutin tapujpi Mandaj Diosca: “Saulca chaillapitajmi. Tucuicuna apamushcacuna chaupipimi miticushpa tiyacun” nirca.

²³Chaimi callpashpa rishpa pushamushpa israelcunapaj chaupipi shayachijpica, paica tucuicunata umahuan yalli carca.

²⁴Chaipimi Samuelca tucui israelcunataca: — Mandaj Dios agllashca jatun mandajtaca ¿ñachu ricunguichij? Tucui israelcunapurapica pai shinaca pi mana tiyanchu — nijpimi israelcunaca: — ¡Viva jatun mandaj! — nishpa cushicushpa caparircacuna.

²⁵Chai q'uipami Samuelca, jatun mandaj ima shina mandana cashcata tucuita huillashpa chaitaca shuj libropi quillcashpa Mandaj Diospaj ñaupajpi huaquichirca.

²⁶Samuelca tucui israelcunata paicunapaj huasicunaman cacharcallami. Saulpish Gabaapi caj paipaj huasimanmi rirca. Taita Dios yuyaita cujpimi, macanacunata alli yachaj runacunaca Saulhuan rircacuna.

²⁷Ashtahuanpish millai shungu maijan runacunaca: “¿Cai runachari ñucanchijtaca shujtajcunapaj maquimantaca quishpichingari?” nishpa yanganchishpami imata mana convidarcacuna. Saulca, mana uyaj tucushpa imata mana nircachu.