Read Chimborazo Highland Quichua 1 SAMUEL 11 Bible Online

1 SAMUEL 11 - Chimborazo Highland Quichua bible

1 SAMUEL 11

¹Chai q'uipami amonitacunata jatun mandaj Nahasca, Galaad llajtapi caj Jabes pueblopi causajcunahuan macanacungapaj huichiyashpa carpa huasicunata shayachirca. Jabes pueblopi causaj tucuicunami Nahastaca: — Ñucanchijhuanca mana macanacunata ari nihuailla. Can chaita ari nijpica, ñucanchijca cambajta rurajcunami tucushun — nircacuna.

²Chaimi amonitacunata jatun mandaj Nahasca: — Tucui cancunapaj alli lado ñahuita cancuna surcuchijpimi, mana macanacunataca ari nisha. Chashna rurashpami, israelcunata yallitaj yanganchisha — nirca.

³Chaimi Jabes pueblopi causajcunata cunaj yuyajcunaca: — Tucui Israel llajtata huillajcunata cachangapaj canchis punllata shuyapai. Chaipi ñucanchijta mitsajcuna mana tiyajpica, ñucanchijllataj canman curishunllami — nircacuna.

⁴Huillanaman cachashcacunaca Saúl causacun Gabaaman chayashpa tucui chaipi cajcunaman imalla nishcata huillajta uyashpami tucuicuna caparishpa huacarcacuna.

⁵Chaipica Saulca chagramanta huagracunata pushashca shamucushpami: — ¿Imataj tucushpa huacacuncunari? — nijpi, Jabes pueblomanta shamuj runacuna imalla nishcata parlarcacuna.

⁶Chaita Saúl uyacujpica Diospaj Espíritu tucuita rurai tucuj cashcahuan paipaj jahuaman shamujpi nina sindirij shina jatunta p'iñarishpami,

⁷ishqui huagracunata japishpa mirga mirga p'itishpa, tucui Israel llajtapi causajcunaman chai aichata ricuchishpa cashna huillachun huillajcunata cacharca: “Maijanpish Saulpajman, Samuelpajman mana tandanacujcunapaj huagracunataca chashnallatajmi ruranga” nishpa huillachun cacharca. Chaimi Mandaj Dios tucui israelcunaman manchana yuyaita cujpi shuj shinalla tandanacurcacuna.

⁸Bezec puebloman shamushcacunata yupajpica 300.000 runacunami carca. Judá aillumantaca, 30.000 runacunami carca.

⁹Chaipimi Jabes pueblomanta huillanaman shamujcunamanca: — Galaadpi caj Jabes pueblopi causajcunamanca cashna nichij: Caya inti llujshishpa cunujyachicuillapimi, cancunataca ña quishpichishun ninmi nigrichij — nirca. Jabes puebloman tigrashpa chaita huillajpica, achcatami cushicurcacuna.

¹⁰Chaimi Jabes pueblopi causajcunaca paicunata p'iñajcunataca: — Cancunapaj imami alli, chaita ñucanchijta rurachunca cayami ñucanchijca cancunaman curishun — nircacuna.

¹¹Chai cayandij punllami Saulca israelcunataca quimsapi chaupishpa pacarinapaj cuidacui horas shinata amonitacunapaj carpa huasicuna chaupiman chayarca. Chaipimi amonitacunataca inti cunujyachina horascama macanacushpa huañuchirca. Maijan mana huañujcunallami, urata janajta shuj shujlla miticushpa rircacuna.

¹²Chai q'uipami israelcunaca Samueltaca: — Maitataj Saulca ñucanchij jatun mandajca cangari nijcunaca ¿maijancunallataj? Chai runacunata huañuchingapaj ñucanchijman cuichij — nircacuna.

¹³Chaimi Saulca: — Mandaj Dios israelcunapaj quishpirinata apamushcamantaca cunan punllaca pi mana huañungachu — nijpi,

¹⁴Samuelca israelcunataca: — Shamuichij, jacuchij Gilgalman. Chaipi Saulta jatun mandajtaj cashcata ricuchingapaj — nirca.

¹⁵Tucui israelcuna Gilgalman rishpami, Saultaca Mandaj Diospaj ñaupajpi jatun mandaj cashpa churarina churanata churachircacuna. Mandaj Dioshuan alli cangapajpish paipaj ñaupajpi sacrificiota cushpami Saulpish, tucui israelcunapish achcata cushicurcacuna.