Read Chimborazo Highland Quichua 1 SAMUEL 13 Bible Online

1 SAMUEL 13 - Chimborazo Highland Quichua bible

1 SAMUEL 13

¹Saulca israelcunataca ñami shuj huatata mandarca. Ña ishqui huatata israelcunata mandacushpaca,

²3.000 Israel runacunatami agllarca. Micmas pueblopi, Bet-el urcupica 2.000 runacunami Saulhuan carca. Gabaapi caj Benjaminpaj aillupi caj Jonatanhuanca 1.000 runacunami carca. Shujtajcunataca paicunapaj carpa huasiman richunmi cacharca.

³Jonatanca lomapi cuidaj filisteocunatami yallitaj llaquichirca. Chaita tucui filisteocuna yachaj chayajpimi Saulca, tucui hebreocuna chaita yachashpa macanacunalla tucuchun tucui Israel llajtapi trompetapi tocachirca.

⁴Cuidaj filisteocunata Saúl huañuchishcatapish, chaimanta filisteocuna israelcunata yallitaj p'iñacushcatapishmi paicunaca yachaj chayarcacuna. Chaimi tucui israelcunaca, Gilgalpi Saulhuan tandanacurcacuna.

⁵Filisteocunapish israelcunahuan macanacungapajmi, 30.000 carrocunahuan, caballocunapi tiyarishca 6.000 runacunahuan, chaquillahuan purij soldadocunahuancarin t'iyu allpa shina mana yupaipaj achcacuna tandanacurcacuna. Bet-avén pueblomanta inti llujshin ladoman caj Micmas puebloman huichiyashpami, chaipi carpa huasicunata shayachishpa tiyarircacuna.

⁶Israelcunaca mana mishaipaj cashcata yuyashpami, tucuicuna ña llaqui tucugrinchijmi nishpaca jutcucunapi, sanja huashacunapi, jatun rumi chaupicunapi, peñacunapi, yacu tandarichun rurashca jutcucunapipish miticurcacuna.

⁷Maijan hebreocunaca, Jordán yacuta ch'imbashpami Gad, Galaad llajtacunaman rircacuna. Saulca Gilgallapitajmi saquirirca. Soldadocunaca manchaihuan cashpapish Saulhuanmi saquirircacuna.

⁸Saulca Samuel nishca shinallatajmi, Gilgalpica canchis punllacunata shuyarca. Ashtahuanpish Samuel mana chayajpimi, Gilgalmantaca tucuicuna caita chaita ricurcacuna.

⁹Chaimi Saulca: — Diosman cushpa tucui rupachinatapish, Dioshuan alli cangapaj cuna cashcatapish apamuichij — nishpaca, tucuita cushpa rupachirca.

¹⁰Diosman cushpa ña tucui rupachicushpami Saulca, Samuel chayagricujta ricushpa, Samuelta allillachu cangui ningapaj tupanaman llujshirca.

¹¹Chaipimi Samuelca: — ¿Imatataj rurarcangui? — nijpi Saulca: — Tucui israelcuna caita chaita ri callarijpi, canpish shamushami nishca punllapi mana chayamujpi, filisteocunapish Micmas pueblopi ñucanchijhuan macanacunalla tucushpa tandanacujpimi,

¹²ñucaca cashna nircani: “Mandaj Diosta ayudahuai nishpa manaraj mañajpi filisteocuna ñucahuan macanacungapaj Gilgalman uriyamugrinca” nishpami, Mandaj Diosman ñucallataj cushpa tucui rupachina tucurcani — nirca.

¹³Samuelca Saultaca: — Canca upa shinamari rurashcangui. Mandaj cambaj Dios mandashcatamari mana huaquichishcangui. Chaita huaquichishca cajpica, israelcunata can mandanataca Mandaj Diosca huiñaicamami saquinman carca.

¹⁴Cunanca canca mana unita mandanguichu. Mandaj Dios mandashcata canllataj mana huaquichishcamantami, Mandaj Diosca pai agllashcacunata mandachunca, pai munashcata ruraj runa mandachun pai agllashca runata churanga — nircami.

¹⁵Chaimantaca Samuelca, jatarishcahuan rishpami, Gilgalmantaca Benjamín aillupaj Gabaa puebloman huichiyarca. Saúl paihuan chaipi cajcunata yupajpica, 600 runacuna shinami carca.

¹⁶Saulhuan, paipaj churi Jonatanhuanca paicunahuan caj runacunandijmi Benjamín llajtapi caj Gabaa llajtallapitaj carcacuna. Filisteocunaca Micmas pueblopi carpa huasicunata shayachishcallapitajmi carcacuna.

¹⁷Imatapish shuhuashpa apangapajmi filisteocunaca carpa huasicunamantaca quimsa mirgapi chaupishca llujshircacuna. Shuj mirgaca Ofra puebloman rina ñanta rishpami, Sual llajta ladoman rirca.

¹⁸Caishuj mirgaca, Bet-horonman rina ñantami rirca. Chaishuj mirgaca, Zeboim pugru pamba ch'imbapuratami shitashca pambaman rirca.

¹⁹Filisteocunaca israelcuna espadata, lanzata ama rurachun tucui Israel llajtapi fierromanta imatapish rurajcuna tiyachun mana saquijpimi, tucui Israelpi fierromanta imatapish rurajca maipi mana tiyarca.

²⁰Chaimi tucui israelcuna paicunapaj yapuna rejata, azadonta, hachata, hocestapish filojllata rurachinaman filisteocunapajman rijcuna carca.

²¹Yapuna rejacunata tacashcamanta, azadoncunata filojllata rurashcamantaca shuj pim nishcatami cobrajcuna carca. Hachacunata filojllata rurashcamanta, garrochacunata allichishcamantaca shuj siclomanta quimsapi chaupishca cullquitami cobrajcuna carca.

²²Macanacunaman rina punllaca Saulhuan, Jonatanhuan cajcunaca paicunapaj maquipica espadatapish, lanzatapish shujllapish mana charircacunachu. Saulhuan paipaj churi Jonatanllahuanmi charircacuna.

²³Cuidaj filisteocunamanta shuj mirgaca Micmas puebloman rinacamami shamurcacuna.