Read Chimborazo Highland Quichua 1 SAMUEL 16 Bible Online

1 SAMUEL 16 - Chimborazo Highland Quichua bible

1 SAMUEL 16

¹Mandaj Diosca Samueltaca: — Israelcunata ama jatun mandaj cachun Saulta ñuca ña anchuchishcamantaca ¿maicamataj huacacunguilla? Can charicun gachupi aceiteta jundachishpa, Belenpi causaj Isaipajman ri. Ñucaca paipaj churicunamanta shujtami jatun mandaj cachun ña agllarcani — nircami.

²Chaimi Samuelca: — ¿Ima shinataj rishari? Saúl yachashpaca ñucataca huañuchingamari — nijpimi Mandaj Diosca: — Shuj huarmi bizita apai: Mandaj Diosman sacrificiota cungapajmi shamurcani ningui.

³Chaita cushpa rupachingapajca Isaitapish cayangui. Chaipimi can imata rurana cashcataca yachachisha. Maijantami ñuca ricuchini, chaita aceitehuan umapi churangui — nircami.

⁴Samuelca Mandaj Dios nishca shinallatajmi rurarca. Belenman pai ña chayajpica, chai pueblopaj cunaj yuyajcuna manchaihuan tupanaman llujshishpaca: — ¿Cushichingapajchu shamungui? — nishpa tapujpimi,

⁵Samuelca: — Ari, Mandaj Diosman cushpa rupachingapajmi shamuni. Cancunapish Diospajlla tucushpa, Diosman cushpa ñuca rupachicunman shamuichij — nirca. Isaitapish paipaj churicunatapish Diospajllata rurashpaca, Diosman cushpa pai rupachicunmanmi cayarca.

⁶Paicuna ña shamujpica, Samuelca Eliabta ricushpaca: “Paitamari Mandaj Diosca jatun mandaj cachun agllashca canga” yuyarcami.

⁷Chaimi Mandaj Diosca Samueltaca: “Pai sumaj cashcallata, jatun runa cashcallataca ama ricuichu. Chashnacunataca ñucaca yanganchinimi. Mandaj Diosca runacuna ricuj shinallaca mana ricunchu. Runaca paipaj ñahuipi ricurishcallatami ricun. Ashtahuanpish Mandaj Diosca shungutamari ricun” nirca.

⁸Isaica, Abinadab churita cayashpami Samuelpaj ñaupajman pushajpi: — Paitapish Mandaj Diosca, mana agllarcachu — nirca.

⁹Isaica, Sama churita Samuelpaj ñaupajman pushajpi: — Paitapish Mandaj Diosca mana agllarcachu — nirca.

¹⁰Isaica chashnami paipaj canchis churicunatataj huashan huashan Samuelpaj ñaupajman pushajpi Samuelca Isaitaca: — Caicunataca Mandaj Diosca pita mana agllashcachu — nirca.

¹¹Chai q'uipami Samuelca Isaitaca: — ¿Tucui caicunallachu cambaj churicunaca? — nijpi Isaica: — Tucuicunapaj q'uipa shuj uchilla churillami ovejacunata michicun — nijpi Samuelca Isaitaca: — Paita pushanaman cachai. Pai chayamungacama ñucanchijca micungapaj mana tiyarishunchu — nirca.

¹²Chaimi Isaí paipaj churita pushanaman cachashpaca, Samuelpajman yaicuchirca. Paica puca ajcha, sumaj ñahuicunayuj, sumaj huambrami carca. Chaipimi Mandaj Diosca Samueltaca: — Paitami jatun mandaj cachun agllarcani. Jatarishpa, aceitehuan churai — nirca.

¹³Chaimi Samuelca, aceitehuan caj gachuta japishpaca, paipaj huauquicunapaj chaupillapitaj Davidtaca aceitehuan churarca. Chai punllamanta pachami Mandaj Diospaj Espirituca Davidpaj jahuaman shamurca. Chai q'uipaca Samuelca jatarishpa Ramá puebloman tigrarcallami.

¹⁴Mandaj Diospaj Espirituca Saulmantaca anchurircami. Mandaj Diosca millai espirituta Saulpajman cachajpimi Saultaca llaquichirca.

¹⁵Chaimi Saulpajta rurajcunaca: — Cunanca millai espíritu canta llaquichichun Mandaj Dios saquijpimi, chai espíritu cantaca llaquichicun.

¹⁶Ñucanchij amito. Cambaj ñaupajpi cambajta ruraj ñucanchijtaca, arpapi tocanata yachajta mashcachun cachai. Mandaj Dios llaquichichun saquishca millai espíritu cambaj jahuaman shamushpa llaquichicujpica, arpapi tocaj tocajpica, cambaj yuyaica ashallatapish samaringami — nircacuna.

¹⁷Saulca paipajta rurajcunataca: — Shinashpaca maijanpish alli tocanata yachaj runata mashcashpa, caiman pushamuichij — nircami.

¹⁸Chaimi paipajta rurajcunamanta shujca: — Ñucaca Belenpi causaj Isaipaj churitamari tocanata yachaj cashcata, c'ari c'ari, fuerzasapa, macanacunata alli yachaj, imatapish alli yuyaihuan rimaj, sumaj huambra cashcata ricurcani. Mandaj Diosca paihuanmi — nircami.

¹⁹Chaimi Saulca: — Ovejacunata michij cambaj churi Davidta caiman cachai — nichun huillajcunata Isaipajman cacharca.

²⁰Shina nijpimi Isaica tandata, puñu vinota, shuj chivota burroman apachishpa Saulpajman paipaj churi Davidhuan cacharca.

²¹David Saulpajman chayajpica Saulca paipajta ruraj cachunmi churarca. Saulca Davidta achcata c'uyashpami, paipaj macanacunata apajta rurarca.

²²Chai q'uipami Saulca Isaimanca: “Davidtaca ñucahuan causachun saquilla paica ñuca ñahuipica allimi ricurishca” nishpa rogachun cacharca.

²³Llaquichichun Dios saquishca millai espíritu Saulpaj jahuaman shamujpi David arpata japishpa tocajpica, millai espíritu Saulmanta anchujpimi ashata samarishpa cushicuj carca.