Read Chimborazo Highland Quichua 1 SAMUEL 2 Bible Online

1 SAMUEL 2 - Chimborazo Highland Quichua bible

1 SAMUEL 2

¹Ana mañashpaca cashnami nirca: “Ñuca shunguca Mandaj Diospimi cushicun. Mandaj Diosmi ñucamanca fuerzata cun. Ñucata p'iñajcunatapish upallachinimi. Ñucaca can quishpichishcamantami cushicuni.

²Mandaj Dios shina jucha illajca, mana tiyanchu. Can Dios shinaca pi shujtaj mana tiyanchu. Ñucanchij Dios shina huaquichijca pi mana tiyanchu.

³Jatun tucushca shimicunahuan atirishpa ama manchanayajta rimarichijchu. Quiquinllataj yanga jatun tucushpa rimarinata saquichij. Tucuita yachaj Diosca Mandaj Diosmi. Paimi imalla rurashcataca pezashpa ricunga.

⁴C'ari c'aricunapaj arcocunatapish paica p'aquishcamari. Mana mitsari tucujcunatapish imatapish rurai tucuj canahuanmari chumbillichin.

⁵Ñaupaman achcata charijcunaca cunanca shujtajcunapajta rurashpallamari micuncuna. Ñaupaman yaricaihuan cajcunapish, mana yaricaihuan cangacunachu. Mana huachaj huarmipish canchis cutinmari huachashca. Achca huahuacunata charijca chaquirishcamari.

⁶Mandaj Diosmi huañuchin, paillatajmi causachin. Paillatajmi Seolpipish churan. Paillatajmi chaimantapish llujshichin.

⁷Mandaj Diosmi huajchayachin. Paillatajmi charijyachin. Paillatajmi cumurichin. Paillatajmi jatunyachin.

⁸Mandaj Diosmi huajchataca allpamanta jatarichin. Paimi mañashpalla causajtapish ñucumanta llujshichin. Alli nishca tiyarinata cungapaj jatun mandajcunahuan chaipi tiyachingapajmi chashna ruran. Cai pachata aparijcunapish Mandaj Diospajmari. Paimi cai pachataca chai jahuacunapi churarca.

⁹Jucha illaj paipaj cajcunataca maita purinapipish paimi huaquichin. Ashtahuanpish Diosta mana manchajcunaca, amsapimari chingarin. Maijanpish quiquin fuerzallamantaca, mana imata rurai tucunchu.

¹⁰Mandaj Diosta p'iñajcunataca, paipaj ñaupajllapitajmi ñutunga. Paicunapaj jahuapimi, jahua pachamanta c'ulun nichinga. Tucui cai pachapi causajcuna imalla rurashcatapish Mandaj Diosmi paicunaman ricuchinga. Jatun Mandajmanca tucuita rurai tucunatami cunga. Pai churashca tucuita rurai tucujtaca jatunyachingami” nircami.

¹¹Chai q'uipaca Elcanaca Ramá pueblopi caj paipaj huasimanmi tigrarca. Chai huahuaca Elí curahuan tucushpa Mandaj Diospajta rurangapajmi saquirirca.

¹²Elipaj churicunaca millaita rurajcuna, Mandaj Diostapish mana rijsijcunami carca.

¹³Paicunaca israelcunahuanca cashnami rurajcuna carca: Sacrificiota maijan cujpi chai aichata yanucujpica, curapajta rurajmi garfio nishca quimsa puntayuj fierrohuan shamushpaca,

¹⁴aichata maijan mangapi yanucujpipish fierrota satishpa, aichataca chai fierropi mashna llujshishcata curapaj apaj carca. Silo puebloman shamuj tucui israelcunapajtami chashna rurajcuna carca.

¹⁵Huirasapa aichata altarpi rupachishpa cucujpipish manaraj rupachijpimi, curapajta ruraj runa shamushpaca: “Cusana aichata curapaj apangapaj cui. Curaca yanushca aicha cajpica mana chasquinchu, chahua cajllapimi chasquin” nij carca.

¹⁶Shina nijpi sacrificiota cucujca: “Huirasapa aichataca Taita Diosmanrajmi cushpa rupachina. Chai q'uipaca can mashna nishcata apanguillami” nijpipish curapajta rurajca: “Mana, utcashpa cui. Mana cujpica quichushpami apasha” nijmi carca.

¹⁷Chai q'uipa huiñaicuna Mandaj Diosman cushcacunata yangata rurashcamantaca paicunapaj juchaca Mandaj Diospaj ñaupajpica yallitaj millaimi carca.

¹⁸Ashtahuanpish Samuel huambraca linomanta rurashca efodta churashcami, Mandaj Dios munashca shina paipajta rurashpa causarca.

¹⁹Paipaj mamaca suni churanatami ruraj carca. Chaitaca paipaj cusa sacrificiota cunaman rij cashca shinallataj huatanta rijpimi, Samuelman cungapaj apaj carca.

²⁰Elí curaca Elcanata paipaj huarmitapish Dios allicunata cushca cachun nishpaca: “Mandaj Diosman cushca cai huahuapaj randica, pai Diosllataj cancunamanca shujtaj huahuacunata cuchun” nircami. Chai q'uipaca paicunapaj huasiman tigrarcallacunami.

²¹Mandaj Dios Anata ricuj shamujpimi, Anaca huahuacunayuj tucurca. Quimsa churicunata, ishqui ushushicunatami charirca. Huahua Samuelca, Mandaj Diospaj ñaupajpimi huiñarca.

²²Elica ña yuyajmi carca. Israelcunata paipaj churicuna imallata rurajtaca yacharcami. Dioshuan tupanacuna huasi pungupi imalla rurana cashcata ruraj huarmicunahuan paipaj churicuna dormij cashcatapish yachashpami,

²³Elica: “¿Ima nishpataj chashna yallitaj millaita ruranguichij? Cancuna mana allita rurashcataca tucui caipi causajcunami parlanacucujta uyani.

²⁴Ñuca huahuacunalla, ñuca uyashca shina cancuna millaita rurashcaca mana allichu. Chashna rurashpaca Mandaj Diospajlla cajcunatamari juchallichinguichij.

²⁵Maijanpish shuj runata llaquichijpica, juezcunami ricushpa imatapish ninga. Mandaj Diosta p'iñachishpa juchallijpica ¿pitaj paimantaca rogaringari?” nircami. Mandaj Dios paicunapaj causaita quichunataj cashcacuna cashpami, paicunapaj yaya rimashcataca mana uyarcacuna.

²⁶Ashtahuanpish Samuel mosoca ashtahuan huiñashpami, Mandaj Diospaj ñaupajpipish, runacunapaj ñaupajpipish ashtahuan Dios munashca tucushpa catirca.

²⁷Diospaj shuj runa Elipajman shamushpami: “Mandaj Diosca cashnami nin: Cancunapaj ñaupa yayacuna Egiptopi faraonpajta rurashpa causacujpica ¿manachu ñuca ima shina cashcataca tucuita ricuchircani?

²⁸Ñucaca tucui Israel aillucunapurapica cambaj aillupi cajcuna ñucapajllata ruraj cura cachunmi agllarcani. Ñuca altar jahuapi ñucaman cushcata rupachichun, inciensota rupachichun, ñuca ñaupajpi efodta churashca cachunpishmi agllarcani. Tucui israelcuna cushcacunataca cambaj aillupaj cachunmi curcani.

²⁹Ñucaman cushca sacrificiocunata, ñucaman cushcacunataca ñuca huasipi ñucaman cunguichij nishpa mandashcataca ¿ima nishpataj yangata rurashpa sarurcanguichij? Ñuca israelcuna cushcacunata ashtahuan allicunata cambaj churicunamanraj cushpamari paicunataca gordoyachingui. Chashna nishpaca ñucata alli ninapaj randica cambaj churicunatarajmari alli ningui.

³⁰Chaimantami israelcunata Mandaj Diosca cashna nin: Cambaj ñaupa yayacunatapish, cambaj huasi familiatapish, ñuca ñaupajpi purichunmi churarcani. Ashtahuanpish cunanca Mandaj Diosca cashnami nin: Chaipi cachunca manataj saquishachu. Ñucata allipi churajcunallatami allipi churasha. Ñucata p'iñajcunataca yanganchishami.

³¹Cantapish cambaj ñaupa yayacunatapish imata ruraj canata quichuna punllacunami ña chayamucun. Chaimanta cambaj huasi ucupurapica yuyajcama causajca pi mana tiyangachu.

³²Israelcunaman jahuanpi jahuanpi Dios allicunata cucujpica, cambaj huasi ucupurataca tucui cumurichishcami canga. Chaimanta cancunapurapica yuyajcama causajca pi mana tiyangachu.

³³Cambaj huasi ucupuraca ñuca altarpi rurajca ñuca mana anchuchishca runallami saquiringa. Paica, paipaj shungupi yallitaj llaquirishpa huacashpa ñahui ungüi tucungapajllami saquiringa. Cambaj huasipi huacharishcacunaca tucuicunami chairajcuna cashpa huañungacuna.

³⁴Cambaj Ofni, Finees shuti churicuna ishquindijtaj chai punllallataj huañushpami, ñuca canman chashna nishca pajtashcata ricuchijca canga.

³⁵Paipaj randica ñuca shungu ñuca yuyai munashca shinata chaitataj pajtachij shuj curatami churasha. Paipaj huasi familiataca unicama catichun sinchitami rurasha. Paicunaca punllantami ñuca churashca jatun mandajpajta rurangacuna.

³⁶Cambaj huasi ucupurapi saquirijca, shuj cullquillatapish amulli tandallatapish cungapishchari nishpami ñuca churashca curapaj ñaupajpi cungurishpaca: Curacuna ruranapi ñucatapish churahuai chaipi amulli tandallatapish micungapaj nishpa rogaringa” nircami.