Read Chimborazo Highland Quichua 1 SAMUEL 22 Bible Online

1 SAMUEL 22 - Chimborazo Highland Quichua bible

1 SAMUEL 22

¹Davidca chaimanta rishpaca, Adulampi caj jutcupimi miticugrirca. Paipaj huauquicuna, paipaj yayapaj huasi ucupuracunapish David chaipi cashcata yachashpaca paipajmanmi rircacuna.

²Llaquichishca causacujcunapish, ima mañashcata mana tigrachi tucujcunapish, yuyaipi llaquilla cajcunapish tucuicunami tandanacurcacuna. Davidtaca paicunata mandaj cachunmi churarcacuna. Paihuanca 400 shina gentecunami carca.

³Chaimantaca Davidca, Moabpi caj Mizpaman rishpami Moab llajtata jatun mandajtaca: — Dios ñucata imata ruranata yachangacama ñuca yaya mamata mingui tucupai — nishpami,

⁴Davidca paipaj yaya mamataca Moabta jatun mandajpajman pushamurca. Chaimi peña jutcupi David miticushpa causacui punllacunaca paicunaca Moabta jatun mandajhuan causarcacuna.

⁵Chaipi miticushpa tiyacujpipish profeta Gatca Davidtaca: — Peña jutcupi miticushpaca ama tiyacuillachu. Judaman ri — nijpimi Davidca chaiman rishpaca, achca yuracuna tiyan Haretman rirca.

⁶Saulca Gabaa urcu jahuapi tiyaj tamarisco yura ucupimi, lanzata aisashca tiyacurca. Paipajta rurajcunapish paipaj muyundijpimi tucuicuna carca. Chaipimi Saulca Davidta, paihuan cajcunatapish maipi cashcata yachaj chayarca.

⁷Chaimi Saulca, paipaj muyundijpi caj paipajta rurajcunataca: — Cunanca, Benjaminpaj aillucuna caita uyaichij. Isaipaj churica ¿allpacunata, uva chagracunata tucui cancunaman cungami yuyanguichijchu? ¿Tucui cancunataca 1.000 soldadocunata, 100 soldadocunata mandaj cachun churangami yuyashpachu,

⁸tucui cancunapish ñucata p'iñashpa jataringuichij? Isaipaj churihuan, ñuca churihuan imata ruranata ari ninacushcata yachashpapish, pi mana huillashcanguichijchu. Cancunamanta shujllapish ñucata llaquijca mana tiyashcanguichijchu. Chaimi ñuca churillataj ñucapajta ruraj David ñucata p'iñachun yuyaita cujpi ñucata p'iñashpa macanacungapaj puricun. Chaita yachashpapish mana huillashcanguichijchu — nirca.

⁹Chaimi Saulpajta rurajcunata mandaj, edomita Doegca: — Ñucaca Isaipaj churi Davidtaca, Nob pueblopi caj Ahitobpaj churi Ahimelec curapajman shamujtami ricurcani.

¹⁰Ahimelecca David imata rurana cashcataca Mandaj Diostami tapurca. Chai q'uipaca micunatapish, Goliat filisteopaj espadatapish cushpami cacharca — nircami.

¹¹Chaimi jatun mandajca, Ahitobpaj churi Ahimelec curatapish, paipaj yayapaj huasi ucupuratapish, Nob pueblopi caj curacunatapish cayaj cacharca. Paicunaca tucuicunami jatun mandajpajman shamurcacuna.

¹²Chaipimi Saulca: — Ahitobpaj churi, caita alli uyai — nijpi Ahimelecca: — Caipimi cani, ñuca amito — nirca.

¹³Saulca cashnapishmi nirca: — ¿Ima nishpataj canca Isaipaj churihuan tucushpa, ñucata llaquichishun nishpa paimanca tandatapish espadatapish curcangui? Pai ima shina ñucata llaquichinatapish Taita Diostami tapushcangui. Chaimanta riqui, cunanca ima shinami ñucata llaquichingapaj puricun — nircami.

¹⁴Chaimi Ahimelecca, jatun mandajtaca: — Cambajta ruraj tucuicunamantaca ¿maijantaj David shina tucui can nishcata pajtachijca tiyanri? Paica can jatun mandajpaj yernopishmari. Tucui can ima nishcatapish rurajmari, cambaj huasi familiapish tucuicunami alli nincuna.

¹⁵¿David imata rurana cashcataca cunanllachari Taita Diostaca tapui callarishcani? David canhuan ima shina cashcataca cambajta ruraj ñucaca achcatapish ashallatapish imata mana yachanichu. Chaimanta ñuca cambajta rurajtapish, ñuca huasi familiatapish ama juchachichu — nircami.

¹⁶Chaimi jatun mandajca: — Ahimelec, can chashna nishpapish canpish, cambaj huasi ucupuracunapish huañunami canguichij — nirca.

¹⁷Chashna nishpaca jatun mandajca paita cuidashpa muyundijpi shayacuj soldadocunataca: — Mandaj Diospaj curacunata tigrarishpa huañuchichij. Paicunapish Davidman maquita cushpamari pai miticushpa ricujta yachashpapish ñucamanca mana yachaj chayachishcacuna — nircami. Chashna nijpipish jatun mandajpajta rurajcunaca, Mandaj Diospaj curacunata huañuchingapaj paicunapaj maquitaca mana chutashun nircacunachu.

¹⁸Chaimi jatun mandajca, Doegtaca: — Curacunata can huañuchi — nijpi, edomita Doegca chai punllallataj linomanta rurashca efod churanacunata churashca pusaj chunga pichca curacunata huañuchirca.

¹⁹Chai q'uipaca curacuna causana Nob puebloman rishpami Saulca, c'aricunata, huarmicunata, chuchucuj huahuacunacama espadahuan huañuchirca. Huagracunatapish, burrocunatapish, ovejacunatapish tucuicunatami espadahuan huañuchirca.

²⁰Ahitobpaj churi Ahimelecpaj churicunamanta Abiatarllami quishpirishpa Davidpajman miticushpa rirca.

²¹Davidpajman Abiatar chayashpaca, Mandaj Diospaj curacunata Saúl ima shina huañuchishcatami huillarca.

²²Chaimi Davidca Abiatartaca: — Ñucaca chai punllallatajmi, edomita Doeg chaipi cajta ricushpaca, Saulman yachaj chayachina cashcata yacharcani. Cambaj yayapaj huasi ucupuracunataca ñucamantami huañuchishcacuna canga.

²³Ama manchaichu, ñucahuan saquirilla. Maijanpish ñucata huañuchingapaj mashcajca cantapish huañuchingapaj mashcangami. Can ñucahuan cashpaca quishpiringuimi — nirca.