Read Chimborazo Highland Quichua 1 SAMUEL 26 Bible Online

1 SAMUEL 26 - Chimborazo Highland Quichua bible

1 SAMUEL 26

¹Zifeocunaca Saulpajman Gabaaman shamushpaca: “Davidca shitashca pambamanta inti llujshin ladoman caj Haquila urcupimari miticushpa tiyacun” nircacunami.

²Chaimi Saúl jatarishpaca Zifpi tiyaj shitashca c'acacunaman rirca. Paica Davidta mashcangapajmi israelcunamanta agllashca 3.000 runacunata paihuan pushashpa, chai Zifpi tiyaj shitashca c'acacunaman rirca.

³Saulca Haquila urcupimi carpa huasicunata shayachishpa tiyarirca. Chai urcuca shitashca pambamanta inti llujshin ladoman caj ñan c'uchupimi carca. Davidca shitashca c'acacunapi cashpami, chai shitashca c'acacunamanpish Saúl catimushcata yuyashpa,

⁴purij shinalla ricujcunata ricunaman cachashpa, Saúl chaiman chayashcataca allitaj yacharca.

⁵Chaita yachashpami Davidca, Saúl maipi carpa huasicunata shayachishpa tiyacunman rirca. Ña chayashpaca Davidca Saulpish Nerpaj churi Abnerpish maipi dormicujtami mashcashpa ricurca. Abnerca soldadocunata mandajmi carca. Saulca paipaj carpa huasipimi dormicurca. Paipaj muyundijpica israelcunapaj carpa huasicunami carca.

⁶Davidca heteo Ahimelecta, Joabpaj huauqui Sarviapaj churi Abisaitaca: — Carpa huasicunata shayachishpa Saúl maipi canmanca ¿maijantaj ñucahuan uriyashun ninguichij? — nijpi Abisaica: — Ñuca canhuan uriyasha — nirca.

⁷Chai tutallatajmi Davidhuan, Abisaihuanca Saulpish, paipaj soldadocunapish maipi canman rircacuna. Saulca carpa huasi ucupimi, paipaj sauna pambapi lanzata shayachishpa huañuita dormicurca. Abnerpish soldadocunandijmi Saulpaj muyundijpi huañuita dormicurcacuna.

⁸Chaipimi Abisaica Davidtaca: — Cunanmari Taita Diosca canta p'iñajtaca cambaj maquipi churashca. Cunanca paipaj lanzallatataj japishpa shuj cutin pambacama pasajta satishpa huañuchisha, ama jarcanguichu — nirca.

⁹Chaimi Davidca Abisaitaca: — Ama huañuchichu. Mandaj Dios churashca mandajta maijanpish paipaj maquihuan huañuchishpaca ¿maitataj juchachina illajca saquiringari? — nirca.

¹⁰Davidca cashnapishmi nirca: — ¡Mandaj Diosca causajmi! Mandaj Diosmi huañuchinga, mana cashpaca huañuna punlla chayajpimi huañunga. Mana cashpaca macanacuiman rishpami chingaringa.

¹¹Mandaj Dios churashca mandajta ñuca maquihuan huañuchinamantaca Mandaj Dios huaquichichun. Ashtahuanpish cunanca paipaj saunapi shayacuj lanzata, paipaj yacu mangatapish apashpa jaculla — nirca.

¹²Davidca, Saulpaj saunapi shayacuj lanzatapish, yacu mangatapish apashpami rirca. Chaita ricujca pi mana tiyarcachu. Pi mana rijcharircachu. Pi mana sintircachu. Paicunamanca Mandaj Dios yallitaj dormita cachajpimi tucuicuna huañuita dormicurcacuna.

¹³Davidca chaimanta ch'imbashpaca, Saulpajmanta carupi caj urcu jahuamanmi huichiyarca. Chaimanta Saulpajmanca achca carumi carca.

¹⁴Chaimantami Davidca, soldadocunatapish, Nerpaj churi Abnertapish: — Abner ¿uyacunguichu? — nishpa caparijpi, Abnerca: — Jatun mandajta caparingapajca ¿canca pitaj canguiyari? — nirca.

¹⁵Chaimi Davidca Abnertaca: — ¿Manachu canca c'ari cangui? Can shinaca Israelpica ¿pitaj tiyanri? Cambaj amo jatun mandajtaca ¿ima nishpataj mana cuidarcanguiyari? Cambaj amo jatun mandajtaca, israelcunamanta shujmari huañuchinaman yaicushca.

¹⁶Can chashna rurashcaca mana allichu. ¡Mandaj Diosca causajmi! Mandaj Dios churashca jatun mandaj cambaj amota mana cuidashcamantaca huañunatajmi cangui. Cunanca jatun mandajpaj saunaman caj lanzapish, yacuta apana mangapish maipitaj ricuyari — nirca.

¹⁷David rimashcata rijsishpami Saulca: — Ñuca huahua David. Cai shimicunataca canllatajchu rimacungui — nijpi, Davidca: — Jatun mandaj ñuca amito, ari ñucallatajmi cani nishpaca,

¹⁸Davidca: — Ñuca amito cambajta ruraj ñucataca ¿ima nishpataj llaquichina yuyailla caticunguiyari? ¿Imatataj rurashcaniyari? ¿Ñuca maquihuanca ima mana allitataj rurashcaniyari?

¹⁹Jatun mandaj ñuca amito, cunanca cambajta ruraj ñuca rimashcata uyachunmi rogani. Mandaj Diosllataj can jatun mandajta ñucata llaquichichun chashna rurachicujpica, ñuca cushca ofrendata chasquishpa ñucata perdonachun. Runacunalla chashna rurachicushca cashpaca, paicunaca Mandaj Diospaj ñaupajpica, mana alli nishcacuna cachun. Chashna rurashpaca paicunaca Mandaj Diospajta ñuca japina cashcamantami caruyachishpa, shujtajcunapaj dioscunapajta rurai nicuj shina ruracuncuna.

²⁰Mandaj Diospaj ñaupajmanta paipaj allpamanta carupi ñuca yahuar jicharichunca mana munanichu. Ashtahuanpish israelcunata jatun mandajmari ñucataca piquita maijan mashcacuj shina, urcucunapi yututa mashcacuj shina llaquichingapaj catishpa puricun — nircami.

²¹Chaimi Saulca: — Ñucaca juchallishcanimi. Upa shina tucushpamari jatun mana allita rurashcani. Canca ñuca causaita c'uyashpamari mana huañuchishcangui. Cunanca ñuca huahua David ima mana allita mana rurashachu tigramuilla — nirca.

²²Shina nijpi Davidca: — Jatun mandajpaj lanzaca caipimi. Paipajta rurajcunamanta maijanpish cai lanzata apangapaj shamuichij.

²³Mandaj Diosmi canmanpish ñucamanpish cashcata rurashca cajpipish, mana cashcata rurashca cajpipish ima shinalla rurashca shinallataj cunga. Mandaj Diosmi cantaca ñuca maquipi churarca. Shina cajpipish Mandaj Dios churashca jatun mandajtaca ñuca maquihuanca mana llaquichisha nircanichu.

²⁴Ñuca cambaj causaita c'uyashpa mana huañuchishca shinallataj Mandaj Diospish ñuca causaita c'uyashpa tucui ñuca llaquimanta quishpichichun — nircami.

²⁵Saulca Davidtaca: — Ñuca huahua David, cantaca Taita Dios alli nichun. Tucui ima jatunta rurashpapish allitami rurangui — nijpimi Davidca, pai maiman ricushca ñanllatataj rirca. Saulpish pai maipi cashcallamantaj tigrarcallami.