Read Chimborazo Highland Quichua 1 SAMUEL 3 Bible Online

1 SAMUEL 3 - Chimborazo Highland Quichua bible

1 SAMUEL 3

¹Samuel mosoca Elí curapaj ñaupajpimi Mandaj Diospajta rurashpa causarca. Chai punllacunapica Mandaj Diosca, huaquinllapimi huillachij carca. Muscuipi shinapish huaquinllapimi ricurirca.

²Elica cashnami tucurca. Paipaj ñahui zuyuyashpa catijpimi mana ricui tucushpa paipaj causana ucupi siricurca.

³Samuelpish Diospaj arca maipimi tiyacun Mandaj Diospaj huasillapitajmi dormicurca. Diospaj huasipi japichishca pacaricuj lámpara manaraj huañujpimi,

⁴Mandaj Diosca: — Samuel — nishpa cayajpi Samuelca: — Caipimi cani — nishpa,

⁵jatarishcahuan Elí maipi canman rishpaca: — Caipimi cani, ¿imapajchari cayarcangui? — nijpi Elica: — Ñucaca mana cayashcanichu, cutin tigra siririgrilla — nijpi Samuel rishpaca sirirircallami.

⁶Mandaj Diosca cutinllataj Samuel nishpa cayajpimi, Samuelca jatarishcahuan Elí maipi cashcaman rishpaca: — Caipimi cani. ¿Imapajchari cayarcangui? — nijpi Elica: — Ñuca huahualla, ñucaca mana cayashcanichu, cutinllataj siririgrilla — nirca.

⁷Samuelca, Mandaj Diostaca manaraj rijsircachu. Mandaj Diospaj rimaitapish manaraj uyajchu carca.

⁸Samueltaca Mandaj Diosca ña quimsa cutin cayajpimi, cutinllataj jatarishpa Elipajman shamushpaca: — Caipimi cani. Imapajchari cayangui — nijpi Elica, moso Samueltaca Mandaj Dios cayacuna cashcata yuyashpa,

⁹cashna nirca: — Rishpa siririgrilla. Cutinllataj cayajpica: Mandaj Dioslla, imata cashpapish huillahuailla, cambajta ruraj ñucaca uyacunimi ningui — nijpi Samuelca, pai siricushcaman tigrashpa sirirircallami.

¹⁰Mandaj Dios shamushpa shayarishpaca ñaupaman shinallatajmi: — ¡Samuel! ¡Samuel! — nishpa cayajpi Samuelca: — Cambajta ruraj ñucaca uyacunimi. Imata cashpapish nihuailla — nirca.

¹¹Chaimi Mandaj Diosca Samueltaca: — Cai israelcunapurapica mancharinatami ruragrini. Chaita uyajcunapajca ishquindij rinrincunapimi uyaricujlla shina saquiringa.

¹²Chai punllapimi Elitapish paipaj huasi ucupuratapish llaquichisha nishcataca pajtachisha. Paipaj huasi ucupurata tucui imalla rurasha nishcataca callarimanta tucuringacamami tucuita tucuchisha.

¹³Elica, paipaj churicuna millaillata rurashpa ñucata yallitaj p'iñachicujta yachashca jahua, mana jarcashpa saquircallami. Chaimantaca paipaj huasi ucupurataca paicuna ima shina rurashcata ricuchishpami, huiñaicama llaquichisha.

¹⁴Chaimanta Elipaj huasi ucupuracunataca, paicuna millaita rurashcamanta sacrificiocunata cujpipish, imalla cuna cashcata cujpipish, manataj perdonashachu nircanimi — nirca.

¹⁵Samuelca pacaringacama sirishpa jatarishpaca, Mandaj Diospaj huasi pungucunatami pascarca. Samuelca muscuipi shina ricushcata, uyashcataca Eliman parlanataca mancharcami.

¹⁶Ashtahuanpish Elica Samuelta cayashpami: — Samuel ñuca huahualla — nijpi paica: — Caipimi cani — nirca.

¹⁷Chaimi Elica: — Taita Diosca canmanca ¿imallatataj nircari? Pai imalla nishcataca ama imata pacashpa huillahuai. Can mana tucuita huillajpica, paillataj cantaca llaquichichun — nirca.

¹⁸Samuelca imata mana pacashpa tucuita huillajpimi Elica: — Paica Mandaj Diosmi. Paipaj imamí alli chaita rurachun — nirca.

¹⁹Samuelca huiñarcami. Mandaj Diosca paihuanmi carca. Pai huillashca shimicunaca tucuimi pajtarca.

²⁰Chaimi tucui israelcuna, Dan pueblomanta callarishpaca, Beerseba pueblocama Samuelca imatapish pajtachij, Mandaj Diospaj profeta cashcata yacharcacuna.

²¹Mandaj Diosca, Silo pueblopimi ricuricujlla carca. Chaipimi Samuelmanca pai imata rurasha nishcata huillarca.