Read Chimborazo Highland Quichua 1 SAMUEL 6 Bible Online

1 SAMUEL 6 - Chimborazo Highland Quichua bible

1 SAMUEL 6

¹Mandaj Diospaj arcaca, canchis quillatami filisteocunapaj llajtapi carca.

²Filisteocunaca curacunata, adivinocunata cayashpami: — Mandaj Diospaj arcataca ¿imatataj rurashun? Maimanta apamushcallapitaj, ima shina saquigrinata huillaichij — nishpa tapurcacuna.

³Chaimi paicunaca: — Israelcunapaj Diospaj arcata tigrachishpa cachashpaca ama chushajllata cachanguichij. Ashtahuanpish cancuna chai arcata quichumushpa mana allita rurashcamanta cuna cashcata cushpa cachashpami, cancunapaj ungüimantaca alliyanguichij. Mandaj Dios paipaj maquihuan imamanta cancunata llaquichinata mana saquicushcatapish yachanguichij — nircacunami.

⁴Chaimi filisteocunaca: — Chai mana allita rurashcamanta cuna cashcataca ¿imatataj cushun? — nijpi paicunaca: — Filisteocunata mandajcunaca pichcami canguichij. Tucui cancunatapish cancunapaj jatun mandajcunatapish chai llaquillataj llaquichicushcamantaca curimanta rurashca pichca chupucunata, curimanta rurashca pichca ucuchacunata cachaichij.

⁵Cancunata llaquichicuj chupucunaman rijchajta, cancunapaj llajtacunapi llaquichicuj ucuchacunaman rijchajta rurashpa israelcunapaj Taita Diosta alli nichij. Cancunatapish, cancunapaj dioscunatapish, cancunapaj allpacunatapish llaquichinata ashallatapish saquingapishchari.

⁶¿Ima nishpataj cancunaca egipciocuna shina, Faraón shina rumi shungucuna tucunguichij? Paicunatapish cunan llaquichij shinallataj llaquichijpimi, israelcunata richun saquijpi israelcunaca rircacuna.

⁷Cunanca shuj mushuj carrota rurashpa, llullu huahuayuj manaraj yapuj ishqui vacacunata yuntashpa chai carrota aisachishpa cachanguichij. Huahua bizicunataca, ama catichishpa cachashpa huasillamantaj tigrachinguichijlla.

⁸Mandaj Diospaj arcata japishpa carropi churaichij. Cancunaca paita llaquichishcamanta cuna cashcata cungapaj curimanta rurashca sumajcunataca shuj uchilla arcapi churashpa, Mandaj Diospaj arca c'uchupi churashpa cachaichij. Carrotaca huagracunalla aisashpa richun saquishpa,

⁹maita rijta ricuichij: Bet-semes puebloman rina ñanta Israel llajtaman rijpica, paicunapaj Dios llaquichicushcatami yachashun. Mana chaita rijpica, manapish pai llaquichicujpi ñucanchij mana cuidarishcallamanta chai llaquicuna cashcatami yachashun — nircacuna.

¹⁰Chai runacunaca ima shina nishca shinallataj rurashpami, llullu huahuayuj ishqui vacacunata japishpa carrota aisachircacuna. Bizicunataca paicuna shayanallapitajmi huichcarcacuna.

¹¹Chai q'uipaca Mandaj Diospaj arcata carropi churashpami, curimanta rurashca ucuchacunatapish, chupucunatapish shuj uchilla cajonpi churashpa, Mandaj Diospaj arca c'uchupi churarcacuna.

¹²Chai vacacunaca alli ladomanpish lluqui ladomanpish mana anchushpami Bet-semes puebloman rina ñanta huacarihuan rircacuna. Filisteocunata mandajcunaca Bet-semes pueblohuan paicunapaj llajtahuan tupacuncamami chai vacacunata catishpa ricugrircacuna.

¹³Bet-semes pueblopi causajcunaca pugru pambapi trigota cozichacushpa huichilla ricushpaca, Diospaj arca shamucujta ricushpami jatunta cushicurcacuna.

¹⁴Chai carrota aisashca vacacunaca, Bet-semes pueblomanta caj Josuepaj allpaman chayashpami, shuj jatun rumi c'uchupi shayarirca. Chaipimi paicunaca carrota caspicunata yantata rurashpa vacacunataca Mandaj Diosman cushpa chai yantahuan tucui rupachircacuna.

¹⁵Levitacunami Mandaj Diospaj arcatapish, curimanta rurashcacunahuan caj arca chai c'uchupi cajtapish uriyachishpa chai rumi jahuapi churarcacuna. Chai punllaca Bet-semes pueblopi causajcunaca Mandaj Diosman cushpami tucui rupachircacuna. Sacrificiocunatapish curcacunami.

¹⁶Chaita ricushpaca filisteocunata pichca mandajcunaca chai punllallatajmi Ecronman tigrarcacuna.

¹⁷Filisteocunaca Mandaj Diosta p'iñachishcamanta cuna cashcataca paicunata ama ashtahuan llaquichichun nishpami curimanta rurashca chupucunataca: Asdodmanta shuj, Gazamanta shuj, Ascalonmanta shuj, Gatmanta shuj, Ecronmanta shujta cacharcacuna.

¹⁸Pichca mandajcuna mandacun filisteocunapaj llajtacunamantaca curimanta rurashca ucuchacunaca, mashna llajta cashca shinallatajmi carca. Muyundijta pircashca pueblocunamantapish, mana muyundijta pircashca pueblocunamantapish mashna llajta cashca shinallatajmi carca. Mandaj Diospaj arcata tiyachishca chai jatun rumica Bet-semes pueblomanta caj Josuepaj allpapimi cunancama tiyacun.

¹⁹Bet-semes pueblopi causajcunataca, Mandaj Diospaj arca ucuta ricushcamantami huañuchirca. Paicunaca 50.070mi huañurcacuna. Chai achcacunata Mandaj Dios huañuchijpimi, chaipi causajcunaca jatunta llaquirishpa huacarcacuna.

²⁰Chaimi Bet-semespi causajcunaca: “¿Pitaj jucha illaj Mandaj Diospaj ñaupajpica cai tucungari? ¿Caimantaca ñucanchijca pipajmantaj cachashun?” nircacuna.

²¹Chaimi Quiriat-jearimpi causajcunaman huillachun huillajcunata cachashpaca: “Mandaj Diospaj arcataca ñami filisteocunaca tigrachircacuna. Cunanca cancunapaj puebloman apangapaj utca uriyamuichij” nichun cacharcacuna.