Read Chimborazo Highland Quichua 1 SAMUEL 7 Bible Online

1 SAMUEL 7 - Chimborazo Highland Quichua bible

1 SAMUEL 7

¹Quiriat-jearimpi causajcuna shamushpa Mandaj Diospaj arcata apashpaca Abinadabpaj huasipimi churarcacuna. Chai huasica shuj lomapimi carca. Mandaj Diospaj arcata chai huasipi cuidachunca, Abinadabpaj churi Eleazartami Diospajlla cachun ch'icanchishpa churarcacuna.

²Diospajlla arcata Quiriat-jearimpi churashca punllamantaca, achca punllacunami tucurca. Ishqui chunga huatacunatami chaipi carca. Chaipimi israelcunaca Mandaj Diosmanta achcata huacarcacuna.

³Chaimi Samuelca tucui israelcunataca: “Cancuna tucui shunguhuan Mandaj Diospajmantaj tigrarishpaca, shujtajcunapaj dioscunata, Astarot huarmi diosta cancunapuramanta anchuchishpa tucui shunguhuan Mandaj Diospajlla tucushpa paipajta ruraichij. Chaimi filisteocunapaj maquimantaca quishpichinga” nirca.

⁴Israelcunaca Baal dioscunata, Astarot dioscunata paicunapaj chaupimanta anchuchishpami, Mandaj Diospajllata rurarcacuna.

⁵Chaimi Samuelca: “Tucui israelcunata Mizpapi tandachichij. Tucui cancunamanta Mandaj Diosta ñuca mañangapaj” nijpimi,

⁶israelcunaca Mizpapi tandanacushpa yacuta huishishpa Mandaj Diospaj ñaupajpi tallircacuna. Chai punllaca ayunashpami: “Mandaj Diostaca canta p'iñachishpamari juchallishcanchij” nishpa Samuelca israelcuna mana allita rurashcataca Mizpa pueblopi allichirca.

⁷Filisteocunaca israelcuna Mizpapi tandanacushcata yachaj chayashpami, paicunata mandajcunaca israelcunata llaquichingapaj huichiyarcacuna. Chaimi israelcunaca filisteocuna llaquichinata manchashpa,

⁸Samueltaca: “Ñucanchijta filisteocunapaj maquimanta huaquichichun, ñucanchijmanta Mandaj Diosta mañanataca ama shaicushpa mañacuilla” nircacuna.

⁹Chaimi Samuelca, chuchucujraj bachujta japishpa Mandaj Diosman tucuita cushpa rupachirca. Samuelca Mandaj Diostaca caparishpa israelcunamanta mañajpimi, Mandaj Diosca pai mañashcata uyarca.

¹⁰Mandaj Diosman tucuita cushpa Samuel rupachicujpirajmi, filisteocunaca israelcunahuan macanacungapaj chayarcacuna. Ashtahuanpish Mandaj Diosca chai punllaca filisteocunapaj jahuapi yallitaj c'ulun nichishpa paicunata yallitaj manchachijpimi, filisteocunaca israelcuna mishashca saquirirca.

¹¹Chaimi israelcunaca Mizpamanta llujshishpa filisteocunataca Bet-car pueblo uranijcama catishpa huañuchircacuna.

¹²Samuelca, shuj rumita japishpami Mizpa pueblohuan, Sen pueblohuan chaupipi churarca. Chai rumitaca: “Mandaj Diosca ñucanchijtaca caicamami ayudan” nishpami, Eben-ezerta shutichirca.

¹³Chaimi filisteocunaca israelcunata manchashpa paicunapaj llajtaman yaicungapajca cutinca ña mana tigrarcacuna. Samuel mandacui tucui punllacunapimi Mandaj Diosca filisteocunataca llaquichishpa charirca.

¹⁴Israelcunaca filisteocuna ñaupaman quichushca tucui pueblocunatami, tucuita cutinllataj paicuna japircacuna. Chai pueblocunataca Ecronmanta callarishpa, Gatcamami filisteocunapaj maquimanta israelcuna cutinllataj quichurcacuna. Israelcunahuan amorreocunahuanpish macanacuica ña mana tiyarcachu.

¹⁵Samuelca tucui paipaj causaipimi israelcunata pushaj carca.

¹⁶Samuelca israelcunapurapi ima allichina tiyashcata allichingapajca Bet-el, Gilgal, Mizpa shuti pueblocunamanmi huatanta rij carca.

¹⁷Chaimantaca Ramá pueblopi caj paipaj huasimanmi tigrajlla carca. Paica chaipimi israelcunapurapi ima allichinatapish allichij carca. Chaipica Mandaj Diospaj shuj altartapishmi rurarca.