Read Chimborazo Highland Quichua 1 SAMUEL 8 Bible Online

1 SAMUEL 8 - Chimborazo Highland Quichua bible

1 SAMUEL 8

¹Israelcunaca jatun mandaj tiyachun nishpa mañashcami Samuelca ña yuyaj cashpaca, israelcunapaj juez cachunca paipaj churicunatami churarca.

²Paipaj punta churica Joelmi carca. Q'uipa churica Abiasmi carca. Paicunaca ishquindijmi Beerseba pueblopi juezcuna carca.

³Samuelpaj churicunaca, paicunapaj yaya purishca ñancunapica mana purircacunachu. Ashtahuanpish quiquinpajlla charij canata munashcamantami camaricunata japishpa, cashcata ruraj canata saquircacuna.

⁴Chaimi israelcunata cunaj yuyajcunaca tucuicuna tandanacushpa, Ramá pueblopi Samuelta ricunaman shamushpaca,

⁵cashna nircacuna: “Canca ñamari yuyajyangui. Cambaj churicunaca can purishca ñancunapica mana purincunachu. Cunanca shujtaj llajtacuna ima shinami jatun mandajta charincuna, chai shinallataj ñucanchijtapish jatun mandaj mandachun jatun mandajta churai” nircacuna.

⁶Ñucanchijta mandachun jatun mandajta churai nishcaca Samuelpica mana alli cajpimi Mandaj Diosta mañarca.

⁷Chaimi Mandaj Diosca Samueltaca: “Tucui paicuna ima nishcataca uyailla. Mana cantachu yanganchin. Ashtahuanpish ñuca paicunata ama mandachunmari ñucata yanganchin.

⁸Paicunaca Egiptomanta llujshichimushca punllamanta cunan punllacama paicuna munashcata rurashpami, ñucata saquishpa shujtajcunapaj dioscunapajta rurancuna. Chashnallatajmi cantapish ruracuncuna.

⁹Cunanca paicuna mañashcata uyailla. Jatun mandaj paicunata mandacushpaca ima shina mandana cashcata ricuchishpa tucuicunaman alli huillangui” nircami.

¹⁰Jatun mandaj tiyachun mañajcunamanca Samuelca Mandaj Dios imallata nishcata tucuita huillashpami,

¹¹cashna nirca: — Cancunata mandagrij jatun mandajca: Cancunapaj churicunata apashpami, macanacuna carrocunapi purijcuna cachun churashpa, caballocunapi purijcuna cachun churashpa jatun mandajpaj carrota ñaupashpa rijcuna cachun churanga.

¹²Maijancunataca, huaranga soldadocunata mandajcuna cachun, pichca chunga soldadocunata mandajcuna cachun, paipaj allpacunapi yapujcuna cachun, paipaj chagrapi cozichajcuna cachunmi churanga. Maijancunataca macanacunacunata rurajcuna cachun, macanacunapaj carropaj imalla minishtirishcacunata rurajcuna cachunmi churanga.

¹³Cancunapaj ushushicunataca, mishquijllata ashnajcunata rurajcuna cachun, yanujcuna cachun, tandapaj masajcuna cachunmi churanga.

¹⁴Cancunapajtapish alli allpacunata, uva chagracunata, olivos chagracunata quichushpami paipajta rurajcunaman cunga.

¹⁵Cancunapaj granocunatapish, cancunapaj uvacunatapish, pai churashca mandajcunaman, paipajta rurajcunaman cungapajmi chungamanta shujta japinga.

¹⁶Cancunapajta ruraj c'aricunatapish, huarmicunatapish, cancunapaj c'ari c'ari q'uipa huiñaicunatapish, cancunapaj burrocunatapish, paipaj imalla ruranacunapajmi apanga.

¹⁷Cancunapaj ovejacunamantapish, chungamanta shujtami apanga. Cancunapish paipajta rurajcunami canguichij.

¹⁸Cancuna agllashca jatun mandaj cancunata chashna llaquichijpimi chai punllaca caparishpa huacanguichij. Mandaj Diosca cancunataca manataj uyangachu — nircami.

¹⁹Ashtahuanpish Samuel nishcataca israelcunaca mana uyashpami: — Ñucanchijta jatun mandajca tiyanatajmi can nishpa,

²⁰ñucanchijpish shujtaj llajtacuna shinallatajmari cana canchij. Ñucanchij quiquin jatun mandajtajmi ñucanchijtaca mandana can. Macanacuicunapipish paimi ñucanchijta pushanga. Paimi ñucanchijta ñaupashpa ringa — nircacuna.

²¹Tucui israelcuna imallata nishcata uyashpaca, Samuelca Mandaj Diosman paicuna ima shina nishca shinallataj huillajpimi,

²²Mandaj Diosca Samueltaca: — Paicuna mañashcata uyashpa, paicunata mandaj cachun shuj jatun mandajta churailla — nijpi, Samuelca tucui israelcunataca: — Cancuna causacun pueblocunallamantaj tigraichijlla — nirca.