Read Chipaya MATEO 1 Bible Online

MATEO 1 - Chipaya bible

MATEO 1

¹Xalla tïćha Jesusiź tukita achchi ephnakaki, Jesusaki Davidźkiśtan niźaśa Abrahamźkiśtan oqhñitaćha:

²Abrahamki Isaacź ephtaćha, Isaacki Jacobź ephtaćha Jacobki Judá ephtaćha, niźaśa nïź jilanakźtanpacha.

³Judaki Fares, Zerahź ephtaćha niźaśa ninakź mäki Tamar. Fareski Hesronź ephtaćha, Esromki Aramź ephtaćha.

⁴Aramki Aminadabź ephtaćha, Aminadabki Nahasonź ephtaćha, Nahasonki Salomonź ephtaćha.

⁵Salomonki Booz ephtaćha, niźaśa Rahabki Booz mätaćha, Boozki Obedź ephtaćha, nïź mäki Ruttaćha, Obedki Jus ephtaćha,

⁶Jusiki rey Davidź ephtaćha. Rey Davidki Salomonź ephtaćha, ni Salomonź mäki Urías śultatuź thuntaqalćha.

⁷Salomonki Roboamź ephtaćha, Roboamki Abías ephtaćha, Abiaski Asaź ephtaćha.

⁸Asaki Josafatź ephtaćha, Josafatki Joramź ephtaćha, Joramki Ozías ephtaćha.

⁹Oziaski Jotamź ephtaćha, Jotamki Acaz ephtaćha, Acazki Ezequías ephtaćha.

¹⁰Ezequiaski Manasés ephtaćha, Manaseski Amonź ephtaćha, Amonki Josías ephtaćha.

¹¹Josiaski Jeconías ephtaćha niźaśa nïź jilanakźtanpacha, niźaśa nïpacha ni isralitanakaki Babilonia tanźku chhichśtaćha.

¹²Xalla ni tantikiśtan, Jeconiaski Salatielź ephtaćha, Salatielki Zorobabelź ephtaćha.

¹³Zorobabelki Abihudź ephtaćha, Abihudki Eliakimź ephtaćha, Eliakimki Azorź ephtaćha.

¹⁴Azorki Sadocź ephtaćha, Sadocki Aquimź ephtaćha, Aquimki Eliudź ephtaćha.

¹⁵Eliudki Eleazarź ephtaćha, Eleazarki Matanź ephtaćha, Matanki Jacobź ephtaćha.

¹⁶Jacobki Joseź ephtaćha, ni Joseki María lukutaćha, niźaśa na Marïki Jesusiź mätaćha, ućhumnakki nïźkiś Mesías khićha.

¹⁷Niźaśa Abrahamź kiśtanpacha Davidźkama qhalupaqhpikchiś matźmati watchićha; niźaśa Davidź kiśtanpacha Babilonia tanźku chhichśtakama qhalupaqhpikchiś matźmati watchićha, niźaśa Babilonia tanźku chhichtikiśtanpacha Jesusa mathtakama qhalupaqhpikchiś watchićha.

¹⁸Xalla ni Jesusa mathtaki tuźućha: Jesusiź mäki María khitiki Joseźtan śalśxapa palt'itataćha; ima pukultan qamkan Espíritu Santuź aśtan śalchinćha Neqhśtan ika khissinćha.

¹⁹Näźa luku Joseki źkayi quśśiś źoñitaćha, niźaśa ana näkiśtan chïchïś pekatćha, Mariyakiśtan xamaśit xaytiś pekatćha.

²⁰Joseki xalla nuźpäś pinsichitaćha, neqhśtan tshi Yöś anjila thxaxan wiyźkichićha tuź khikan: “José, Davidźkiśtan oqhñi, ana na Mariyatan śalś eqhsna, näźa wawaki Espíritu Santuź aśtan t'ikźtaćha.

²¹Marïki tshi Machhchiś khekićha, niźaśa nïźkiśim thüsqatakićha Jesús khikan. Xalla nïki nïź wathchiś źoñinakź ujnakkiśtan liwriyakićha.”

²²Thappacha tinakaki watchićha, niźaśa Yöś kuchanźkita chïñinakaź chïtakama watchićha:

²³“Tsha ana matiñ źonki ikakićha niźaśa tshi machhchiś khekićha, xalla nïźkiśiki Emanuel thüsqatakićha” (Emanuelki khićha: “Yöśki ućhunakatanćha”).

²⁴Joseki thxaxi wathźku, Yöś anjilaź chïtakama pächićha, neqhśtan na Mariyatan śalśićha.

²⁵Niźaśa Joseki anapan María xañchi paxchićha, ni tayna wawa mathśkama, niźaśa ni Joseki Jesús khita thüsqatchićha.