Read Chipaya MATEO 10 Bible Online

MATEO 10 - Chipaya bible

MATEO 10

¹Ni Jesusaki nïź qhalu piśkchiś thaxinta źoñinaka qhawśićha, ninakźkiś jilir aśi thächićha ni yenqhanaka chhetqataxu, niźaśa thapaman konanaka ćhhetnaxu niźaśa xañchi miśqatñi źoñinakami.

²Xalla tïnakaćha ni qhalu piśkchiś illśta źoñinakź thüki: Tukkinaki Simunaćha, xalla tïki Piru khitaśaqaśśa, niźaśa Andreski nïź laqhtaćha; Santiaguźtan Juanźtan jilaśullkataćha Zebedeoź machhwichnakataćha;

³niźaśa Felipe, Bartolomé; Tomasa niźaśa Mateo, ti Mateoki Romźta taśa mayñitaćha, niźaśa Jacobuki Alfeoź machhtaćha niźaśa Lebeoki Tadeo;

⁴niźaśa Simunaki Cananeo t'aqkiśtantaćha, niźaśa Judas Iscariotiki wiruñ Jesusa millk'untichićha.

⁵Jesusaki nïź qhalu piśkchiś thaxinta źoñinaka kuchanchićha, śumpacha iwxt'iźku tuź khikan: “Anćhukki anaź ni ana Yöś kirïchi źoñinakź yoqqhutñik oqakićha, niźaśa anaź ni Samaria khita wathkiś luśhaki.

⁶Anćhukki Israel wathchiś qatchi üśa nakźqhutñiź oqakićha.

⁷Niźaśa anćhukki oqa ni tsewkta Yöś irpiś wathaki keźunskichićha, xalla nuź palxayakićha.

⁸Niźaśa lä źoñinakaź ćhhetnakićha, niźaśa tikhśi źoñinaka jakatatsqatakićha, niźaśa ni moqhś konkiśtan źhujźinakićha, niźaśa anaśum yenqhanaka chhetqatakićha. Anćhukki Yöś aśi ana pakśuñ tanśinćhukćha, niźaśa anćhukki anaź mayakićha ni ćhhetinźkuki.

⁹“Niźaśa anćhukki anaź chhichakićha ni qorimi niźaśa päśmi niźaśa churimi

¹⁰Ana jikhśxapaki źaqami chhichakićha niźaśa ana turkiś śkitimi niźaśa ana ćhhatami niźaśa ana athsmi; xalla ni lanqśñi źoñiki ćhheri lulhchi panqaź khekićha.

¹¹“Neqhśtan tshi watha irantiźku uśh qolta watha irantiźkumi śuma źoñipanź qhurźnakićha, niźaśa xalla nïź qhuykiś eklakićha anćhukki, ni qhuykiśtan oqhśkama.

¹²Niźaśa ni qhuykiś luśhkanaki neqhś źelhñi źoñinakźkiś tsänakićha.

¹³Niźaśa ni źoñinakaź śuma khenaki, Yöś śuma qamañaki ninakźkiś khekićha; niźaśa ni źoñinakaź ana śuma khenaki, anćhukki Yöśtanpanćha anaź ćhhulumi apt'ićha.

¹⁴Niźaśa xaqhsiltata źoñimi ana anćhuk tanśpekakiź nïki, niźaśa anaź nonśmi pekakiź nïki, ni qhuykiśtan niźaśa ni wathkiśtanami ulnakićha neqhśtan ni qhxochkiś skatchi philanaka tsath tsathsnakićha.

¹⁵Werhki cheqpachal chiyućha xalla ni phalś tuñkiśki, tshanti kaśtiktaź khekićha ni Sodoma Gomorra khita wathkiśtan, ni anćhuk ana thewśñi wathanakaki.

¹⁶Werhki anćhuk kuchnućha tshi üśa qitinakź taypikiśtaqaś. Niźaśa anćhukki walxa naynayiź khekićha ni śqoraźtaqaś, niźaśa anćhuka quśki palomaźtaqaś śuma khekićha.

¹⁷Ni anaśum źoñinakźkiśtan kuytaśakićha, ninakaki anćhuk chawkh jilirinakźkiś thäkićha, niźaśa anćhukki ni akhs qhuyaran xwattaź khekićha

¹⁸niźaśa weriź khen anćhukki ni irpiñi jilirinakźkin niźaśa reynakźkin thätaź khekićha; xalla neqhśtan anćhukaltaki wethkiśtan maśinś źelakićha ninakź tukkiś niźaśa ni ana Yöś kirïchi źoñinakźkiśimi.

¹⁹Niźaśa anćhukki ni jilirinakźkiś thätaź khen, anaź llakiśakićha ćhhulu chïś khenami, xalla ni chïś ora irantiźkitan Yöś anćhukakiś ćhhulu chïś khenami thaxźkakićha.

²⁰Anaź anćhukki chiyakićha, ni anćhuka Yöś Ephź Espirituź anćhukakiś chïqatakićha.

²¹“Niźaśa jilanakaki perśun laqhnakaź tikhźnaxu thäkićha, niźaśa ephnakaki perśun machhnakaź thäkićha; niźaśa matinakaki ephźtan moq'u khisnakićha niźaśa konqatakićha.

²²Thappacha ti yoqkiś źelhñi źoñinakaki weriź khen anćhuk ćhhaxwakićha; xalla ni tukuśinskama weth manta päñi źoñiki xalla nïź liwrïtak khekićha.

²³Neqhśtan ni chawkh wathkiś anćhuk qhuran, xochqhutñi śhoxźnakićha; cheqpachal khiwćha ni źoñź Matiki ima anćhukaź ni Israel chawkh wathanaka muyi źerźnan thonakićha.

²⁴“Anaź xaqhsilta thaxinta źoñinakami nïź thaxiñiźkiśtan tshanti śiśñi khesaćha, niźaśa ana xaqhsilta uywitami nïź uywiñiźkiśtan tshanti khesaćha.

²⁵Ni thaxintanakaki nïź thaxiñi źoñi irata khiś pekśtanćha, niźaśa ni uywitaki ni uywiñi irata khiś pekśtanćha. Niźaśa tshi qhuy ephki Beelzebú khitaźlax nïki, ¡Tshanti nïź qhuy źoñinakźkiś khekićha!

²⁶“Niźaśa anaź źoñinaka eqhsna, anaź ćhhulu śhoxtami źelasaćha, ni śhoxtanakaki wathźtapanqaś khekićha, niźaśa anaź ana śiśta źelasaćha ni ana śiśtaki śiśtaqaś khekićha.

²⁷Niźaśa weriź sumchikiś chïtaki, anćhukki chiyakićha thuñ qhankiś; niźaśa xamaśit chïtaki anćhukki qhuy juntuñkiśtanpacha qhawakićha.

²⁸Niźaśa ni xañchi konñinaka ana eqhsna, ninakaki anaź animu koni atasaćha; ans anćhukki eqhsna, ni animu niźaśa ni xañchi ni sumchi laqhkiś t'aqhiśsqatñi.

²⁹“¿Anaź piśk weźlallanakaki tshi päśuñ tuyasaćha? Anaź xaqhsiltami ninakźkiśtan yoqkiś thxotsnasaćha, ima anćhuka Yöś Ephź munanaki.

³⁰Niźaśa Yöś Ephźkiśiki anćhuka ach charaki thappacha qantaćha.

³¹Niźtikiśtan anćhukki anaź eqhsna: Anćhukki ni tama weźlanakźkiśtan tshantiź kuśtićha.

³²“Niźaśa jëkit weth tukatu źoñinakź tukkiś chiyaćhaxa, niźtaśaqaś werhki ni źoñź tukatu chiyaćha ni weth tsewkta Ephź tukkiśki;

³³niźaśa xaqhsilta źoñit źoñinakź tukkiś werh ana paxñi chiyaćhax nïki, niźtaśaqaś werhki ana paxñi chiyaćha ni weth tsewkta Ephźkiśiki.

³⁴“Niźaśa anćhukki anaź pinsa, werhki ti yoqkiś anaź śuma qamaña śhikchin; niźaśa werhki anaćha ni śuma qamañchiśnaka chhichi thonchinki, anstï źoñinaka aphthapi thonchinćha.

³⁵Niźaśa werhki aphthapi thonchinćha ni ana Yöś kirïchi machhtan niźaśa Yöś kirïchi ephźtan moq'u khisqatśxapa, niźaśa na mathki źmätan moq'u khekićha niźaśa waśki näź qhan mätan moq'u khekićha;

³⁶niźaśa śapamayni źoñinakź moq'uki qhuy źoñinakpachaź khekićha.

³⁷Niźaśa wethkiśtan tshanti nïź mä eph pekñi źoñiki, anaź wethta khiś wakiśićha; niźaśa wethkiśtan tshanti nïź uśha niźaśa nïź uśh pekñi źoñiki, anaź wethta khiś wakiśićha;

³⁸niźaśa ana nïź kuruśha chhichku werh apśñiki, anaź wethta khiś wakiśićha.

³⁹Xalla ni perśun źeti liwrïś pekñiki apt'akićha, niźaśa xalla ni perśun źeti weriźkhen apt'iñiki liwrïtaź khekićha.

⁴⁰“Niźaśa anćhuk tanśñinakaki werh śaqaś tanźa; niźaśa ni werh tanśñiki, ni werh kuchanźkiñi śaqaś tanźa.

⁴¹Niźaśa ni Yöśkiśtan chïñi tanśñiki, tshi Yöśkiśtan chïñiź taqaś, xalla nïki tshi Yöśkiśtan chïñi irataź tanźnakićha; niźaśa ni źkayi quśśiś źoñi tanśñiki, tshi źkayi quśśiś źoñiźtaqaś, xalla nïki ni źkayi quśśiś irataź tanźnakićha.

⁴²Niźaśa xaqhsilta źoñimiź werh apśñiź khen, ti qoltallanakźkiś tshi ch'uñur qhaślla onanćhaxa, niźaśa werhki cheqpachal chiyućha ni onañiki, ni onanś thätaźkhekićha.”