Read Chipaya MATEO 12 Bible Online

MATEO 12 - Chipaya bible

MATEO 12

¹Ni pacha Jesusaki tshi śawatu jejś thuñ nöx śqal taypiran oqatćha. Nïź thaxintanakaki ćhheri eksqatchićha, neqhśtan tiriku ćhheri k'uti qallantichićha niźaśa lulhchićha.

²Ni k'utñi cherźku ni fariseonakaki Jesusiźkiś khichićha: — Cherźna, ni amiź thaxintanakaki ni śawatu ana päśnakaź päćha.

³Ni Jesusaki ninakźkiś qhäśićha: — ¿Anapan ni Davidź päta lïchinćhuk qhaźtataxo?, tshi wilta nïki nïź maśinakźtan añcha ćhheri eksqatchila.

⁴Davidki Yöś qhuykiś luśhśićha neqhśtan ana ina źoñź lulhś t'anta lulhchićha, ni t'antaki anataćha ni Davidź lulhśki niźaśa nïź maśinakami, ni t'antaki timlu jilirinakaqaśtaź lulhñiki.

⁵¿Uśh anapan Moisés lï lïchinćhuk qhaźtataxo? Ni timlu jilirinakaki ni śawatu jejś thuñkiś anapanź jejźla, niwktanaki ni śawatu jejś thuñkiś ujź päćha, neqhśtan ana ujchiśtćha khićha ninakaki.

⁶Niźaśa weraral khiwćha, xalla teqśiki timlukiśtan tshan cheqan źoñiź źelhćha.

⁷Xalla ti chïta taqunakaź näśax anćhukki: ‘Werhki źoñinaka oqśñil pekućha, niźaśa anal uywi wilananaka pekućha, xalla ni khjirtaź näśnasaź anćhuk nïki anaź ni śuma źoñinaka ujkiś thxotsqatasaćha.’

⁸Niźaśa ni źoñź Matiki ni śawatu jejś thuñkiśtan jiliriśaqaśśa.

⁹Neqhśtan Jesusaki oqhchićha niźaśa ninakź akhs qhuykiś luśhśićha.

¹⁰Xalla neqhśi tshi qhara qhonchi źoñi źelatćha; niźaśa ni fariseo źoñinakaki Jesusiź uj jesanśpekatćha, niźtikiśtan Jesusa pewkśićha: — ¿Ni śawatu jejś thuñkiś tshi lä źoñi ćhhetnaxkhitapanqay?

¹¹Jesusaki ninakźkiś qhäśićha: — ¿Xaqhsilta anćhukakiśtan, tshi śawatu jejś thuñkiś anćhuka üśa tujkiś thxotsnasaź nïki, anam ni orapacha xöźnasaya?

¹²Niźaśa ¡Tshi źoñiki tshi üśikiśtan tshantiź kuśtićha! Niźtikiśtan ni śawatu jejś thuñiki śumanaka päśkhitapanćha.

¹³Neqhśtan Jesusaki ni lä źoñźkiś khichićha: — Am qhara wäźna. Neqhśtan ni źoñiki nïź qhara wäśićha, niźaśa nïź qharaki źethchi khissićha nïź tshi qhara irata.

¹⁴Xalla ni fariseo źoñinakaki neqhśtan ulanźku, Jesusa konśxapa qaśśićha.

¹⁵Niźaśa Jesusaki niźta śiśku neqhśtan oqhchićha, niźaśa tama źoñinaka ni apśićha. Neqhśtan Jesusaki thappacha ni lä źoñinaka ćhhetnatćha.

¹⁶Neqhśtan ni ćhhetinta źoñinakźkiś śumpacha iwxt'ichićha ana jëkhźkiśimi chïchiyaxu.

¹⁷Xalla tuź ni Isaías Yöś kuchanźkita chïñiź khjirtaki watchićha, nïki tuź khichićha:

¹⁸“Xalla tïćha weth manta päñiki, xalla tïpan illśinćha, wethkiś añcha q'ayaćha, niźaśa nïźtan añchal chipućha. Xalla nïźkiś weth Espiritul thäćha, Niźaśa nïki ni chawkh wathanakźkiś Yöś lï maśnakićha.

¹⁹Niźaśa anaź qhäśnakićha niźaśa anaź qhawakićha; niźaśa anaź jëkhmi nïź xora nonźnakićha ni wath moraran.

²⁰Niźaśa ni źotsi kaña anaź qholakićha, Niźaśa ni chöchi michami anaź thesakićha, nïź irpiś watha thulśkama.

²¹Ni chawkh wathanakaki Jesusiźkin tasnakićha.”

²²Jesusiźkin tshi śur up źoñi chhichchićha nïki anaśum yenqhaź tantataćha, neqhśtan ni Jesusaki ni śura cherqatchićha niźaśa chïqatchićha.

²³Thappacha ni źoñinakaki iśpantichi pewksasatćha: “¿Tïx Davidź Mati khesay?”

²⁴Xalla ti nonźku ni fariseo źoñinakaki khetćha: “Beelzebuki anaśum yenqhanakź chawkh jilirićha, nïćha ti Jesusiźkiś aśi thächiki chhetqatśxapa.”

²⁵Xalla ni Jesusaki ninakź pinsita śiśku, ninakźkiś khichićha: “Thapa t'aqsi chawkh wathaki ninakporaź aqsnakićha; niźaśa tshi wathkiśtan t'aqsimi niźaśa tshi qhuykiśtan t'aqsi źoñimi niźtaśaqaś ninakaki anaź thurasaćha.

²⁶Niźtaśaqaś, ni Saxraki nïź Saxri maśi chhetqatasaź nïki, ninakpora t'aqsku: ¿Xaqhnuź ninakź aśi waqaychasaxo?

²⁷Anćhukki wethkiś khinćhukćha, ni Beelzebuź aśtan anaśum yenqhanaka chhetqatćha; xalla nuź khesaź nïki, ¿jëkht anćhuka apśñinakźkiś aśi thäñi chhetqatśxapaxo? Niźtikiśtan ninakpachaź anćhukakiś thëźa ana śumaćha khikan.

²⁸Werit anaśum yenqhanaka chhetqatućhax nïki ni Yöś Espirituźtan, xalla nïki thëźa Yöś irpiś wathaki wax anćhukakiś irantiźkichićha.

²⁹“¿Xaqnuźt xaqhsilta źoñi tshi aśśiś źoñź qhuya luśhi atasaxo nïź qinasinaka khiśñimi, ima aśśiś źoñi ćhelhźku? Tukiki ni aśśiś źoñi ćhelhśtantaćha nïź qinasinaka khiśśapaki.

³⁰“Xaqhsilta źoñiźlax ana weth tukatu, xalla nïki wethtan moq'ućha; niźaśa xaqhsilta źoñit ana werh źoñinaka śhiki yanapćhax nïki, xalla nïki źoñinakaź witcha.

³¹“Niźtikiśtan anćhukakiś khiwćha, Yöśki thappacha anćhuka ujnakźkiśtan niźaśa anćhukaź anaśuma chïtikiśtanami śumansnakićha, xalla ni Espíritu Santuźxapa chuchñi źoñiki anaź śumansqatta khekićha.

³²Niźaśa Yöśki śumansnasaćha ni źoñź Matźxapa moq'u chïñinakźkiśtan, niźaśa xalla ni Espíritu Santuźxapa moq'u chuchñi źoñiki anaź śumansqatta khekićha, ana tïpachami niźaśa ana uśhka thonñi thuñkiśimi.

³³“Niźaśa śuma muntiźlax nïki, śuma ćhheripanź poqćha; niźaśa tshi anaśum muntiki anaśum ćhheripanź poqćha; niźtikiśtan tshi muntiki nïź ćhherkiśtanqaś paxśa.

³⁴¡Śqorkiśtan thoninćhukćha! ¿Xaqhnuź anćhuk śuma chiyasaxo, anćhukpachaćha ñexwćhukki? Niźaśa ćhhulu anćhuka quśkiś źelhćhaxa ni atakiź chïćha.

³⁵Niźaśa ni śuma źoñiki śuma ćhhultaqinakapanź chïćha, xalla nïźkiśiki śuma quś źelhćha; niźaśa ni ñexw źoñiki anaśum ćhhultaqinakapanź chïćha, xalla nïźkiśiki anaśum quś źelhćha.

³⁶Neqhśtan cheqpachal khiwćha, ni juyśu thuñkiśiki ni ana śuma chïtanakami thappacha tsirakićha.

³⁷Neqhśtan amki perśun taqupachaź anćhuk juchjiptayakićha, niźaśa śuma khikumi uśh ana śuma khikumi.”

³⁸Yeqhap fariseo źoñinakźtan niźaśa ni lï utt'ayñinakźtan Jesusiźkiś khichićha: — Thaxiñi, werhnakki am chimpu päñil cherśpekućha.

³⁹Jesusaki ninakźkiś qhäśićha: — Ti ñexw źoñinaka niźaśa ana Yöś kirïñinakaki tshi chimpunakaqaś thëśñi pekćha, xalla ti źoñinakźkiś anaź iya thëźta khekićha, ni Jonás Yöśkiśtan chïñiźkiś thëźta irataki.

⁴⁰Xalla ni Jonaski chheph max wëntiźtan maxintiźtan tshi paqh ch'iś phuchhś qhulltan źelhchićha, niźtaśaqaś ni źoñź Matiki chheph max wëntiźtan maxintiźtan ti yoq tuśhkiś źelakićha.

⁴¹Ni juyśu thuñkiśiki ni Ninive wathchiś źoñinakaki jakatatakićha, neqhśtan ti xaśta źoñinakźxapa źaxwakićha ninakź ujkiśtan juchjiptayan, niźaśa ninakaki ti xaśta źoñinakźkiś ujchiśśa khekićha; neqhśtan ni Jonás maśintikiśtan ni Ninive wathchiś źoñinakaki Yöśkin qhutśićha, niźaśa anś teqhś źelhñiki Jonaskiśtan tshan paqhićha.

⁴²Niźtaśaqaś ni juyśu thuñkiś na warti reyniki jakatatakićha ti xaśta źoñinaka juchjiptayan, niźaśa näki ti xaśta źoñinakźkiś ujchiśśa khekićha; xalla na źonki muspa aźkiśta yoqkiśtanpacha thonchinćha Salomón śiśta taqu nonśñi, niźaśa anś teqhś źelhñiki Salomonźkiśtan tshan paqhićha.

⁴³“Niźaśa tshi yenqhaki źoñźkiśtan ulanźku, qhoñ yoqaranź oqhlayćha jejś qhurkan; niźaśa ana wathźku pinsićha:

⁴⁴‘Weth qhuyal kepaćha, xaqhsikiśtan ulanchinźlax xalla nikhu.’ Xalla nuź kephźku ni źoñi śalćha, tshi śuma pewźta qhuyaźtaqaś niźaśa lächi śuma thakśta.

⁴⁵Neqhśtan ni yenqhaki oqhźku towqu yenqhanaka akhsqatźkichićha nïźkiśtan tshallan anawalinaka, neqhśtan ni yenqhanakaki thappacha luśhśa ni źoñźkiś qami, neqhśtan ni źoñiki tshanti ana wali khissa nïź tuki qamtikiśtan. Xalla niźtaśaqaś ti ñexw źoñinakźkiś watakićha.”

⁴⁶Jesusaź tira ni źoñinakźta parlan, nuźkhen Jesusiź mäki nïź laqhnakźtan thonchinćha, nïźtan parliś pekatćha. Neqhśtan ninakaki śanku eklichinćha.

⁴⁷Neqhśtan ni źoñinakźkiśtan tshïsuña Jesusiźkiś maśśićha: — Am mä niźaśa am laqhnakźtan ti śanku thewźa, niźaśa amtanź parliś pekćha.

⁴⁸Niźaśa Jesusaki ni maśñi źoñźkiś qhäśićha: — ¿Jëkht weth mäxo jëkhpan weth laqhnakaxo?

⁴⁹Neqhśtan Jesusaki nïź thaxintanakźkiś qharźtan thëźku khichićha: — Tinakaćha weth mäki, niźaśa tinakaśaqaśśa weth jilanakaki.

⁵⁰Xaqsiltat weth tsewkta Yöś Ephź quśkama qamćhaxa, nïćha weth jilaki, näćha weth kullakiki, niźaśa näćha weth mäki.