Read Chipaya MATEO 2 Bible Online

MATEO 2 - Chipaya bible

MATEO 2

¹Jesusaki Belén wathkiś Judea khita yoqkiś mathtaćha, ni Herodeski nïpacha reytaćha, niźaśa Magonakaki tuwanta yoqkiśtan Jerusalén watha irantiźkichićha, ni Magonakaki warawaranaka qhurñitaćha śiśxapa,

²niźaśa ninakaki pewkśićha: — ¿Xaqhsikin ni judiunakź uśhka mathta reyxo? Niźaśa nïź warawara tuwanta yoqkin werhnakki cherchinćha niźaśa nïźkiś amtil thonućha.

³Ni rey Herodeski, xalla ni Magonakaź chïta nonźku muspaysi khissićha, niźaśa ni Jerusalén wathchiś źoñinakami muspaysi khissiśaqaśśa.

⁴Niźaśa ni rey Herodeski qhawśñi kuchanchićha, thappacha ni timlu chawkh jilirinaka niźaśa lï utt'ayñinaka, ninakźkiś pewkśićha xaqhsikin Mesías khita mathśtantaxo.

⁵Ni źoñinakaki qhäśićha: — Ni Belén wathkiś Judea yoqkin; xalla nuź khjirchićha ni Yöś kuchanźkita chïñiki:

⁶‘Niźaśa ni Belén Judá yoqkiś, anaź amki añcha qoltallam ni cheqan chawkh wathnakźkiśtan niźaśa amkiśtan tshi irpiñi ulnakićha xalla nïki weth Israel wathaź irpakićha.’

⁷Neqhśtan Herodeski ni Magonaka xamaśit qhawśićha, niźaśa ninakźkiśtan śumpacha ni warawara thensi thuñi śiśśićha.

⁸Xalla neqhśtan ninaka, Belén watha kuchanchićha tuź khikan: — Ni Belén watha oqa, niźaśa ni uśhkiśtan śumpacha purwiyt'akićha; neqhśtan ni uśha wathźku wethkiś maśkakićha, niźaśa werhśaqal ni uśha amti oqaćha.

⁹Xalla ni reyź chïtanaka nonźku, ni Magonakaki Belén watha oqhchićha. Niźaśa ninakaź tuwanta yoqkin cherta warawaraki ninakź tukkin oqatćha, niźaśa ni warawaraki ni uśha xaqhsikiś mathtataźlaxa, xalla ni juntuñ tshitsićha.

¹⁰Xalla ni Magonakaki ni warawara cherźku añcha chipchićha.

¹¹Neqhśtan qhuya luśhśićha, niźaśa ni uśha Mariy mätanpacha cherśićha; niźaśa nïź tukkiś killśićha, niźaśa ni uśhkiś amtichićha. Neqhśtan ninakź päś pitaja khetźku qori niźaśa inśinśu niźaśa mirra onanchićha.

¹²Xalla neqhśtan ni magonakźkiś ćhhüsqatchćha, ana Herodes qhutñi kuttaxu, neqhśtan ninakaki ninakź yoqa yaqha jikhśuñ kuttichićha.

¹³Xalla ni Magonakaź oqhtan, tshi Yöś anjilaki Joseź thxaxan ćhhüsqatchićha, tuź khikan: “Źäźna, ni uśha niźaśa mätanpacha źinźna niźaśa chhichku oqa ni Egiptu yoqa. Xalla nikhum eklakićha werh maśinśkama, ni Herodeski ti uśha konśxapa qhurakićha.”

¹⁴Joseki źäźku ni wënpacha, ni uśhtan niźaśa mätanpacha chhichku oqhchićha Egiptu oqhñi jikhśqhutñi.

¹⁵Xalla nikhu Herodes tikhśkama źelhchićha. Xalla nuźupan watchićha, Yöś Ephź kuchanźkita chïñinakź taqukama: “Ni Egiptukiśtan weth Machh qhawśinćha.”

¹⁶Neqhśtan Herodeski näśićha ni Magonakaź q'ottikiśtan, niźaśa muspa ana wali źaxwchićha, neqhśtan piśk watkiśtan qossuk okhalanaka konźkaxu kuchanchićha, thappacha ni Belén wathchiś niźaśa ni wath muytata źelhñinakźkinami.

¹⁷Xalla nuź watchićha ni Jeremías Yöś kuchanźkita chïñiź chïtakama: Xalla tuź khichićha:

¹⁸“Tshi xora qhawñi Ramakin nonźtaćha, qäyi niźaśa chawkh llaki. Na Raquelki, näźa okhalźkiśtan qätćha niźaśa ana quśtami iyawkhetćha xalla ni okhalanaka tikhśiźkhen.”

¹⁹Xalla ni Herodes tikhźtikiśtan, tshi Yöś anjilaki Joseź thxaxan ćhhüsqatchićha Egiptu yoqkiś źelan, niźaśa tuź khichićha:

²⁰“Źäźna, ni uśha niźaśa mätanpacha źinźna niźaśa Israel yoqa kutta, xalla ni uśha konś pekñinakaki tikhśićha.”

²¹Neqhśtan Joseki źäźku, nïź uśha niźaśa mätanpacha źinśićha, neqhśtan Israel yoqa oqhchićha.

²²Xalla neqhśtan Joseki ni Arquelao nïź ephź Herodes irpiśkiś irpan, Joseki ni watha oqhś eqhsićha; niźaśa Yöś Eph Joseźkiś thxaxan ćhhüsqatchićha Galilea yoqa oqaxu.

²³Xalla ni yoqa irantiźku, Nazaret chawkh wathkiś qami qallantichićha, xalla tïki watchićha ni Yöś chïñinakaź chïtakama; ni Jesusaki Nazareno khitaśaqaś khiśtanćha.