Read Chipaya MATEO 20 Bible Online

MATEO 20 - Chipaya bible

MATEO 20

¹“Xalla ni tsewkta irpiś wathaki, tshi źoñi lanqśnakchiśtaqaśśa, ni źoñiki wentan lanqśñi źoñinaka qhuri ulanchićha nïź uw śqala lanqśñixapa.

²Neqhśtan ni lanqśñi źoñinakźtan tshi nöx lanqś pakkiśtan palt'ichićha, neqhśtan nïź uwa lanqś yoqa kuchanchićha.

³Neqhśtan maxiñxapa wilta ulanchićha, wath morkiś ana lanqśśiś źoñinaka cherchićha.

⁴Niźaśa ninakźkiś khichićha: ‘Anćhukmiź weth uwa lanqś yoqkin oqalla, niźaśa werhki xaqnuźuqat wakiśaćhani xalla nuź pakaćha.’ Neqhśtan ninakaki oqhchićha.

⁵Niźaśa ni tuyñuki taypuru wilta ulanchićha, niźaśa śeśike wilta ulanchićha, neqhśtan niźtaśaqaś pächićha.

⁶Niźaśa maxña qaq ora wilta wath mora kephchićha, niźaśa neqhśi ana lanqśśiś źoñinaka śalchićha. Ninakźkiś pewkśićha: ‘¿Qhaźtikiśtan anćhuk töx thuñi ana lanqźku qamxo?’

⁷Niźaśa ninakaki qhäśićha: ‘Anaź jëkhmi werhnak rokchiki.’ Neqhśtan ninakźkiś khichićha: ‘Anćhukmiź weth uwa lanqś yoqkin oqalla.’

⁸“Neqhśtan thuñiź qattan, ni tuyñuki nïź lanqśñi irpiñiźkiś khichićha: ‘Ni lanqśñi źoñinaka qhawźka, niźaśa ni wiri lanqśñi luśhñinakźkiśtan paki qallantakićha niźaśa tuki lanqśñi luśhśinakźkiś źerźnakićha.’

⁹Ni maxña qaq ora lanqśñi luśhśinakaki thonchićha, niźaśa śapa mayni tshi nöx lanqś paka tanśićha.

¹⁰Neqhśtan ni tuki lanqśñi luśhśi źoñinakźkiś pakś thonchićha, niźaśa ninakaki jila paka tanźnaźkä khikan pinsichitaćha; niźaśa śapa mayni ninakaki tshi nöx lanqś paka tanśićha.

¹¹Neqhśtan paka tanźku, ni tuyñuźxapa chuchi qallantichićha,

¹²tuź khikan: ‘Ninakaki tshi upakamaqaś lanqśićha, niźaśa amki wethnakatan chikata ninakźkiś pakchamćha, werhnakśti śitapacha ni lanqśñi niźaśa ni sï qhaqimi awantichinćha.’

¹³Xalla ni tuyñuki qhäśićha ninakźkiśtan tshi suñźkiś tuź khikan: ‘Jila, anal amkiś ana śuma pawućha. ¿Anax amki wethtan tshi nöx lanqś paka palt'ichamxo?

¹⁴Am paka tanźku oqa. Niźaśa werhki ti wiri lanqśñi luśhśiźkiś amkiś pakta irata pakśpekućha,

¹⁵werhki xaqhnuź weth päśtan päśpekućhaxa xalla nuź päsaćha. ¿Uśh weriź śuma khen amki iñiśixa?’

¹⁶“Niźaśa anś wirkin khiñinakaki tukkinź khekićha; niźaśa anś tukkin khiñinakaki wirkinź khekićha.”

¹⁷Jesusaki Jerusalén jikhśkiś oqhkan, nïź qhalu piśkchiś thaxintanaka yaqhikin qhawźku khichićha:

¹⁸— Anćhuk qhaźtaź nay, xaśiki Jerusalén wathaź oqhćha, ni źoñź Mati thätaź khekićha ni timlu chawkh jilirinakźkiś niźaśa ni lï thaxiñinakźkiśimi, neqhśtan konqatśxapa thäta khekićha,

¹⁹xalla neqhśtan yaqha wathchiś źoñinakźkiś thätaź khekićha nïźkiśtan iñaraxu, niźaśa qichaxu, neqhśtan kuruśhkiś ch'awkta khekićha; xalla neqhśtan chheph maxkiśtan jakatatakićha.

²⁰Neqhśtan Santiago niźaśa Juanź mäki näźa matinakźtanpacha Jesusiźkiś makhatźku nïź tukkiś killśinćha tshi oqśñi mayśxapa.

²¹Jesusaki ninakźkiś pewkśićha: — ¿Ćhhuluź anćhuk pekxo? Näki qhäśinćha: — Am irpiś wathkiś mantalla ti weth matinaka tshïki źewqhuttan niźaśa tshïki śqarqhuttan julźnaxu.

²²Neqhśtan Jesusaki qhäśićha: — Anćhukki anaź śiśśa ćhhuluź mayćhaxa. ¿Anćhukki weth likhś taskiśtanź ni xar qhaś likasaxo? Ninakaki khichićha: — Atasaćha.

²³Neqhśtan Jesusaki ninakźkiś qhäśićha: — Anćhukki ti xar qhaś likakićha, niźaśa ni weth źew qhuttan niźaśa śqar qhuttan julśki anaź werh ni thäś wakiśićha, ans thätaź khekićha jëkhnakźtaqaś weth eph thakśiźlani xalla ninakźkiś.

²⁴Neqhśtan xalla ti nonźku ni qhalu thaxintanakaki, ni pukultan jilaśullkiźxapa źaxwchićha.

²⁵Neqhśtan Jesusaki qhawźku ninaźkiś khichićha: — Niźaśa anćhukki śiśśa, ni ana Yöś kirïchi poraqaś ni chawkh jilirinakaki ninakź munañpikiś ni źoñinaka irpićha, niźaśa ninakporaqaś jiliri khissa.

²⁶Niźaśa anćhukakiś ana niźta khiśtanćha. Xalla ni anćhukakiśtan irpiś pekñiki, thapatiź manta päśtanćha;

²⁷niźaśa xaqhsiltat anćhukakiśtan tukkin khiś pekćhax nïki, thapa źoñinakź manta päñi khiśtanćha.

²⁸Xalla niźtaśaqaś, ni źoñź Matiki ana liwta khiśxapa thonchićha, ans manta päśxapa thonchićha, niźaśa nïź źeti thäśxapa paka kunta, thapa źoñinaka liwrïśxapa.

²⁹Ninakaź Jericó wathkiśtan ulnan, tama źoñinaka Jesusa apśićha.

³⁰Pukultan śuranaka jikhś atkiś julśi źelatćha, xalla ni Jesusa watñi nonźku qhawchićha: — ¡Yöś tata, Davidź matimćha, werhnakź oqźnalla!

³¹Ni źoñinakaki ni śuranakźkiś ujźnatćha ch'uj źelaxu, xalla ni śuranakaśtï tshanti qhawatćha: — ¡Yöś tata, Davidź matimćha, werhnakź oqźnalla!

³²Neqhśtan Jesusaki t'ukźku ni śuranaka qhawśićha, neqhśtan ninakźkiś pewkśićha: — ¿Ćhhulu päñiź anćhuk werh pekxo?

³³Ninakaki qhäśićha: — Yöś tata, cherś pekućha werhnakki.

³⁴Jesusaki ninaka oqźku ninakź źhuki lanźinchićha. Ni orapacha ni śuranakaki cherñi khissićha, neqhśtan Jesusiźtan chika oqhchićha.