Read Chipaya MATEO 21 Bible Online

MATEO 21 - Chipaya bible

MATEO 21

¹Ni Jerusalén wath keźu khen, niźaśa Betfagé khita qhuyanaka irantiźku, Jesusaki nïź pukultan thaxintanaka kuchanchićha ni Olivu khita kurkin, wën

²tuź khikan: — Ućhhun tukkin qolta wathaź źelhćha xalla nikhuź oqa, xalla neqhśi tsha aśnim śalakićha tshi ker aśnullchiś, neqhśtan jerźkuź śhikna.

³Niźaśa xaqhsilta źoñimiź anćhukakiś pewkźnasaćha, anćhukki chiyakićha Yöś tataź pekćha, niźaśa upakhiźkul anćhukakiś śhiknaćha.

⁴Xalla tïki watćha ni Yöśkiśtan chïñiź khjirta, xalla tuź khjirchićha wataxu:

⁵“Sión chawkh wathźkiś chiya: ‘Cherźna, am Reyki amkiś thonćha, niźaśa llanulla lhat aśnakiś yawchi, niźaśa tshi ker aśnullchiś, tshi quźi xoxoñi uywiź tsjikallkiś.’ ”

⁶Neqhśtan nïź thaxintanakaki oqźku Jesusaź chïtakama pächićha.

⁷Neqhśtan ninakaki na aśni nïź tsjikallźtanpacha akhźkichićha, niźaśa ninakź irśnaka karunźinchićha neqhśtan Jesusaki na aśnakiś yawśićha.

⁸Niźaśa tama źoñinakaki thewźnatćha. Yaqhapanakaki nïź oqhś jikhśkiś ninakź irś śkitinaka chhiñatćha, niźaśa yaqhapanakaśti ni munti thaśna murtanaka jikhśkiś chhiñatćha.

⁹Jesusiź tukkin, oqhñi źoñinakaki niźaśa wirkin thonñi źoñinakami, qhawi qallantichićha: — ¡Xallalla, ni David reyź Matiki! ¡Añcha walix khila ni Yöś thükiś thonñiki! ¡Xallalla ni tsewkta Yöś wathkinaki!

¹⁰Jesusaź ni Jerusalén wathkiś luśhtan, thappacha ni chawkh wathaki ch'axmi pächićha, niźaśa wakchi źoñinakaki pewkźnatćha: — ¿Jëkhpan tïxo?

¹¹Niźaśa ni źoñinakaki qhäśnatćha: — Ti Jesusaki Yöśkiśtan chïñićha, ni Nazaret wathchiś Galilea khita yoqkiśtan.

¹²Jesusaki timlukiś luśhku, niźaśa śawkchuk thapa ni tuyñi niźaśa qhayñi źoñinaka thirqatchićha. Päś kampiyñi źoñinakź miśha thoqźinchićha, niźaśa paloma tuyñiź śillami;

¹³niźaśa ninakźkiś khichićha: — Ni khjirtikiśiki tuź khićha: ‘Weth qhuyaki mayiśiś qhuyaź khekićha’, niźaśa anćhukki thañinakź qaqaź taqaś pächinćhukćha.

¹⁴Ni timlukin Jesusiźkiś ni śuranaka niźaśa kojunaka makhatźkichićha, neqhśtan Jesusaki ninaka ćhhetinchićha.

¹⁵Xalla ni timlu chawkh jilirinaka niźaśa ni lï utt'ayñinakami ni milajru päñi cherchićha, niźaśa ni okhalanaka timlukiś qhawatćha tuź khikan: “¡Xallalla ni David reyź Machhki!” Neqhśtan ni fariseonakaki źaxwchićha

¹⁶niźaśa Jesusiźkiś khichićha: — ¿Anś ninakaź chïla nïm nonźxo? Jesusaki ninakźkiś qhäśićha: — Werhki nonźnućha. ¿Xalla ni khjirtaki anćhuk ana lïchinćhukpan qhaźtataxo? Xalla neqhśiki tuź khićha: ‘Okhalanakaź itsakićha, niźaśa ni piś ichñinakami, ampacha ninakźkiś wirsu itsaxu thächamki.’

¹⁷Neqhśtan Jesusaki ni orapacha ninaka ekku ni chawkh wathkiśtan oqhchićha, ni Betania wath qhutñi xalla neqhśi ni wën watchićha.

¹⁸Wenśuñ ni chawkh watha kephźkikan, Jesusaki ćhheri eksqatchićha.

¹⁹Niźaśa jikhś atkiś tshi jiwus munti cherźku xalla nikhu makhatchićha, xalla neqhśi ana ćhhulumi wathchićha chhañiqaś źelatćha. Neqhśtan ni jiwus muntiźkiś khichićha: — ¡Xaśiki anam iya śinta ćhherakićha! Neqhśtan ni orapacha ni jiwus muntiki qhonchićha.

²⁰Xalla ni watñi cherźku nïź thaxintanakaki añcha iśpantichićha, neqhśtan Jesusa pewkśićha: — ¿Xaqnuźupan ti jiwus munti ni orapacha qhonchitaxo?

²¹Jesusaki ninakźkiś qhäśićha: — Cheqpachal khiwćha anćhukki thapa quśśiś niźaśa ana teqinaśku khesaź nïki, anaź tillaqaś päsaćha ti jiwuskiś werh pächinla xalla niźtaki, ans ti kurźkiś chiyasaź nïki: ‘Teqhśtan saraqa qotkin thxotsna’, xalla nuźupan watasaćha.

²²Niźaśa thappacha anćhukki mayiśikan thapa quśtanź maya, niźaśaqaś tanźnakićha.

²³Xalla neqhśtan Jesusaki timlukiś luśhśićha, neqhśtan Jesusaź thaxnan ni timlu chawkh jilirinaka niźaśa judiuź qamchi ephnakaki Jesusiźkiś makhatźku pewkśićha: — ¿Ćhhul jilir achśtanam tinaka päxo? ¿Jëkit amkiś ti jiliri thächixo?

²⁴Jesusaki ninakźkiś qhäśićha: — Werhśaqaś anćhukakiś pewkźnaćha:

²⁵¿Jëkit Juan mantichi, wawtisaxu? ¿Yöś qaya, uśh źoñex mantichï? Anćhukź qhäśnakiź nïki, werhki chiyaćha ćhhul jilirź achśtan tiźtanaka pawućhaxa. Niźtikiśtan ninakaki ninakpora ch'ärasi qallantichićha: “Ućhumki Yöś kuchanźkitaćha khikanź chiyakiź nïki, tïki qhäśnaćhan: ‘¿Qhaźtikiśtan ana kirïchinćhuktaxo?’

²⁶Niźaśa anaź qhäśnasaćha źoñiź kuchanźkitaćha khikanaki, ućhumnakki źoñinakaź eqhsa, niźaśa thappacha ti źoñinakaki Juan paxchićha Yöśkiśtan chïñi.”

²⁷Niźtikiśtan Jesusiźkiś qhäśićha: — Werhnakki anal śiśućha Neqhśtan Jesusaki qhäśićha: — Niźaśa werhmi ana śaqal anćhukakiś chiyaćha, ćhhul jilir achchiś tinaka pawućhaxa.

²⁸Jesusaki ninakźkiś pewkśićha: — ¿Xaqnuźupanź anćhuk tïźkiśtan khexo? Tshi źoñiki pukultan machh wichchiśtaćha, niźaśa tukkin khiñiź nïźkiś makhatźku khichićha: ‘Weth mati, töxiki weth uw śqala lanqśñi oqalla.’

²⁹Ni machhki qhäśićha: ‘¡Anal oqhś pekućha!’ Xalla neqhśtan kephsku oqhchićha.

³⁰Neqhśtan ni ephki tshi machhkin oqhchićha, nuźuśaqaś nïźkiś khichićha. Xalla nïki qhäśićha: ‘Tata werhki oqaćha.’ Xalla neqhśtan nïki ana oqhchićha.

³¹¿Xaqhsilta ni pukultanźkiśtan ni epiź pektakama pächitaya? — Ninakaki qhäśićha — ni tukkin khiñi. Neqhśtan Jesusaki khichićha: — Cheqpachal khiwćha ni Romźta taśa mayñinakami, niźaśa iźiwir mätaqanakami, anćhuka tukiź ni tsewkta irpiś wathkiś luśhakićha.

³²Xalla ni Juan Wawtistaki śuma jikhś thaxni thonchićha, niźaśa anćhukki nïźkiś ana kirïchinćhukćha; ans ni Romźta taśa mayñinaka niźaśa ni iźiwir mätaqanakami nïźkiś kirïchićha. Niźaśa anćhukki thapa ni watñinaka cherźkumi ana quś wathchinćhukćha niźaśa ana kirïchinćhukćha.

³³“Nonźna anćhukki ti yaqha kintu: Ni śqal yoqchiś źoñiki tshi uw śqala ćhhakhchićha, neqhśtan uyu pirqichićha śqal muytata; niźaśa tshi maś wijiña pächićha uwa sphitśxapa, neqhśtan tshi turi qhuychićha thapa ni śqala cheqśxapa. Neqhśtan ni śqal yoqa pakśuñ ekchićha ni lanqśñi źoñinakźkiś, xalla neqhśtan aźkin jikhś oqhchićha.

³⁴Neqhśtan śqala axśpacha irantiźkitan, kuchanźkichićha tshi uywita źoñi nïź lanqśñinakźkin, nïźkiś wakiśñi uwa axśxapa.

³⁵Xalla ni lanqśñi źoñinakaki ni kuchanźkita uywitanaka qichchićha, niźaśa yaqhapanaka konchićha, niźaśa yaqhapanaka maśtan ćhakhchićha.

³⁶Xalla ni śqal yoqchiś tuyñuki, tuki kuchanźkita uywitanakźkiśtan tshanti uywitanaka kuchanźkichićha; xalla ni lanqśñinakaki niźtaśaqaś thapatiźkiś päćha.

³⁷“Niźtikiśtan nïź perśun machh kuchanźkichićha tuź khikan: ‘Weth Matit kaśnaćhani.’

³⁸Xalla nïź Mati cherźkuki, ni lanqśñi źoñinakaki ninakpora palt'ichićha: ‘Ti qat ti qama tanźnaćhani; ućhumnakki tïź konźla, niźaśa ućhumnakki tïź yoqźtanź eklakićha.’

³⁹Xalla neqhśtan ni źoñinakaki tanśićha, neqhśtan ni śqal yoqkiśtan jesku konchićha.

⁴⁰“Xaśiki ni uw śqalchiś tuyñuź thonan, ¿xaqhnuźupan anćhukki, ni lanqśñi źoñinaka päźkaź khexo?”

⁴¹Ninakaki qhäśićha: — Ni tuyñuki ana ni lanqśñi źoñinaka oqźku konakićha, neqhśtan ni uw śqal yoqa yaqha lanqśñi źoñinakźkiś pakśuñ thäkićha, niźaśa ni źoñinakaki ni śqala axśpacha nïźkiś wakiśiñi ni orapacha uwa thäkićha.

⁴²Neqhśtan Jesusaki ninakźkiś pewkśićha: — ¿Anćhukki anapan ni khjirta lïchinćhuk qhaźtataxo? Ni khjirtaki tuź khićha: ‘Ni qhuya pirqiñinakaki maś arśićha, ni maśki cheqan iskina qallantiñikiś khissićha. Yöśśa tïki nuź pächiki, ućhumnakkiśki añcha iśpantichukaćha.’

⁴³Cheqpachal khiwćha ni Yöś irpiś wathaki anćhukakiśtan qhañtaź khekićha, neqhśtan nïki ni tuyñuźta ćhheri poqqatñi wathanakźkiś thätaź khekićha.

⁴⁴Xalla ni maśkiśtanaki, xaqhsilta źoñimiź ni maśkiś thxotsnakiź nïki t'una t'oquntaź khekićha; niźaśa ni maś jëkhźkiśmeqaś thxotsnakiź nïki qhimi t'oquntaź khekićha.

⁴⁵Neqhśtan ni timlu chawkh jilirinaka niźaśa ni fariseo źoñinakami, ni Jesusiź kint'ita nonźku, ninakaki ninakźkiśtan chïñi näśićha.

⁴⁶Neqhśtan ninakaki Jesusa chawkhś pekatćha, ans ni źoñinakaqaś eqhsnatćha, xalla ni źoñinakaki Jesusa Yöśkiśtan chïñi paxchitaćha.