Read Chipaya MATEO 22 Bible Online

MATEO 22 - Chipaya bible

MATEO 22

¹Jesusaki wilta ti kintukiśtan palxayi qallantichićha tuź khikan:

²“Ni tsewkta irpiś wathaki, tshi rey nïź machh kaśarś phiśtikiś ćhheri lulhś päñi irataćha.

³Neqhśtan nïź uywitanaka kuchanchićha ni maśinta źoñinaka qhawźkaxu, xalla ni źoñinakaki ana thonśpekchićha.

⁴Niźaśa tshïźtan yaqha uywitanaka kuchanchićha iwxt'iźku: ‘Anćhukki ni maśinta źoñinakźkiś khekićha ćhheri lulhśxapaki thakśtaćha. Werhki weth waka niźaśa khew uywanaka konqatchinćha niźaśa thappacha thakśtaćha; niźaśa thappacha ćhheri lulix thonla.’

⁵Xalla ni maśinta źoñinakaki ana kaśkichićha. Ninakźkiśtan tshïsuñaki nïź yoqa oqhchićha, niźaśa tshïsuñaki nïź tuyśnakźkin oqhchićha,

⁶niźaśa yaqhap maśintanakaki ni reyź uywita źoñinaka śhoxritchićha konañkama.

⁷Neqhśtan ni reyki śmali źaxwchićha, niźaśa nïź śultatunaka kuchanchićha ni źoñi konñinaka konźkaxu niźaśa ninakź watha ujźtan täśinaxu.

⁸Neqhśtan nïź uywitanakźkiś khichićha: ‘Ni ćhheri lulhśki thakśtaćha, xalla ni maśinta źoñinakaki anaź wakiśatćha thonś.

⁹Niźaśa anćhukki cheqan wath moraź ulna, niźaśa thapa śaltanakźkiś ćhheri lulhśxapa maśinźka.’

¹⁰Neqhśtan ni uywitanakaki wath mora ulanchićha, niźaśa thappacha ni śaltakama akhsqatchićha śuma khiñi niźaśa ñexu khiñi; xalla nuź ni paqh qhuykiś źoñinakaki śhipsićha.

¹¹“Neqhśtan ni reyki ni maśintanaka cherśñi luśhśićha, xalla neqhśi tshi źoñi ana kaśarś śkiti kuthchi cherchićha.

¹²Neqhśtan nïźkiś khichićha: ‘Jila, ¿ana ni kaśarś śkiti kuthchi, xaqhnuź teqhś luśhkichamtaxo?’ Xalla ni źoñiki ana tawqchićha.

¹³Neqhśtan ni reyki ni miśkiś liwarpayñinakźkiś khichićha: ‘Ni źoñź qharami qhxochami ćhelhźina niźaśa ni śawkta sumchi laqhkin thxota. Xalla nikhuź nïź qäyi niźaśa iźqi qhxoś khekićha.’

¹⁴Xalla ni qhawźta źoñinakaki tamaćha, niźaśa ni illśta źoñinakaki qolukullaćha.”

¹⁵Xalla neqhśtan ni fariseo źoñinakaki palt'i oqhchićha, Jesusa chïqatźku taqu jesanśxapa, neqhśtan ujchiś jesxapa.

¹⁶Neqhśtan ninakź t'aqkiśtan niźaśa Herodes t'aqkiśtan Jesusiźkin kuchanźkichićha, tuź khikan: — Thaxiñi, werhnakki cheqpacha chïñi am śiśućha, niźaśa Yöś jikhś cheqpacha thaxiñamćha, niźaśa ana źoñinakaź chïta nonśñamćha niźaśa amki ana źoñi phalśñamćha.

¹⁷¿Walix khesaya ni Romano chawkh jilirźkiś taśa thäś, uśh anaź thäsaxa? Werhnakki nïl śiś pekućha.

¹⁸Jesusaki ninaka millk'u quśśiś nayźku, neqhśtan ninakźkiś khichićha: — Toskar źoñinaka, ¿qhaźtikiśtan wethkiś tshi chalaźtaqaś aqacha päxo?

¹⁹Ni taśa thäś päś thëźnalla. Ninakaki tshi denario khita päś śhikźkichićha,

²⁰neqhśtan Jesusaki ninakźkiś pewkśićha: — ¿Jëkhź yukht tïxo niźaśa Jëkhź thüt teqhś khjirtaxo?

²¹Ninakaki qhäśićha: — Cesarźtaćha. Neqhśtan Jesusaki ninakźkiś khichićha: — Niźaśa ni Cesarźtaźlax nïki Cesarźkiś thä, niźaśa Yöśtaźlax nïki Yöśkiś thä.

²²Xalla ti nonźku ni źoñinakaki iśpantichi khissićha; neqhśtan Jesusa ekku oqhchićha.

²³Ni nöx pacha tshi qhaź saduceo źoñinaka Jesusa cherśñi oqhchićha. Ni saduceo źoñinakaki tikhśkiśtan ana jakatatś źelhćha khiñitaćha, xalla neqhśtan ti pewkśićha:

²⁴— Thaxiñi, Moisesaki khichićha xaqhsiltamiź tikhźnasaź nïki ana mati ekku, ni tikhśiź laqhki śalźnasaćha na źewatan, xalla neqhśtan okhalchiś khesaćha nätan nïź tikhśi jilźta.

²⁵Tshi pacha, wethnakakiśtan źelatćha towqu jilaśullka. Ni jilir jilaki śalśićha, neqhśtan tikhśićha. Ana machhchiś khen nïź thun nïź laqhźkiś ekchićha.

²⁶Niźaśaqaś nïź laqhźtan watchićha, neqhśtan nïź xaru khiñiźtanami, niźaśa thappacha ni towqu laqhnakźtan watchićha.

²⁷Ninakaź thappacha tikhźtan, na źonki tikhśinśaqaśśa.

²⁸Xalla ni jakatatś thuñkiśiki, ¿ninakźkiśtan xaqhsiltiź thun na źon khekixo niźaśa ni towqu jilaśullka pachal na źonatan śalśiki?

²⁹Jesusaki ninakźkiś qhäśićha: — ¡Anćhukki tshi qhutñi panćha, anaź anćhuk Yöś śuma kintu khjirta śiśśa, niźaśa anaź Yöś aśimi paxćha!

³⁰Ni jakatatśkiśiki, ni luktaqanakami niźaśa mätaqanakami anaź śalźnakićha, xalla ni tsewkta yoqkin źelhñi Yöś anjilanakaźtaqaś khekićha.

³¹Xalla ni tikhśi jakatatśkiśtanaki, ¿anćhukki ana lïchinćhuk qhaźtataxo, Yöś pachaćha tuź khichiki:

³²‘Werhki ni Abrahamź Yöśtćha, niźaśa Isaacź Yöśtćha, niźaśa Jacobź Yöśtćha’? ¡Yöśki anaćha tikhśinakź Yöśki, ans źethñi Yöśśa!

³³Xalla ti nonźku ni źoñinakaki Jesusiź thaxintikiśtan iśpantichi khissićha.

³⁴Ni fariseo źoñinakaki, Jesusa ni saduceo źoñinaka ch'ujtayñi śiśku akhsićha,

³⁵neqhśtan ninakźkiśtan tshi lï utt'ayñiki Jesusa chalkiś thxotsxapa pewkśićha, tuź khikan:

³⁶— Thaxiñi, ¿xaqhsilta lït ni lïnakźkiśtan tshan cheqanxo?

³⁷Jesusaki nïźkiś khichićha: — ‘Am Yöś tata thapa quśtan peka, niźaśa thapa am animuźtan niźaśa thapa am śiśtan.’

³⁸Tïćha tukkin ni lïnakźkiśtan tshan cheqanaki.

³⁹Nïź xaruki niźtaśaqaś źelhćha ni irata, nïki tuź khićha: ‘Xaqhnuź perśunpachkiś oqśñamźlaxa, xalla niźta śaqaś thapa źoñinaka oqśtanćha.’

⁴⁰Xalla ti piśk lïćha thappacha ni lïnakźkiśtan niźaśa Yöśkiśtan chïñinakźkiśtan cheqanaki.

⁴¹Ni fariseo źoñinakaź tira akhsi źelan,

⁴²Jesusaki ninakźkiś pewkśićha: — ¿Xaqnuźuź anćhuk ni Mesiaskiśtan khexo? ¿Niźaśa jëkhź Mati taxo? Ninakaki qhäśićha: — Davidź machhkiśtan oqhñićha.

⁴³Neqhśtan Jesusaki ninakźkiś khichićha: — David pachaćha ni Espirituź yanapta, Yöś tata khiñiki, Davidki tuź khichićha:

⁴⁴‘Yöś Ephki weth Yöśkiś khichićha: Weth źewqhuttan julźna, werhki amtan moq'uśñi źoñinaka am qhxoch qostan khisqataćha.’

⁴⁵David pachaćha Yöś tata khichiki, ¿qhaźt Mesías Davidźkiśtan oqhñi khesaxo?

⁴⁶Neqhśtan ana jëkhmi qhäśñi atchićha ana tshi taqullami, niźaśa ni thuñkiśtanpacha ana iya jëkhmi nïźkiś pewkśñi atchićha.