Read Chipaya MATEO 25 Bible Online

MATEO 25 - Chipaya bible

MATEO 25

¹“Neqhśtan ni tsewkta irpiś wathaki, xalla ni qhalu turtaqanakaźtaqaśśa, ninakaki micha tanźku ninakź thowa śali oqhchićha.

²Niźaśa taxśnuku ninakźkiśtanaki quś kamanakataćha, niźaśa tshi taxśnukuki walxa khïkhichi turtaqanakataćha.

³Xalla ni taxśnuku quś kama turtaqanakaki ninakź micha chhichkuqaś oqhchićha, niźaśa ana khewa yapśxapa chhichchićha.

⁴Xalla ni taxśnuku khïkhichi turtaqanakaśti ninakź khewa śhoxś loq'u chhichku oqhchićha.

⁵Neqhśtan ni thowaź ana uri thonan, ni turtaqanakaki thappacha thxaxi thonqatchićha, neqhśtan thappacha thxaxchićha.

⁶Neqhśtan wën chikaźkhen tshi xora qhawñi nonźtaćha: ‘¡Ni śalśñi thowaź thonćha! ¡Thewśñiź ulanźka!’

⁷Neqhśtan thappacha ni turtaqanakaki źäśićha, niźaśa ninakź micha thakśñi qallantichićha.

⁸Xalla neqhśtan ni taxśnuku quś kama turtaqanakaki, ni taxśnuku khïkhichi turtaqanakźkiś khichićha: ‘Anćhuka khewallkiśtan tshi qolukullaź toxnalla, wethnaka michakiź thessa.’

⁹Niźaśa ni khïkhichi turtaqanakaki qhäśićha: ‘Anal atasaćha, niźaśa wethnakaltami anćhukaltami ana upsnaxu anćhukki oqa xaqhsikin tuyñiźlax xalla nikhu, neqhśtan qhayźka anćhukalta.’

¹⁰Xalla neqhśtan ni taxśnuku turtaqanakaź khewa qhayi oqhtan, ni śalśñi thowaki thonchićha, xalla ni khïkhichi turtaqanakaki nïźtan chika ni phiśtikiś luśhśićha, neqhśtan ni qhuy śanaki chawkhźtaćha.

¹¹Neqhśtan ni yaqha turtaqanakaki irantiźkichićha, tuź khikan: ‘¡Yöś tata, Yöś tata khetźnalla!’

¹²Neqhśtan xalla nïki qhäśićha: ‘Cheqpachal khiwćha anal anćhuk paxućha.’

¹³Niźaśa anćhukki anaź thxaxakićha, niźaśa anćhukki ni źoñź Mati thonśki anaź śiśśa, ni thuñimi niźaśa ni orami.

¹⁴“Xalla ni tsewkta irpiś wathaki tshi źoñi yaqha watha oqhśkhichi niźta irataćha, neqhśtan nïź uywita źoñinaka qhawśićha neqhśtan ninakźkiś nïź päś thïśićha.

¹⁵Ninakźkiśtan tshïsuñźkiś taxśnukuqhalu watha päś thächićha, niźaśa tshïsuñźkiś piśkqhalu watha päś thächićha niźaśa tshïsuñźkiś tshiqhalu watha päś thächićha śapa mayniźkiś ninakź attakamalla. Neqhśtan aźkin jikhś oqhchićha.

¹⁶Xalla ni taxśnukuqhalu watha päś tanśiki uywitaki, ni päśtan qhatu pächićha neqhśtan tshi nuźtan päś kanchićha.

¹⁷Niźtaśaqaś ni piśkqhalu watha päś tanśi uywitaki, tshi nuźtanśaqaś kanchićha.

¹⁸Xalla ni tshiqhalu watha päś tanśi uywitaki, nïź tuyñuź päś yoqkiś thatźku śhoxchićha.

¹⁹“Xalla neqhśtan ni uywitanakź tuyñuki añcha aźqtan kephźkichićha, niźaśa ninakźkiś qaxźta päś tumtichićha.

²⁰Neqhśtan ni tuki taxśnuku päś tanśi uywitaki makhatchićha, niźaśa nïź tuyñuźkiś taxśnukuqhalu watha päś thächićha, tuź khikan: ‘Tata, amki wethkiś taxśnukuqhalu watha päś thächamla, xaśiki ni päśtan taxśnukuqhalu watha päś kanchinćha tïćha ni päśki.’

²¹Ni tuyñuki khichićha: ‘Añcha walićha, añcha śuma quśśiś uywitamćha; niźaśa ni qolukullkiź śuma quś thächamćha, xaśiki tshan taźkiś am uchaćha. Luśhka niźaśa wethtan chika chipźna.’

²²Xalla neqhśtan ni piśkqhalu watha päś tanśi uywitaki makhatchićha, niźaśa tuź khikan: ‘Tata, amki wethkiś piśkqhalu watha thächamla, xaśiki tshi nuźtan kanchinćha tïćha ni päśki.’

²³Ni tuyñuki khichićha: ‘Añcha walićha, añcha śuma quśśiś uywitamćha; niźaśa ni qolukullkiś śuma quś thächamćha, xaśiki tshan taźkiś am uchaćha. Luśhka niźaśa wethtan chika chipźna.’

²⁴“Neqhśtan ni tshiqhalu watha päś tanśi uywitaki makhatchićha, niźaśa tuź khikan: ‘Tata, añcha am eqhsinćha añcha atchiś źoñiź khen, ana amiź ćhhakhta axśñamćha niźaśa ana amiź wichśta aptaśñamćha.

²⁵Xalla niźtikiśtan eqhsinćha, niźaśa oqźku yoqkiś ni päś ukchinćha. Xalla tïćha ni am päśki.’

²⁶Ni tuyñuki qhäśićha: ‘Amki ñexw uywitamćha niźaśa qhenamćha, niźaśa amki śiśatćhani werh ana ćhhakhźku axśñi niźaśa ana wichku aptiñi,

²⁷ni weth päś, päś tiśpiñkiś uchanśalani, niźaśa werhki kephźkuki ni weth päś matźtanpachal tanźtasaćha.

²⁸Niźaśa neqhś źelhñi źoñinakźkiś khichićha: ‘Qhañśna ni tshiqhalu watha päś, niźaśa ni qhalu milchiś nïźkiś thä.’

²⁹Xalla ni źelinchiśki tshanti thätaź khekićha, niźaśa źetchinakchiśpanź khekićha; xalla ni ana ćhhulchiśki tshanti qhañtaź khekićha, nïź qoluk śiśtallami.

³⁰Niźaśa ti anaśum uywita chhetqata, śanku ni sumchikin. Neqhśtan nikhuź ni qäyi niźaśa ni iźqi qhxoś khekićha.’

³¹“Xalla ni źoñź Matiki, nïź chawkh qhana muyuntita niźaśa nïź źkayi quśśiś anjilanakźtan thonakićha, neqhśtan nïź qhan julśkiś julźnakićha.

³²Niźaśa thappacha ni chawkh wathchiś źoñinakaki nïź tukkiś akhsnakićha, neqhśtan nïki ni źoñinaka phalakićha, xaqnuźt tshi üśa itśñi źoñiki phalćhaxa ni chiwunakźkiśtan, xalla niźta irata phalakićha.

³³Niźaśa ni üśhanakaki nïź źewkhuttan uchakićha, niźaśa ni chiwunakaśti nïź śqarkhuttan uchakićha.

³⁴Neqhśtan ni Reyki khekićha nïź źewqhuttan khiñi źoñinakźkiś: ‘Picha anćhukki ni weth epiź q'ächita źoñinakźkiś; niźaśa anćhukki ni irpiś yoqa tanźna ni Yöś ti yoqa thulźtikiśtanpacha anćhukalta thakśićha.

³⁵Niźaśa ćhheri eksqatchinćha, neqhśtan anćhukki wethkiś luli thächinćhukćha, niźaśa weriź qhaś pekan anćhukki wethkiś qhaś onanchinćhukćha; niźaśa yaqha wathchiś źoñiźtaqaś oqhlayanami, anćhukki werh qhuykiś qhawśinćhukćha.

³⁶Niźaśa weriź ana śkitchiś khenami, anćhukki wethkiś śkiti onanchinćhukćha; niźaśa weriź lä khenami anćhukki werh thonśinćhukćha; niźaśa weriź karsilkin khenami anćhukki werh cherśñi thonchinćhukćha.’

³⁷Neqhśtan ni źkayi quśśiś źoñinakaki pewkźnakićha: ‘Yöś tata, ¿ćhhul ora am ćhheri ekśi cherźku werhnakki am ćhheri thächintaxo? ¿Niźaśa am qhaś pekñi cherźku werhnakki amkiś qhaś thächintaxo?

³⁸¿Niźaśa am yaqha wathchiś źoñiźtaqaś oqhlayñi cherźku, werhnakki am qhuykiś qhawśintaxo, niźaśa ana śkitchiś khen werhnakki am thutśintaxo?

³⁹¿Niźaśa läkhichi cherźku uśh karsilkin khen, werhnakki am cherśñi thonśintaxo?’

⁴⁰Ni Reyki qhäśnakićha: ‘Cheqpachal khiwćha ni anćhukaź weth amu quśśiś jilanakźkiś oqźtanakaki, wethkiś thätaźuqaś pächinćhukćha.’

⁴¹“Xalla neqhśtan ni Reyki nïź śqarqhuttan khiñinakźkiś khekićha: ‘Wethkiśtan saraqa ñexu źoñinaka xalla ni wiñaya uj asñikin, ni uj asñiki ni Saxriźta niźaśa nïź anjilanakźta thakśtaćha,

⁴²Niźaśa werhki ćhheriź ekźnatćha, neqhśtan anćhukki ana werh luli thächinćhukćha; niźaśa qhaśl pekatućha neqhśtan anćhukki ana werh qhaś likhqatchinćhukćha.

⁴³Niźaśa yaqha wathchiś źoñiźtaqaś oqhlaychinćha, neqhśtan anćhukki ana werh qhuykiś qhawśinćhukćha; niźaśa werhki ana śkitchiś q'alittaćha, neqhśtan ana werh thutśinćhukćha; niźaśa werhki läkhichintaćha, niźaśa karsilkiśtaćha, neqhśtan anćhukki ana werh thonśñi thonchinćhukćha.’

⁴⁴Neqhśtan ninakaki pewkźnakićha: ‘Tata, ¿ćhhul ora werhnakki am cherchinta ćhheri ekśñi uśh qhaś ekśñi uśh yaqha wathchiś źoñi irata uśh ana śkitchiś uśh läkhichi uśh karsilkiśmi neqhśtan werhnakki ana yanapchinqaya?’

⁴⁵Ni Reyki ninakźkiś qhäśnakićha: ‘Cheqpachal khiwćha thappacha ti weth amu quśśiś jilanakźkiś ana oqśinćhukćha, niźaśa ana wethkiśimi pächinćhukćha.’

⁴⁶Xalla tinakaki ni wiñaya t'akhiśiśkin oqakićha, niźaśa ni źkayi quśśiśnakaki wiñay źetkin oqakićha.”