Read Chipaya MATEO 28 Bible Online

MATEO 28 - Chipaya bible

MATEO 28

¹Śawatu jejś thuñiź wattan, niźaśa wënxapa khistan ni śimana qallantiñi thuñkiśiki, María Magdalenki niźaśa yaqha Marïki ni puyi cherśñi oqhchićha.

²Niźaśa ni orapacha tshi anawal yoqa cheqhinsqatñi watchićha, xalla ni oraki Yöś anjilaź tsewktan śhujźkichiki, niźaśa ni puyiź nikhu makhatchićha, neqhśtan ni puyi chawkhta maś qisqatźku neqhś julśićha.

³Ni anjilaki tshi llijw llijwñiźtaqaś qhanatćha, niźaśa nïź śkitiki tshi qhatñiźtaqaś chiwitaćha.

⁴Xalla ni cherźku ni śultatunakaki añcha tsukhchi tikhśiźtaqaś khissićha.

⁵Niźaśa ni anjilaki ni mätaqanakźkiś khichićha: — Anćhukki anaź eqhsna. Werhki śiśućha xalla ni kuruśhkiś ch'awkta Jesusaź qhurćha anćhukki.

⁶Niźaśa nïki jakatatchićha anaź teqhś źelhćha, xaqhnuź maśinchitaźlaxa xalla ni kama. Niźaśa anćhukkiź thona ni xañchi nonta yoqa cherśñi.

⁷Niźaśa anśpachaź oqa ni thaxintanakźkin maśñi: ‘Jesusaki tikhśikiśtan jakatatchićha, niźaśa Galilea watha anćhuka tukiź oqhćha xalla nikhuź anćhukki ni cherakićha.’ Xalla tïtaćha anćhukakiś chiya khitaki.

⁸Neqhśtan ni mätaqanakaki ni puykiśtan apura oqhchićha, niźaśa añcha tsukhchi chipa śatipariju oqhchićha ni ew kintu ni thaxintanakźkiś maśñi.

⁹Xalla nuź oqan Jesusaki ninakźkiś thensićha, neqhśtan Jesusaki ninaka tsänchićha. Neqhśtan ninakaki Jesusiźkiś makhatźku nïź qhxochkiś źkorźku amtichićha,

¹⁰neqhśtan Jesusaki ninakźkiś khichićha: — Anaź eqhsna, weth jilanakźkin maśka Galilea wathax oqhla, xalla nikhuź werh cherakićha.

¹¹Niźaśa ni mätaqaź nuź oqan, tshïsuña ni cheqśñi śultatunakźkiśtan ni chawkh watha oqhchićha, neqhśtan ni timlu chawkh jilirinakźkiś ćhhulu neqhś watćhaxa xalla ni maśśićha.

¹²Neqhśtan ni timlu chawkh jilirinakaki ni wath qamchi ephnakźtan akhsićha, niźaśa nuź akhsku palt'ichićha. Neqhśtan ni śultatunakźkiś taź päś thächićha,

¹³tuź khikan: — Anćhukki chiyakićha tuź khikan: ‘Wën werhnakaź thxaxan, ni Jesusiź thaxintanakaki thonźku ni Jesusiź xañchi khiźku oqhchićha.’

¹⁴Niźaśa ni irpiñiki ti kintu śiśakiź nïki, werhnakki ninaka llullśnaćha niźaśa werhnakki anćhuk liwriyaćha.

¹⁵Neqhśtan ni śultatunakaki ni päś tanśićha, niźaśa ni timlu chawkh jilirinakaź chïtakama pächićha. Xalla ti kintuki ni judiu źoñinakźkiś töxkama waqaychićha.

¹⁶Neqhśtan ni qhalu tshichiś thaxintanakaki Galilea watha oqhchićha, niźaśa ni Jesusiź toqinśt'ita kurkin.

¹⁷Xalla neqhśtan ni Jesusa cherźku ninakaki Jesusiźkiś amtichićha, niźtami yaqhapanakaki teqinaśatćha.

¹⁸Neqhśtan Jesusaki ninakźkiś makhatźku khichićha: — Yöśki wethkiś ti tsewkta pachkin niźaśa ti yoqkiś thapa jiliri thächićha.

¹⁹Niźaśa anćhukki thapa ti chawkh wathqhutñiź oqa, niźaśa weth thaxintanakaź khisqatakićha; neqhśtan anćhukki ni Yöś Eph ni Yöś Machh ni Yöś Espíritu Santuź thükiś wawtisakićha,

²⁰niźaśa anćhukki thaxnakićha ni źoñinakźkiś thapa ni anćhukakiś chïtanaka kaśaxu. Niźaśa werhki śapuru anćhukatan chikal khećha ti yoqa tukuśinskama. Xalla nuźox khila.