Read Chipaya MATEO 3 Bible Online

MATEO 3 - Chipaya bible

MATEO 3

¹Xalla ni pacha ni Juan Wawtistaki Judea ch'eqti yoqkin Yöś śuma kintu palxaykan thonchićha,

²tuź khikan thaxnatćha: “¡Yöśkinź qhutźka, niźaśa quśnakaź turka, ni tsewkta Yöś irpiś wathaki keźunskichićha!”

³Niźaśa Yöśki ni Isaías Yöśkiśtan chïñiźkiś Juanźkiśtan chïqatchićha tuź khikan: “Tshi xora ch'eqti yoqkin qhawćha: ‘Tatź jikhś thakśnakićha; tshi śoq'u jikhś khetźinakićha.’ ”

⁴Juanź śkitiki camelluź chomkiśtan pätataćha, nïź tshayimi śqiśkiśtan pätataćha; niźaśa nïź luliki śher śherñitaćha niźaśa munti misk'inaka lulhñitaćha.

⁵Neqhśtan Jerusalén wathchiś źoñinakaki, niźaśa ni Judea yoqkiśtan niźaśa ni Jordán puj keźu khiñinakami, Juanź taqu nonśñi oqatćha.

⁶Ni źoñinakaź uj pampachtikiśtan Juanki Jordán pujkiś wawtisatćha.

⁷Xalla ni wakchi fariseonaka niźaśa saduceonakaź wawtisqati thonan, Juanki ninakźkiś khichićha: “¡Anćhukki śqor kaśtanakćhukćha! ¿Jëkht anćhukakiś atipakiź khichixo, ni t'aqhiśiś keźunskiśtanxo?

⁸Anćhukki ni uj pampachchiźta śuma quśśis thëźna, niźaśa cheqpacha Yöśkin quś thutśi źoñiźtaqaś,

⁹niźaśa ana anćhukpacha chiya: ‘Ućhumnakki Abrahamźkiśtan oqinćhumćha’; Werhki cheqpachal khiwćha, Yöś munasaź nïki ti maśkiśtanami Abrahamź okhalanaka tukqatasaćha.

¹⁰Niźaśa tshi xachaki źelhćha ni munti śep'ikiśtanpacha q'achśxapa. Thappacha ana ćhherñi muntinakaki q'achśku ujkiś täśtaź khekićha.

¹¹Cheqpacha werhki qhaśtanqaś anćhuk wawtisinćha, anćhuka uj panpachtikiśtan; xalla tshi weth xaruź thonćha xalla nïćha wethkiśtan tshan aśśiśki, nïźkiś anal wakiśućha nïź ćhhata chhichanśmi, xalla nïki Espíritu Santuźtan niźaśa ujźtanź wawtisakićha.

¹²Niźaśa nïź qharkiś ni layinś pats tanśi thonćha ni tiriku ni phitkiśtan phalśxapa. Neqhśtan ni śuma tirikuki nïź perśun qhuykiś makhźnakićha, ni itsaki lijw täśtaź khekićha tshi ana thesñi ujkiś.”

¹³Galilekiśtan Jesusaki Jordán puju oqhchićha, xaqhsikin Juan źelatćhaxa xalla nikhu, neqhśtan Juanźkiś wawtisqatśxapa.

¹⁴Xalla ni Juanki ana wawtis pekatćha, neqhśtan tuź khichićha: — Weril amiź wawtistakhiś wakiśućha, ¿niźaśa amki wethkin thonqaya?

¹⁵Jesusaki qhäśićha: — Anśiki nuźuqa pä, Yöś chïtakama xalla nuźupanź wakiśićha. Xalla neqhśtan Juanki qhäśićha.

¹⁶Neqhśtan Juanź Jesusa wawtisan niźaśa qhaśkiśtan wax ulnawk khen, Jesusaki ni tsewkta yoqa khetsñi cherchićha, ni Yöś Espíritu tshi palomaźtaqaś nïź juntuñpacha śhujźkiñi.

¹⁷Ni orapacha tshi xora tsewktan chïźkiñi nonźtaćha, xalla tuź khikan: “Xalla tïćha weth q'ay Matiki, werhki am illśinpanćha.”