Read Chipaya MATEO 4 Bible Online

MATEO 4 - Chipaya bible

MATEO 4

¹Xalla neqhśtan Yöś Espirituki Jesusa ch'eqti yoqa chhichchićha, niźaśa Saxraź yanźta khiśxapa.

²Jesusaki ni ch'eqti yoqkin, wëntiźtan maxiñtiźtan paqhpikqhalu thuñi ana lulhchi źelhchićha, xalla neqhśtan ćhheri eksqatchićha.

³Ni Saxraki Jesusiźkiś makhatźkichićha ujkiś thxotsqatśxapa, xalla tuź khikan: — Cheqpacha Yöś Matimźlax nïki, amki ti maśkiś chiya t'anta tukaxu.

⁴Xalla neqhśtan Jesusaki qhäśićha: — Ni Yöś śuma kintu khjirtikiśiki tuź khićha: ‘Źoñinakaki anaź t'antiźtanqaś źetasaćha, Yöś atkiśtan ulañi taqućha cheqanaki.’

⁵Neqhśtan Saxraki Jesusa chhichchićha ni Jerusalén śuma źkay chawkh watha, neqhśtan ni Timlu juntuñ yawqatchićha.

⁶Neqhśtan Saxraki khichićha: — Cheqpacha Yöś Matimźlax nïki, qossuk thxotsna; Yöś śuma kintu khjirtaki tuź khićha: ‘Yöśki nïź anjilanaka kuchanźkakićha am kuytaxu. Niźaśa ninakź qharźtan am tanźnakićha, xalla neqhśtan am qhxocha ana maśkiś śhoxritsnaxu.’

⁷Jesusaki qhäśićha: — Yöś śuma kintu khjirtikiśśaqaś khićha: ‘Ana amki, am Yöś ujkiś thxotś peka.’

⁸Xalla neqhśtan Saxraki Jesusa tshi paqh kur juntuñ chhichchićha, niźaśa thëśićha thappacha ti yoq chawkh wathanaka niźaśa nïź qamanakami,

⁹neqhśtan ni Saxraki khichićha: — Amki wethkiś killśkum amtakiź nïki, werhki thappachal amkiś thäćha.

¹⁰Jesusaki qhäśićha: — Saxra wethkiśtan saraqa, Yöś śuma kintu khjirtaki tuź khićha: ‘Amki am Yöś alaxa amta, niźaśa nïźkiś alaxa manta pä.’

¹¹Neqhśtan Saxraki Jesusiźkiśtan saraqchićha, niźaśa Yöś anjilanaka Jesusa quśhñi thonchićha.

¹²Jesusaki Juan karsilkin chawkhta kintu nonchićha, xalla neqhśtan Jesusaki Galilea oqhchićha.

¹³Ni Jesusaki Nazaret watha ekku oqhchićha Cafarnaúm wathkin qami, ti wathaki Galilea qot atkiśtaćha, niźaśa xalla nikhu Zabulón niźaśa Neftalí t'aqa qamatćha.

¹⁴Xalla tïki watśtanpantaćha Isaías Yöśkiśtan chïñiź khjirtakama:

¹⁵“Zabulonź yoqa niźaśa Neftaliź yoqa, Jordán pujź nawkhchaqtan, niźaśa qot atkiśtaćha: Neqhśtan Galilea wathkiś, ana Yöś kirïñi źoñinaka qamćha.

¹⁶Xalla ni sumchi laqhkiś qamñi wathaki tshi chawkh qhana cherchićha; niźaśa tshi qhanaź qhanźkichiki ni tikhś śiwśkiś qamñinakźtaki.”

¹⁷Neqhśtanpacha Jesusaki Yöś śuma kintu palxayi qallantichićha: “Yöśkinź qhutźka, niźaśa quśnakaź turka, ni tsewkta Yöś irpiś wathaki keźullaćha.”

¹⁸Jesusaki Galilea qot atkiś oqhkan, pukultan jilaśullka cherchićha: Tshïki Simón, Piru khitaśaqaśtaćha, niźaśa nïź jilaki Andrés khitataćha, tinakaki ni qotkiś ninakź ch'iś tanś kakuna thxotźnatćha, ninakaki ch'iś tanñi źoñinakataćha.

¹⁹Jesusaki ninakźkiś khichićha: — Werh apźka, werhki źoñinaka tanñi anćhuk khisqataćha.

²⁰Neqhśtan ninakaki ni orapacha ninakź ch'iś tanś kakuna ekku Jesusiźtan oqhchićha:

²¹Neqhśtan nawkhxapalla watźku, Jesusaki cherchiśaqaśśa yaqha pukultan jilaśullka: Santiaguźtan Juanźtan, ninakaki Zebedeoź machhnakataćha, ninakaki ephźtan walsikiś ni ch'iś tanś kakuna t'irkan źelatćha. Niźaśa Jesusaki ninaka qhawśićha.

²²Neqhśtan ninakaki ni orapacha ni walsami ephmi ekku, Jesusa apśićha.

²³Jesusaki thappacha ni Galilea yoqaran oqhlaychićha, niźaśa śapa ni akhs qhuyaran thaxinchićha Yöś śuma irpiś wath kintukiśtan palxaykan, niźaśa lä źoñinaka ćhhetinkan, niźaśa thappacha ni wathanakź llaki quźśićha.

²⁴Jesusiź pätanakźkiśtan thappacha ni Siria yoqaran śiśśićha, xalla neqhśtan thappacha ni thapaman lä źoñinaka niźaśa llakitanakami, niźaśa ni anaśum yenqhaź tantanaka niźaśa t'ukurinakami niźaśa śuchunakami śhikchićha, neqhśtan Jesusaki thappacha ni lä źoñinaka ćhhetinchićha.

²⁵Niźaśa tama Galilea źoñinaka, niźaśa Decápolis wathanakkiśtanami, niźaśa Jerusalén wathkiśtanami niźaśa Judea yoqanakkiśtanami niźaśa Jordán puj nawkhchaqtanami Jesusa apśićha.