Read Chipaya MATEO 7 Bible Online

MATEO 7 - Chipaya bible

MATEO 7

¹“Yeqha źoñinaka ana juchjiptaya, niźaśa Yöśki anćhuk anaź juchjiptayakićha.

²Xaqhnuź anćhuk źoñinakkiś k'ari juchjiptayaćhaxa, xalla niźtaśaqaś Yöś Ephki anćhukakiś k'ari juchjiptayakićha; niźaśa anćhukki qhaźta tupullkiśqaś ni yaqha źoñinakźkiś onanćhani, xalla niźtallaśaqaś Yöśki anćhukakiś onakićha.

³¿Qhaźtikiśtanam am jilź źhukkiś quyrichi cherxo, niźaśa anam nayya ni quyru am źhukkiś źelhñi?

⁴Niźaśa amki anam ni am źhukkiś źelhñi quyru nayya, ¿anam jiwjat qhaźtataxo ni am jilźkiś chïś: ‘Jila am źhukkiśtan am quyru wethkiś apaqsqatalla khikanxo?’

⁵¡Toskara! Tuki am perśun źhukkiśtan ni am quyru apaqźna, neqhśtan amki śumam cherasaćha ni am jilź quyru apaqśinśxapaki.

⁶“Niźaśa Yöś ćhhultaqinaka ana pakunakźkiś thä, neqhśtan ni pakunakaki anćhukź wilsuyasaćha niźaśa anćhuk xwarźnasaćha. Niźtaśaqaś ana anćhuka champinakami kuchinakź tukkiś thxotna, neqhśtan ni kuchinakaki thek thekźnasaćha niźaśa anćhuk xwar xwarźnasaćha.

⁷“Niźaśa Yöśkiśtan maya, Yöśki anćhukakiś thäkićha; niźaśa qhura ni qhurñi źoñiki waćhakićha; niźaśa qhawźna neqhśtan tsewkta śanaki khetsnakićha.

⁸Xalla ni thapa mayñi źoñiki tanźnakićha; niźaśa ni qhurñi źoñiki waćhakićha; niźaśa ni Yöś Ephź śana qhurñiki khetźintaź khekićha.

⁹“¿Xaqhsilta źoñit ućhumnakkiśtan, nïź uśhaź t'anta mayan tshi maś thäsaxo?

¹⁰¿Uśh tshi ch'iś mayan, niźaśa tshi śqora thäsaya?

¹¹Niźaśa anćhukki ñexwćhukćha anćhuka okhalanakaź mayan śuma ćhhultaqinakaqaś thäyinćhukćha, ¡ućhum tsewkta Yöś Ephki ni mayñi źoñźkiś tshallantiź śuma ćhhultaqinaka thäsaćha!

¹²“Xaqhsilta źoñinakat anćhuk xaqhnuź päñi pekćhaxa, xalla niźtaśaqaś anćhukki päkićha ni źoñinakźta, xalla nuźućha ni Yöś kuchanźkita chïñinakź lïki.

¹³“Anćhukki ow śankiśtanź luśha. Niźaśa ni t'aqhiśiś jikhśki palaćha niźaśa ni t'aqhiśiś śanami palaśaqaśśa, xalla neqhśiki tama źoñinakaź luśhśa;

¹⁴xalla ni tsewkta qamañkin chhichñi jikhśki k'ullkullaćha, niźaśa ni śanaki owallaćha, xalla neqhśiki qoluk źoñinakaqaś luśhśa.

¹⁵“Anćhukki kuytaśakićha ni toskar Yöś śuma kintu xoxoñi źoñinakźkiśtan. Xalla ninakaki ućhumnakakiś thonakićha üśa tukźku, xalla ninakź qosta quśki tshi qitź sikaź taqaśśa.

¹⁶Niźaśa śapa muntinakaki nïź ćhherkiśtan paxśa, anaź uwa axźnasaćha ch'apkiśtan niźaśa anaź jiwusa axźnasaćha zarza ch'ap muntikiśtanami.

¹⁷Niźaśa ni śuma muntiki śuma ćhheripanź poqćha, niźaśa ni anaśum muntiki anaśum ćhheripanź poqćha.

¹⁸Niźaśa ni śuma muntiki anaź anaśum ćhheri poqasaćha, niźaśa ni ana śum muntiki anaź śuma ćhheri poqasaćha.

¹⁹Thappacha ana śum ćhheri poqñi muntiki, q'achśku ujkiś ujtaź khekićha.

²⁰Neqhśtan anćhukki ninakź ćhherkiśtan paxakićha ni toskar źoñinaka.

²¹“Niźaśa anaź thappacha wethkiś: ‘Tata, Tata’, khiñinakaki luśhakićha ni tsewkta Yöś irpiś wathkinaki, ananaxśti ni weth tsewkta Ephź quś kama päñi źoñinakaź luśhakićha.

²²Ni juyśu thuñkiśiki tama źoñinakaki wethkiś chiyakićha: ‘Yöś tata, Yöś tata, am thükiś werhnakki am Yöś śuma kintu źoñinakźkiś palxaychinćha, niźaśa am thükiś anaśum yenqhanaka chhetqatchinćha, niźaśa am thükiś tama milajrunaka pächinćha.’

²³Xalla neqhśtan werhki qhäśnaćha: ‘Anapan anćhuk paxchinćha; ¡Wethkiśtan uj päñinaka saraqa!’

²⁴“Xalla ni werh nonśñi źoñiki niźaśa weriź chïta kaśñi źoñiki, xalla nïki tshi k'uñchi źoñiźtaqaśśa, xalla ni źoñiki tshi maś aqh juntuñ qhuya qhuychiźtaqaśśa.

²⁵Neqhśtan chijñi thonchićha, niźaśa pujunaka qhaś yapźkichićha niźaśa thami thonchićha ni qhuya palata; neqhśtan ni qhuyź śuyluki maśkiśtanpacha chukźtataćha xalla neqhśtan ni qhuyaki ana eśśićha.

²⁶Xalla ni weth taqu nonźku neqhśtan weriź chïta ana kaśñi źoñiki, tshi sumsu źoñi nïź qhuya phil yuntuñ qhuychiźtaqaśśa.

²⁷Niźaśa chijñi thonchićha niźaśa pujunakami phatsićha, niźaśa thamimi śmali thamchićha neqhśtan ni qhuyaki eśśićha. ¡Niźaśa paqh uthiri khissićha!”

²⁸Neqhśtan ni Jesusaź chï źerźtan, ni źoñinkaki Jesusa thaxiñi nonźku iśpantichi khissićha,

²⁹xalla ni Jesusaki tshi chawkh jiliriźtaqaś thaxnatćha, ana ni judiuź lï utt'ayñi źoñinakaźtaqaś.