Read Chipaya MATEO 9 Bible Online

MATEO 9 - Chipaya bible

MATEO 9

¹Xalla neqhśtan Jesusaki walsikiś yawźku ni qota qaqhchićha, neqhśtan perśun watha irantichićha.

²Xalla nikhu Jesusiźkin tshi śuch źoñi pirsatkiś kallchi śhikchićha; niźaśa Jesusaki ni źoñinaka thapa quśśiś nayźku, neqhśtan ni lä źoñźkiś khichićha: — Jila ana llakiśha; am ujnakaki śumansqattaćha.

³Neqhśtan tshi qhaźu lï utt'ayñi źoñinakaki pinsatćha: “Xalla ti źoñiź chïtaki Yöśkiśtan ana śumapanćha.”

⁴Niźaśa Jesusaki ninakaź quśkiś pinsita näśićha, neqhśtan ninakźkiś pewkśićha: — ¿Qhaźtikiśtan anćhuka quśkiś ana śuma pinsitaxo?

⁵¿Ćhhulut tshan phaśila chïś khesaxo: ‘Am ujnakaki śumansqattaćha khikan’, uśh tuź chiyasax: ‘Źäźku niźaśa oqa’?

⁶Niźaśa werhki anćhukakiś thëźnaćha ni źoñź Matiki ti yoqkiś jilirićha niźaśa źoñinakź ujnakźkiśtan śumansqatśxapa. Xalla neqhśtan ni śuch źoñźkiś khichićha: — Źäźna niźaśa am pirsata chhichku am qhuya oqa.

⁷Neqhśtan ni śuch źoñiki źäśićha niźaśa nïź qhuya oqhchićha.

⁸Xalla ni cherźku ni źoñinakaki eqhsićha, niźaśa Yöś ti źoñinakźkiś aśi thätikiśtan, Yöś thü aynaqchićha.

⁹Jesusaki ni wathkiśtan ulankan, tshi źoñi cherchićha Mateo khita, ni źoñiki Romźta taśa mayś julśkiś julśi źelatćha. Neqhśtan Jesusaki nïźkiś khichićha: — Werh apźka. Neqhśtan Mateoki tshitsku Jesusa apśićha.

¹⁰Neqhśtan ni nöxpacha Jesusaki nïź thaxinta źoñinakźtan Mateoź qhuya luli oqhchićha, niźaśa tama Romźta taśa mayñinaka niźaśa ana śum źoñinaka thonchićha, neqhśtan Jesusiźtan chika miśkiś luli julśićha.

¹¹Xalla niźta cherźku, ni farseonakaki Jesusiź thaxinta źoñinaka pewkśićha: — ¿Qhaźtikiśtan ti anćhuk thaxiñi, ni taśa mayñinakźtan niźaśa ujchiś źoñinakźtan lulhxo?

¹²Xalla niźta chïñi nonźku, Jesusaki ninakźkiś khichićha: — Ni wiw źoñinakaki anaź qullñi źoñi pekasaćha, lä źoñinakaź qullñiki pekćha.

¹³Niźaśa anćhukki oqa, niźaśa ti chïta śiśka: ‘Werhki śuma quśl pekućha, anal ni wilananaka thxotñi pekućha.’ Niźaśa werhki ana źkayi quśśiś źoñinakźkin thonchinćha, ans werhki ni ujchiś źoñinakźkin thonchinćha.

¹⁴Neqhśtan ni Juan Wawtistaź thaxintanakaki Jesusiźkiś makhatźku pewkśićha tuź khikan: — Werhnakki niźaśa fariseonakźtan añcha ayunaśinćha, ¿ni amiź thaxinta źoñinakaśti qhaźtikiśtan ana ayunaśñixo?

¹⁵Jesusaki ninakźkiś qhäśićha: — ¿Qhaźtikiśtan ni śalśkiś maśinta źoñinaka llakita khesaxo, ni śalśñi źoñiź anćhukatan źelanpacha? Niźaśa ni thuñiki thonakićha neqhśtan ni śalśñi źoñiki qhañtaź khekićha, ni thuñi irantiźkitan ayunaśakićha.

¹⁶“Niźaśa anaź xaqhsiltami tshi ach śkiti ew ch'oqhluźtan rimintasaćha, niźaśa ni ew rimintaki tsatñićha, neqhśtan ni ach śkitiki xwarsnasaćha, ni xwarsiki tshan paqhiź khisnasaćha.

¹⁷Niźaśa anaź xaqhsiltami ach śqiś kewkiś ew winu alźnasaćha, ni ach śqiś kewiki xwarsnasaćha, niźaśa ni winumi ni śqiś kewimi apt'akićha. Xalla niźtikiśtan ew winuki ew śqiś kewkiśpanź alśki, xalla nuź ni piśkpach ćhhultaqi thuraxu.”

¹⁸Jesusaź nuź parlan tshi judiu źoñinakź chawkh jiliri thonchićha, Jesusiź tukkiś killśićha tuź khikan: — Weth uśhki anśilla tikhśinćha, amki thonźkalla am perśun qharźtan lanźinalla neqhśtan weth uśhki źetakićha.

¹⁹Neqhśtan Jesusaki nïź thaxinta źoñinakźtan, niźaśa ni jilirźtanpacha oqhchićha.

²⁰Neqhśtan xalla nuź oqan, qhalu piśk wata lhokh thawqsñi konkiś lä źon źelatćha, neqhśtan na źonki Jesusiź wirqhuttan makhatchinćha neqhśtan nïź irś atalla lanźinchinćha.

²¹Na źonki pinsatćha: “Nïź irślla lanźkuqal źetaqa.”

²²Niźaśa Jesusaki wirqhutñi qhutśićha, neqhśtan na źon cherźku khichićha: — Ana llakiśha kullaka, amiź thapa quśśiś khen ćhhetintamćha. Na źonki ni orapacha źethchi khissinćha.

²³Neqhśtan ni Jesusaź ni judiunakź chawkh jilirź qhuya irantitan, niźaśa ni waylinakaki thatśxapa thakśitaćha, niźaśa yaqhap źoñinakaki añcha iraź qätćha,

²⁴neqhśtan Jesusaki ninakźkiś khichićha: — Anćhukki teqhśtanź ulna, ta uśhki anaćha tikhśiñ ans ta uśhkil thxaxćha. Ni źoñinakaki Jesusa thassićha,

²⁵xalla ni Jesusaki ni źoñinaka ulansqatchićha; neqhśtan ni qhuykiś luśhku Jesusaki na uśha qhara tanźinchićha, neqhśtan na uśhki źäśinćha.

²⁶Niźaśa thappacha ni yoqkiś niźta watchi kintu śiśśićha.

²⁷Jesusaź neqhśtan ulnan, pukultan śuranakaki apźkichićha qhawkan: — ¡Werhnak oqźnalla, Davidź Mati!

²⁸Neqhśtan Jesusaź qhuya luśhtan, ni śur źoñinakaki nïźkiś makhatźkichićha, neqhśtan Jesusaki ninakźkiś pewkśićha: — ¿Anćhukki werh ćhhetiñiź kirïxo? — Yöś tata werhnakki kirïućha.

²⁹Neqhśtan Jesusaki ninakź źhuki lanźinchićha, tuź khikan: — Anćhuka thapa quśtan pektakamax khila.

³⁰Neqhśtan ninakaki cherñi khissićha. Niźaśa Jesusaki ninakźkiś śumpacha iwxt'ichićha: — Nonźna anćhuk ćhhetinta ana jëkhmi śiśtanćha.

³¹Xalla ni źoñinakaki qhuykiśtan ulanźkupacha, thappacha ni yoqaran ni Jesusaź ćhhetinta kint'ichićha.

³²Ni śur źoñinakaź qhuykiśtan ulantan, tshi qhaźultan źoñinakaki Jesusiźkiś tshi anaśum yenqha tanta up źoñi śhikchićha.

³³Niźaśa Jesusaź ni anaśum yenqha chhetqattikiśtan, ni up źoñiki chïchi qallantichićha. Neqhśtan ni źoñinakaki añcha iśpantatćha tuź khikan: — ¡Anapan ti Israel wathkiś tiźta irata chertaćha!

³⁴Xalla ni fariseonakaśti tuź khetćha: — Xalla ni anaśum yenqhiź chawkh jiliri pachaćha, ti Jesusiźkiś ni chhetqatś aśi thächiki.

³⁵Jesusaki thappacha ti yoqaran niźaśa ti watharan niźaśa xochiran, niźaśa śapa akhs qhuyaran thaxiñitaćha, niźaśa Yöś śuma kintu niźaśa irpiś watkiśtan, niźaśa thapaman konanakźkiśtan ćhhetiñitaćha niźaśa llakinakźkiśtanami.

³⁶Niźaśa Jesusaki ni tama ötchi niźaśa aśi lhxatkhichi źoñinaka cherźku oqśićha, ni źoñinakaki tshi ana awatirchiś üśaź taqaśtaćha.

³⁷Neqhśtan Jesusaki nïź thaxintanakźkiś khichićha: — Cheqpacha ti śqala axśki taźźa, xalla ni lanqśñi źoñinakaki qolukullaćha.

³⁸Anćhukki ni śqalchiś tuyñuźkin maya, ni śqala axśxapa lanqśñi źoñinaka kuchanźkaxu.