Read Chipaya MARCOS 1 Bible Online

MARCOS 1 - Chipaya bible

MARCOS 1

¹Xalla tuź qallantichićha ni Yöś śuma kintu parli Yöś Machhśkiśtan, Jesusaki Yöś kuchanźkitaćha.

²Isaías Yöśkiśtan chïñiź khjirtikiśiki, tuź khjirtaćha: “Werhki weth taqu palxayñi am tukkiś kuchanźkućha, niźaśa am jikhś thakśinaxu.

³Tshi xora ni ch'eqti yoqkin qhawćha: ‘Tatź jikhś thakśnakićha; tshi śoq'u jikhś khetźinakićha.’ ”

⁴Xalla nuź Juan Wawtistaki ch'eqti yoqkin źoñinaka wawtiskan thonchićha, anćhukki Yöśkin quś thutźnaxu, wawtista khiśxapa anćhuka uj pertunta khiśxapa.

⁵Thapa źoñinakaki nonśñi oqhchićha Juanźkin, Judea khita yoqkiśtan niźaśa Jerusalén khita wathkiśtan; ninakaź uj pampachtikiśtan, Juanki Jordán pujkiś wawtisatćha.

⁶Juanź śkitiki camelluź chomkiśtan pätataćha, nïź tshayimi śqiśkiśtan pätataćha; niźaśa nïź luliki śher śherñitaćha niźaśa munti misk'inaka lulhñitaćha.

⁷Juanki oqhlaykan źoñinakźkiś palxaychićha, tuź khikan: “Tshïki weth xaruź thonćha, xalla nïćha wethkiśtan tshan aśśiśki, nïźkiś anal wakiśućha nïź ćhhata jerźku śhoqhśiñimi.

⁸Werhki qhaśtanqaś anćhuk wawtisinćha; ni thonñiki Espíritu Santuźtanź wawtisakićha.”

⁹Xalla ni thuñiran Jesusaki Nazaret khita wathkiśtan oqhchićha, ni Nazaret wathaki Galilea yoqkiśtaćha. Juanki Jesusa wawtissićha ni Jordán pujkiś.

¹⁰Jesusaki qhaśkiśtan wax ulnawk khen, Jesusaki ni tsewkta yoqa khetsñi cherchićha, ni Espirituki palomaźtaqaś nïź tsektuñpacha śhujźkiñi.

¹¹Neqhśtan tsewktan tshi xora palxayźkiñi nonśićha, tuź khikan: “Amćha weth q'ay Matimki, werhki am illśinpanćha.”

¹²Neqhśtan Yöś Espirituki, Jesusa ch'eqti yoqkin chhichchićha.

¹³Neqhśtan Jesusaki paqhpik qhalu thuñi źelhchićha ni k'ith uywanakźtan, niźaśa ni Saxraki ujkiś thxotsqatś pekatćha. Neqhśtan Yöś anjilanakaki Jesusa quśhñi thonchićha.

¹⁴Juan karsilkiś chawkhtikiśtan, Jesusaki ni Galilea khita watha oqhchićha, Yöś irpiś watha niźaśa Yöś śuma kintu palxaykan.

¹⁵Jesusaki tuź khikan palxaychićha: “Ni chïta thuñiki irantiźkichićha, niźaśa ni Yöś irpiś wathaki keźullaćha. Yöśkinź qhutźna niźaśa nïź śuma kintu thapa quśtan katoqakicha.”

¹⁶Jesusaki oqatćha ni Galilea khita qot atkiś, xalla nuź oqhkan pukultan jilaśullka cherchićha, Simunźtan Andrestan. Ch'iś tanñinakataćha, ninakaki ni ch'iś tanś kakuna qhaśkiś thxotźnatćha.

¹⁷Jesusaki ninakźkiś khichićha: — Werh apźka, werhki źoñi tanñi anćhuk khisqataćha.

¹⁸Neqhśtan ni ora pacha ninakaki, ch'iś tanś kakuna ekku Jesusiźtan chika oqhchićha.

¹⁹Jesusaki tshi qolukulla nawkhxapa oqźku cherchićha, Santiaguźtan Juanźtan, ni Zebedeoź machhnaka, ni pukultan źoñinakaki walsikiś źelatćha ch'iś tanś kakuna t'irkan.

²⁰Jesusaki ninaka qhawśićha; ninakaki Zebedeo khita ninakź eph ekchićha ni walsikiś nïź piwuna nakźtan, neqhśtan Jesusiźtan oqhchićha.

²¹Cafarnaúm khita watha irantichićha; ni jejś thuñkiś Jesusaki luśhśićha ni akhs qhuykiś, neqhśtan Jesusaki thaxni qallantichićha.

²²Ni źoñinakaki nïź thaxnan añcha iśpantichićha; niźaśa chawkh jiliriźtaqaś thaxnatćha, ana ni judiuź lï utt'ayñi źoñinakaźtaqaś.

²³Ni akhs qhuykiśpacha tshi yenqhaź tanta źoñi źelatćha, ni źoñiki qhawchićha:

²⁴— ¿Qhaźtikiśtan am wethnakakiś mitiśxo, Jesusa Nazaret wathchiś źoñimla? ¿Werhnak aqi thonchamqaya? Werh am paxućha niźaśa ampan śiśućha śuma Yöś Matimpanćha.

²⁵Neqhśtan Jesusaki yenqhiźkiś ujśićha, tuź khikan: — ¡Ch'uj źela Ti źoñźkiśtan ulna!

²⁶Neqhśtan yenqhaki, ni źoñi cheqhinsqatchicha thapa aśtan qhawkan ulanchićha, ni źoñźkiśtan.

²⁷Thappacha niźta cherźku źoñinakaki añcha tsukhchićha, ninakpora pewksasatćha: — ¿Ćhhulut niźta tïxo? ¡Ćhhulut ti ew taqu thaxinxo ti źoñiki jiliriźtaqaś aśśiśśa! ¡Yanqhamiź chhetqatćha, ni yenqhaki tïź taqumiź kaśśa!

²⁸Niźaśa rattulla śiśśićha ni Jesusiź pätanakaki, thappacha ni Galilea muytata.

²⁹Neqhśtan akhs qhuykiśtan ulanźku, oqhchićha ni Jesusaki Santiaguźtan Juanźtan, niźaśa Simón Andrés qhuya.

³⁰Neqhśtan qhuya luśhku, Jesusiźkiś maśśićha, ni Piruź axmuś mäki aphśkiś źelatćha; ćh'ulhñi konkiś läkichi.

³¹Jesusaki makhatźku näźa qhara tanźku tshithsqatchićha; ni orapacha ni ćh'ulhñi kona saraqchićha, neqhśtan na źonki ninakźkiś liwarpaychinćha.

³²Thuñiź qattan śeślaqa, Jesusiźkiś śhikchićha wakchi ni läkhichi źoñinaka, niźaśa yenqhaź tanta źoñinakami;

³³thappacha ni wathchiś źoñinakaki akhsićha Simunź qhuy śanku.

³⁴Jesusaki thapaman läkhichi źoñinaka ćhhetinchićha, niźaśa ni źoñinakźkiśtan wakchi anaśum yenqhanaka chhetqatchićha; niźaśa Jesusaki ni anaśum yenqhanaka ana chïqatatćha, ninakaki Jesusa paxatćha.

³⁵Chawkh qhantati Jesusaki źäźku ulanchićha ni wathkiśtan, ch'eqti yoqa mayiśi oqhchićha.

³⁶Simunaki nïź maśinakźtan Jesusa qhuri oqhchićha,

³⁷neqhśtan Jesusa wathźku khichićha: — Thapa źoñinakaki amź qhurćha.

³⁸Neqhśtan Jesusaki ninakźkiś khichićha: — Nakhuñź oqhla ti źkati wathanak qhutñi, niźaśa werhki xalla nikhu śaqaś Yöś śuma kintu palxayśkiśtanćha; xalla nïxapa ti yoqkiś thonchinćha.

³⁹Jesusaki thappacha ni Galilea khita yoqaran oqhlaychićha, niźaśa śapa akhs qhuyaran Yöś śuma kintu parlikan, niźaśa ni anaśum yenqhanaka chhetqatkan.

⁴⁰Jesuskiś thonchićha, tshi moqhchi xañchichiś ni źoñiki nïźkiś killśku rokt'ichićha, tuź khikan: — Am pekćhax nïki atasaćha weth konkiśtan źhujźiñiki.

⁴¹Neqhśtan Jesusaki ni źoñi oqźku, nïźkiś lanśićha, tuź khikan: — Pekućha. ¡Xaśiki źhujtamćha!

⁴²Xalla nuź chïtikiśtan ni orapacha ni źoñiki źetchićha.

⁴³Neqhśtan Jesusaki ni źoñi kuchanchićha, śumpacha iwxt'iźku, xalla tuź khikan:

⁴⁴— Nonźna, ana jëkhźkiśimi ti maśnakićha; timlu jilirźkin oqa amki perśuna thëźka ni timlu jilirźkiś, am ofrenda chhichśku oqa am ćhhetintikiśtan, Moisés chïtakama pä, thappacha ni timlu jilirinaka am ćhhetinta śiśaxu.

⁴⁵Neqhśtan ni źoñiki oqhchićha, thapa źoñinakźkiś kint'i qallantichićha ni ćhhetintikiśtan. Xalla niźtikiśtan Jesusaki anaź xaqhsi wathkiśimi luśhi atatćha, wathź thiykin ekliñitaćha niźaśa ana źoñź źelhś yoquñ ekliñitaćha; niźtami thapa qhuttan źoñinakaki nïźkin thonñitaćha.